Kemuni, Keitou Via Raici Jisu

Ena dua na siga ena vulaitubutubu ni 1945, a yadra cake e dua na cauravou ena dua na valenibula ni mataivalu. E kalougata ni se bula—a lauvana ena daku ni daligana, ia era sa seleti koya na vuniwai, sa rawa ni taubale ka vosa vinaka tale.

E ka ni rarawa, ni vakacacana na gasau na tiki ni nona mona ka rawa kina vua me kila na mata ni tamata e raica. Ena gauna oqo e raica yani na watina ka sega sara ga ni bau kila vakalailai; e sega ni kilai tinana. Na mata mada ga e raica ena iloilo e vulagi kina—e sega ni tukuna rawa se tagane se yalewa.¹

Sa sega ni kila na mata—e dua na ituvaki e tauvi ira tu e milioni vakamilioni na tamata.²

Na tamata sa sega ni kila na mata era dau tovolea me ra kilai ira na tani ena nodra vulica na lawa eso—e dua na lawa me kila na luvena yalewa ena levu ni tavutonotono e matana se dua na itokani ena nona ilakolako.

Dua tale na ikarua ni italanoa qo, voleka ga i vale: niu se gonetagane voli, au dau raici tinaqu tu me daubulilawa. Ena lewa o koya na gauna au rawa ni qito kina kei na gauna meu sa lai davo kina se, ca sara, na cavuco e yasa ni vale.

E matata tu ni lomani au. Ia sa rui vakavuqa ka vakatubu madua vei au, niu dau raici koya tu ga me “O Koya E Dodonu Me Muri Na Nona Vosa.”

Ena vica na yabaki i muri au sa qai raici koya ni dua na tamata dina. Au madua meu kaya niu a sega ni bau dau raica na nona oca se meu bau taroga na cava e rua voli ga kina na liku makawa e dau daramaka (ia e voli noqu isulu vou ni vuli) se cava na vuna, ni oti e dua na siga, sa oca sara vakalevu o koya ka dau vinakata meu laki moce vakayakavi.

De rairai o sa raica rawa beka ni italanoa e rua oqo e dua ga na italanoa—ena vica vata na yabaki, au a sega ni dau kila rawa na mata ni tamata. Au a sega ni raica rawa na tinaqu ni dua na tamata dina. Au raica na nona lawa ia au sega ni raica kina na nona loloma

Au talanoataka vei kemuni na italanoa e rua oqo me dusia e dua na vakasama: Au kidava ni o ni kila e dua (se o iko beka e dua) ka mataboko tiko vakayalo ena irairai ni mata ni tamata.

E dredre beka nomu raica na Kalou ni dua na Tama dau loloma. Ona rai beka vaka i lomalagi ka raica, sega na mata ni loloma cecere ia e dua na veikau medre ni lawa mona vaqara kina nomu sala. O nanuma tiko beka ni veiliutaki tu mai na Nona lomalagi na Kalou, vosa mai vei ira na Nona parofita ka lomana na tacimu yalewa, ia o vakataroga lo toka se lomani iko beka.³ Rairai o sa vakila beka na ititoko kaukamea e ligamu ia se bera nio vakila na loloma ni Kalou e tuberi iko tiko kina.⁴

Au kidava ni o kila eso na tamata vaqo baleta ena dua na gauna balavu, o au a dua tu na mataqali tamata vaqo—au sega ni dau kila rawa vakayalo na mata ni tamata.

Au nanuma ni noqu bula e ka walega ni muri lewa ka me bulataki ga na itagede vakavakasama. Au kila ni lomani iko vakavinaka sara na Kalou ia au sega ni vakila vakai au. Au taqayataka niu dau vakasamataka vakalevu cake meu lako i lomalagi mai na laki tiko vata na Tamada Vakalomalagi.

Kevaka o iko, me vakataki au, e rawa nio vakamuria e tebenigusu ka sega ni lagata sara na sere ni loloma veivueti,”⁵ na cava edaru rawa ni cakava?

