Lagilagi ni Veimatanitu

Mai na ivakatakila ni gauna oqo eda kila kina ni nodra icavacava cecere duadua o ira kece era bula tiko e vuravura e sega ni vakasama sega ni veiganiti ni lomalagi me baleti ira na ivalavala dodonu kei na rarawa tawamudu mai eli me baleti ira na kena vo. Na ituvatuva ni loloma ni Kalou me baleti ira na Luvena e oka kina na dina oqo ka vakavulica na noda iVakabula, o Jisu Karisito: “Sa vuqa na tikina ena vale nei Tamaqu.”¹

Na ivunau vakatakilai mai ni Lotu i Jisu Karisito sa vakalesui mai e vakatavulica ni o ira kece na luve ni Kalou—ena veika e yalani kina sega ni vakadeitaki eke—era na qai yaco ga yani ki na dua na matanitu lagilagi ka “sa uasivia na ka kecega.”² Ni oti e dua na gauna era vakararawataki kina na talaidredre ena vuku ni nodra ivalavala ca, ka vakarautaki ira na rarawa oya ki na veika ena tarava mai, era na tucaketale ka toso kece yani ki na iOtioti ni Veilewai ni Turaga o Jisu Karisito. E kea, na noda iVakabula dauloloma, o koya, eda vakavulici, “sa vakalagilagi Tamana, ka vakabulai ira kece na ibulibuli ni ligana,”³ ena talai ira kece na luve ni Kalou kina dua vei ira na matanitu lagilagi oqo me vaka na gagadre era sa vakaraitaka ena nodra digidigi.

E dua tale na ivunau kei na ivalavala vakasakiti ni Lotu vakalesui mai sa ikoya na ivakaro kei na veiyalayalati vakatakilai mai ka solia vei ira kece na luve ni Kalou na madigi tabu mera rawata kina na ivakatagedegede cecere duadua ni lagilagi ena matanitu vakasilesitieli. Na icavacava cecere duadua oya—na bula vakacerecerei ena matanitu vakasilesitieli—sa vakanamata kina na Lotu i Jisu Karisito ni Yalododonu Edaidai.

Mai na ivakatakila ni gauna oqo, sa tu kina vei ira na Yalododonu Edaidai na kilaka cecere oqo me baleta na ituvatuva ni bula marau ni Kalou me baleti ira na Luvena. Na ituvatuva oqori e tekivu ena noda bula vakayalo ni bera nida sucu, ka vakatakila tu na inaki kei na ituvaki ni noda ilakolako digitaki ena bula oqo kei na icavacava eda gadreva ena bula tarava.

Eda kila mai na ivakatakila ni gauna oqo ni “sa tu na lawa ni veimatanitu kecega”⁴ ka ni matanitu lagilagi eda ciqoma ena iOtioti ni Veilewai e vakatau ena lawa eda digitaka meda muria ena noda ilakolako vakayago. Ena ruku ni ituvatuva ni loloma oya, era tu kina na veimatanitu e vuqa—vuqa na tikina—me rawa kina ni ra na taukena kece na luve ni Kalou e dua na matanitu lagilagi ka rawa ni ra “tiko kina.”

Nida vakamacalataka na ituvaki kei na gagadre ni tolu na matanitu yadua ena ituvatuva nei Tamada, eda tekivu ena kena e cecere duadua, sa ikoya e vakanamata kina na ivakaro vakalou kei na cakacaka vakalotu sa vakatakila na Kalou mai na Lotu i Jisu Karisito ni Yalododonu Edaidai. Ena lagilagi “vakasilesitieli”⁵ e tolu na kena ivakatagedegede,⁶ ka sa cecere duadua kina na bula vakacerecerei ena matanitu vakasilesitieli. Oqo na nodra itikotiko o ira “era sa rawata na nona veivakataucokotaki, kei na nona lagilagi,” o koya gona, “era sa kalou, io era sa luvena tagane [kei na yalewa] na Kalou”⁷ ka “tiko ena iserau ni Kalou kei na nona Karisito me sega ni mudu ka sega ni mudu.”⁸ Mai na ivakatakila, sa vakatakila kina na Kalou na lawa, cakacaka vakalotu, kei na veiyalayalati tawamudu eso e dodonu me vakamuri me tarai cake kina na ivakarau vakalou e gadrevi me rawati kina na rawaka vakalou oqo. E vakanamata na Lotu i Jisu Karisito ni Yalododonu Edaidai baleta na inaki ni Lotu vakalesuimai oqo me vakarautaki ira na luve ni Kalou kina veivakabulai ena lagilagi vakasilesitieli ka, vakabibi cake, me baleta na bula vakacerecerei ena kena ivakatagedegede cecere duadua.