Na kena isau, me vaka sa vakananuma vei keda o Peresitedi Nelson, sai Jisu ga.⁶ Oqori edua na itukutuku vinaka.

E dua na qaqana lekaleka ena Joni au dau taleitaka. E tukuna me baleta e dua na ilala e taudaku era a lako yani vua e dua na tisaipeli ena dua na kerekere bibi. “Keitou via raici Jisu saka.”⁷

Oqori na ka eda vinakata taucoko—meda raici Jisu ena Nona ituvaki dina ka vakila na Nona loloma. Sa i koya oqo na vuna ni veika kece eda cakava ena Lotu—kei na veigauna ni soqoni ni sakaramede. Kevaka o vakananuma na mataqali lesoni vakacava mo vakavulica, na soqoni vakacava mo navuca, se mo sa laiva ga mera qito veipasi na dikoni,mo na taura beka na tikina me nomu idusidusi: ena vukei ira beka na tamata na ka oqo mera raici Jisu Karisito ka lomani Koya? Kevaka e sega, tovolea mada e dua tale na ka.

Ena gauna au kila kina niu sa mataboko ena irairai ni mata, niu raica ga na lawa, ia e sega ni nona mata ni loloma cecere na Tamada, au kila ni sega ni nona cala na Lotu. E sega ni nona na Kalou, ka sega ni kena ibalebale ni sa yali na ka taucoko; e dua na ka e dodonu meda vulica taucoko. O ira sara mada ga na ivakadinadina taumada ki na Tucake tale era sotava vakavuqa e matana votu na Turaga sa tucake tale mai ia era sega ga ni kilai Koya, mai na iBulubulu ena Were ki na baravi kei Kaleli, era “raici Jisu ni tucake tu, ka sega ni kila ni sai Jisu.”⁸ Era vulica me ira dau kilai Koya, vakakina o keda.⁹

Ena gauna au kila kina niu sa mataboko tiko vakayalo ena irairai ni mata, sa tekivu meu muria na ivakasala nei Momani meu masu “ena yalo[qu] taucoko” meu vakasinaiti ena loloma sa yalataki vei ira na Nona tisaipeli—noqu loloma Vua kei na Nona loloma vei au—ka meu “raica na matana dina meda rawata na inuinui oqo.”¹⁰ Au masumasu tiko ena vica na yabaki me rawa niu muria na imatai ni ivakaro cecere meu lomana na Kalou ka vakila na “imatai ni dina ni lomani keda na Kalou e na Yalona taucoko, Nona kaukauwa, nanuma, kei na igu.”¹¹

Au wilika talega ka baci wilika tale na va na Kosipeli—ena gauna oqo au sega ni wiliwili meu vakadeuca na lawa ia meu raica o cei o Koya kei na cava e taleitaka o Koya. Ka yaco na gauna, au a kuitaki yani ena uciwai ni loloma e drodro mai Vua.

E kacivaka o Jisu ena tekivu ni sa lako mai o Koya “me vakabulai ira sa kavoro na yalodra, me [vunautaka na sereki] vei ira na bobula, kei na rai tale vei ira na mataboko.”¹²

Oqo e sega ni dua ga na ka me caka se PR vinaka; oqo na irairai ni Nona loloma.

Cega na Kosipeli vakacalaka; ena veidrauna yadua eda raica ni oKoya e qaravi ira na tamata era rarawa—ena bula veimaliwai, vakayalo kei na vakayago. E tarai ira na tamata sa nanumi tu ni ra ca ka tawasavasava¹³ ka vakani ira na viakana.¹⁴

Na cava na italanoa o taleitaka baleti Jisu? Au kidava ni vakaraitaka na Luve ni Kalou ni dolele yani me mokota se solia na inuinui vei dua e tiko ena yalayala—na tauvi vukavuka,¹⁵ na kai Samaria biliraki,¹⁶ na beitaki kei na tamata ivalavala ca,¹⁷ se na meca ni vanua.¹⁸ Na loloma soliwale vaqori e vakasakiti.

Tovolea mo vola na veigauna kece e vakacaucautaka se vakabula se kana vata kei dua mai taudaku, ena voleka ni maca nomu iqi ni se bera ni o biuti Luke.

Niu raica oqo e rika na yaloqu niu vakilai Koya ena yalo ni loloma, ka tekivu meu vakila ni rawa ni lomani au o Koya. Me vaka e vakavuvulitaka o Peresitedi Nelson, “Na levu cake ni nomu vulica me baleta na iVakabula, na kena rawarawa mo vakabauta na Nona loloma cecere, Nona loloma tawayalani.”¹⁹ Kei na levu ni nomu na vakararavi Vua kei na lomana na Tamamu Vakalomalagi.

Me vaka e vakavuvulitaka o Elder Jeffrey R. Holland nio Jisu a lako mai me vakaraitaka “ vei keda o cei kei na cava na Kalou na Tamada Tawamudu, na taucoko ni Nona yalodina vei ira na Luvena ena veitaba yabaki kei na vanua.”²⁰

E kaya o Paula “na Tama ni loloma cecere [kecega] , kei na Kalou ni vakacegu kecega.”²¹

Kevaka o raici Koya vakatani, yalovinaka tovolea tiko ga.

Era sureti keda na parofita meda vakasaqara na Matana.²² Au taura oqo me ivakananumi nida sokalou vua na Tamada, sega ni dua na ivakarau, ka nida se bera ni oti me yacova ni da sa raici Jisu me vaka ni mata ni loloma ni Tamada²³ ka muri Koya, sega walega ni nona lawa.²⁴

Ni ra vosa na parofita kei na apositolo ena veiyalayalati, era sega ni vakataki ira na dauveituberi ni qito era kaila toka ga mai na vatavata (damudamu), ka tukuna meda “tovolea vakaukauwa!” Era vinakata meda raica ni noda veiyalayalati e vakabibitaka na veimaliwai²⁵ ka rawa ni iwali ni mataboko vakayalo ni mata.²⁶ Era sega ni lawa meda rawata kina na Nona loloma, o Koya sa lomani keda vakavinaka sara. Na noda ibolebole meda kila vakavinaka ka moica na noda bula kina loloma oya .²⁷

Eda tovolea meda rai basikata na noda veiyalayalati, me vaka e dua na katubaleka, kina mata ni loloma cecere nei Tamada

Na Veiyalayalati sa ibulibuli ni imoko vaKalou.

Kena iotitoi, eda rawa ni vulica meda raici Koya ena noda qaravi Koya. “Me na kila vakaevei na tamata na turaga ka sega ni bau qarava?”²⁸

Ena vica na yabaki sa oti, au ciqoma edua na veikacivi au sega ni taleitaka. Au yadra totolo, ena taqaya—ia e dua na malanivosa ena noqu vakasama kau se bera vakadua ni bau rogoca: oya na veiqaravi ena Lotu oqo sai koya me da tucake tu ena uciwai ni nona loloma na Kalou vei ira na Luvena. Na Lotu oqo e dua na ilawalawa ni tamata tauri piki kei na isivi ka era tovolea tiko mera veivuke me vagalalataki na sala kina ucuniwai ni loloma ni Kalou mera yacovi ira na Luvena ena kena icavacava.

Se o cei ga o iko, se cava ga na nomu bula e liu, e dua na nomu rumu ena Lotu oqo.²⁹

Dreta mai e dua na piki kei na isivi ka lewena na timi. Veivuke ena kena kau yani na Nona loloma vei ira na Luvena, ena tasova vei iko eso.³⁰

Meda vakasaqara na matana dauloloma, na Nona imoko ni veiyalayalati, ka qai veitauriliga kei ira na Luvena, ka da qai lagata vata “Na Nodai Vakabula”:

Meda vakasaqara na Matana dauloloma ka waqa ni Nona loloma cecere vei ira na Luvena.³² Ena yaca i Jisu Karisito, emeni.