Ena ituvatuva ni Kalou, ka yavutaki ena dina tawamudu, ena rawa walega ni rawati kina na bula vakacerecerei oya ena yalodina ki na veiyalayalati ni vakamau tawamudu vei rau e dua na tagane kei na dua na yalewa ena valetabu tabu,⁹ na vakamau oqo ena qai yaco e muri me vakarautaki vei ira kece na yalodina. O ya na vuna eda vakavulica kina ni “yalewa se tagane sa dua na tiki bibi ni keda ituvaki kei na keda inaki ena bula taumada, bula oqo, kei na bula tawamudu.”¹⁰

E dua na ivakavuvuli duatani ka yaga me vukei keda ena noda vakavakarau ki na bula tawamudu, sai koya na ivakaro ni matavuvale ni 1995.¹¹ Na kena ivakaro e vakamatatataka na veika me vakarautaki keda meda bula vata kei na Kalou na Tamada kei na Luvena, o Jisu Karisito. O ira era sega ni kila vakavinaka na ituvatuva ni loloma i Tamada me baleti ira na Luvena e rawa ni ra vakasamataka na ivakaro ni matavuvale oqo me dua walega na itukutuku ni lawatu e rawa me veisautaki. Na kena veibasai, eda vakadeitaka ni ivakaro ni matavuvale, e yavutaki ena ivunau sega ni veisautaki rawa, e vakamacalataka na mataqali veimaliwai vakamatavuvale ena bula oqo ka rawa ni yaco me tiki bibi duadua ni noda vakatorocaketaki tawamudu.

E vakamacalataka o Paula na iApositolo e tolu na ivakatagedegede ni lagilagi, ka vakatauvatani iratou kina lagilagi ni matanisiga, vula, kei na kalokalo.¹² E vakayacana na kena e cerecere duadua me “silesitieli” kei na kena ikarua me “teresitieli.”¹³ E sega ni vakayacana na kena e ra duadua, ia e dua na ivakatakila vei Josefa Simici a qai vakuria kina na yacana me: “tilesitieli.”¹⁴ DUa ale na ivakatakila e vakamacalataka tale ga na kedra ituvaki na tamata era na lesi kina vei lagilagi ni matanitu. O ira era sega ni digitaka me “muria na lawa ni matanitu vakasilesitieli ”¹⁵ era na taukena e dua tale na matanitu lagilagi, lailai sobu mai na lawa vakasilesitieli ia e veiganiti kei na lawa era sa digitaka ka rawa ni ra “tiko kina.” Na vosa tiko, kina e kilai levu ena ivolanikalou, e kena ibalebale na kena vakatikori dei.¹⁶ Me ivakaraitaki, o ira era tiko ena matanitu vakateresitieli—ka vakatauvatani kei na vakasama kilai levu ni lomalagi—“sai ira ena dau mai sikovi ira ga na Luvena, ia era na sega ni raica na vakataucokotaki nei Tamana.”¹⁷ Era “tamata dodonu ni vuravura, ka ra a vakamatabokotaki ena nodra ilawaki qaseqase na tamata,”¹⁹ ia “sa sega ni gumatua ena nodra ivakadinadina me baleti Jisu.”²⁰

Na ivakamacala ni kena vakatakilai o ira era lesi kina matanitu lagilagi era duadua, na matanitu vakatilesitieli, sai ira “ena sega ni tiko rawa ena lagilagi vakateresitieli.”²⁰ Oqori e vakamacalataki ira era cata na iVakabula ka sega ni muria e dua na iyalayala vakalou ena nodra ivakarau Oqo na matanitu era tiko kina na tamata ca, ni ra sa vakararawataki oti ena vuku ni nodra ivalavala ca. Oqo era vakamacalataki ena ivakatakila ni gauna oqo ni o “ira era a sega ni vakabauta na kosipeli i Karisito, se na ivakadinadina kei Jisu.

“Ko ira oqo sai ira na daulasulasu, kei ira na daucakaisausau, kei na dauveibutakoci, kei na dauyalewa, kei ira sa dau taleitaka na lasu ka dau lasulasu.”²¹

Ni tukuna tiko me baleta na tolu na matanitu lagilagi ena nona raivotu vakaparofita, a vola wale tikoga oqo o Peresitedi Russell M. Nelson: “Na bula taucoko oqo e sega saraga ni bau dua na tiki lailai sara ni dua na sekodi ni vakatauvatani kei na bula tawamudu. Ia sa dua na tiki ni sekodi bibi dina! Vakasamataka vakavinaka na kena ilakolako: Ena bula oqo sa rawa mo digitaka na lawa cava o lomasoli mo muria—na kena ena matanitu vakasilesitieli, se vakateresitieli, se vakatilesitieli—ka, me vakakina, na matanitu ni lagilagi cava o na lai bula tawamudu kina. Sa dua dina na ituvatuva! E sa dua na ituvatuva ka rokova vakataucoko sara na nomu galala ni digidigi.”²²

A vakavulica na iApositolo o Paula ni a soli na ivakavuvuli kei na ivakaro ni Turaga me rawa nida rawata kece meda “tautauvata kei na ivakarau ni tamata dina, era sa sinai sara kei Karisito.”²³ Na cakacaka oqori e gadrevi vakalevu cake sara mai na kena rawati walega na kilaka. E sega mada ga ni sa rauta me rawai keda na kosipeli, sa dodonu me da cakacaka ka vakasama me rawa kina ni veisautaki keda. Ni veibasai kina vunau tale eso, ka vakavulici keda me da kila e dua na ka, na kosipeli i Jisu Karisito e bolei keda me da yaco me da dua na ka.

Mai na ivakavuvuli vakaoqori eda sa tinia kina ni iOtioti ni Veilewai e sega walega ni mai dua na vakadikevi ni wiliwili taucoko ni caka vinaka kei na caka ca—na ka eda sa cakava. E vakatautaki ena icavacava noda cakacaka kei na vakasama—na ituvaki eda sa yacova Eda na rawata na bula tawamudu ena iwalewale ni saumaki mai. Me vaka e vakayagataki eke, na vosa oqo ka levu na kena ibalebale e dusia na veisau levu ni bula. E sega ni rauta vua e dua me lako curuma tu ga yani. Na vunau, cakacaka vakalotu, kei na veiyalayalati ni kosipeli e sega ni dua na lisi ni vakacuruilavo me vakacurumi ki na dua na akaude vakalomalagi. Na kosipeli i Jisu Karisito e dua na ituvatuva e vakaraitaka vei keda na sala meda yacova rawa kina na ituvaki e gadreva vei keda na Tamada Vakalomalagi meda yacova.²⁴

Ena vuku i Jisu Karisito kei na Nona Veisorovaki, ni da lutu koso ena bula oqo, sa rawa ni da veivutuni ka tomana tale na salatu ni veiyalayalati e muataki keda ki na ka e gadreva vei keda na Tamada Vakalomalagi.

E vakavulica na iVola i Momani ni “bula oqo sa ikoya na gauna me vakarautaki [keda] me sota kei na Kalou.”²⁵ Ia na yalani veibolei oqori ki na “bula oqo” a soli kina e dua na itukutuku ni vakanuinui (me baleta beka eso na tamata) mai na veika a vakatakila na Turaga vei Peresitedi Joseph F. Smith, ka sa volai tu oqo ena Vunau kei na Veiyalayalati wase 138. “Au raici ira,” a vola na parofita, “na italatala qase ni itabagauna oqo, ni ra sa biuta na bula oqo, era a tomana tiko na nodra cakacaka ni kena vunautaki na kosipeli ni veivutuni kei na veivueti, ena vuku ni nona Veisorovaki na Luvena e Duabau ga na Kalou, io vei ira sa tu ena butobuto, kei ira sa bobula ki na ivalavala ca ena vuravura ni yalo.

“Raica era na vueti ko ira na mate era sa veivutuni, kevaka era sa talairawarawa ki na cakacaka vakalotu sa vakayacori ena vale ni Kalou.

“Ia ni ra sa sauma oti na isau ni nodra talaidredre, ka ra sa vakasavasavataki, era na qai tauca na kedra isau me vaka na nodra ivalavala, ni ra sa itaukei ni veivakabulai.”²⁶

Me kena ikuri, eda kila ni Mileniumi, na udolu na yabaki ka tarava mai na iKarua ni Lako Mai ni iVakabula, ena dua na gauna me vakayacori kina na cakacaka vakalotu e gadrevi vei ira era se bera ni ciqoma tu ena nodra bula vakayago.²⁷

E levu sara na ka eda sega ni kila tu me baleta na tolu na gauna bibi ena yavu ni veivakabulai kei na nodra veiwekani: (1) na vuravura ni bula taumada ni yalo, (2) bula ena vuravura oqo, kei na (3) bula e tarava, kei na nodra veimaliwai vakai ira. Ia eda kila na dina tawamudu oqo: “Na veivakabulai e ka ni tamata yadua, ia na bula vakacerecerei sa ka vakamatavuvale.”²⁸ E tiko na Tamada Vakalomalagi dauloloma ka na raica me da rawata na veivakalougatataki kecega kei na veika yaga kece sara e vakatara vakakina na noda gagadre kei na digidigi. Eda kila talega ni na sega ni vakasaurarataka e dua ki na dua na veiwekani ni veivauci ke sega ni lomana dina. Sa vakadeitaki na veivakalougatataki ni veimaliwai ni veivauci vei ira kece era maroroya na nodra veiyalayalati ia ena sega vakadua ni vakasaurarataki e dua na veimaliwai ni veivauci ki na dua tale na tamata e sega ni bula kilikili se sega ni vinakata.

Taciqu kei na ganequ, au vakadinadinataka na dina ni veika oqo. Au vakadinadinataka na noda Turaga o Jisu Karisito, “o koya sa vakatekivuna ka sauma talega na [noda] vakabauta,”²⁹ ni nona Veisorovaki, ena ruku ni ituvatuva ni Tamada Vakalomalagi, sa rawa kina na veika kece oqo, ena yaca i Jisu Karisito, emeni.