Na Kaukauwa ni Veivauci

Sa parofisaitaki oti tu mai na gauna sara i Aisea¹ ni ena veisiga emuri, o ira na tamata ni veiyalayalati makawa ni Turaga, na mataqali Isireli, era na “vakasoqoni vata tale mai na nodra veiseyaki tu vakadede, mai na veiyanuyanu ni wasawasa, mai na va na iwasewase kei vuravura”² ka vakalesui tale kina “veivanua sa nodra ivotavota vakawa.”³ Sa vosa oti kina vakavuqa ka vakaukauwa o Peresitedi Russell M. Nelson me baleta na vakasoqoni oqo, ka vakatoka “me ka bibi duadua e yaco tiko e vuravura nikua.”⁴

Na cava na inaki ni vakasoqoni vata oqo?

Ena dua na ivakatakila vua na Parofita o Josefa Simici, na Turaga a vakatakila kina edua na inaki oya na nodra taqomaki na tamata ni veiyalayalati. A tukuna o Koya, “Na vakasoqoni vata ena vanua ko Saioni kei na kena veiteki, [mena] baleta na veitaqomaki, ka ivakaruru mai na cava, kei na cudru ena gauna ena sovaraki mai kina ena kena sosoko ki vuravura taucoko.”⁵ Na “Cudru” ka tukuni eke e rawa me kilai me isau ni talaidredre ki na lawa kei na ivakaro ni Kalou ka yaco tu oqo.

E bibi duadua, ni vakasoqoni e baleta tiko na inaki ni kena kau mai na veivakalougatataki ni veivakabulai kei na bula vakacerecerei vei ira kece era na via ciqoma. Sai koya na sala me vakavotukanataki kina na yalayala ni veiyalayalati ka soli vei Eparaama. Na Turaga a tukuna vei Eparaama ena vuku ni nona kawa kei na matabete “era [na] vakalougatataki kina na vei matavuvale kece sara ni vuravura, io ena veivakalougatataki ni Kosipeli, sai koya na veivakalougatataki ni veivakabulai, io na bula tawamudu.”⁶ E vakamacalataka vakaoqo o Peresitedi Nelson: “Nida ciqoma na kosipeli ka papitaiso, eda sa taura vei keda na yaca tabu i Jisu Karisito. Na papitaiso sa ikoya na matamata e veimuataki yani me da vakaivotavota vata ena veiyalayala kece sara a solia na Turaga ena gauna makawa vei Eparaama, Aisake, Jekope, kei ira na nodratou kawa.⁷

Ena 1836, a rairai o Mosese vua na Parofita o Josefa Simici ena valetabu e Katiladi ka “solia … na idola ni nodra vakasoqoni vata mai na Isireli mai na tutui vuravura e va.”⁸ Ena gauna vata oqori ea rairai mai ko Ilaisa ka mai solia na lewa kei na kaukauwa ni itabagauna vakosipeli i Eparaama, ka tukuni kina ni ena vukuda kei ira na noda kawa ena vakalougatataki kina na veitabatamata kecega ena qai taravi keda mai.”⁹ Ena lewa vata oqo, eda kauta kina na kosipeli i Jisu Karisito—na itukutuku vinaka ni veivakabulai ena Vukuna—vei ira na tamata kece e veiyasai vuravura ka vakasoqoni ira kece era gadreva me curu kina veiyalayalati ni kosipeli. Era sa yaco me ra “kawa i Eparaama, kei na lotu kei na matanitu, era digitaki ni Kalou.”¹⁰

Ena gauna vata oya ena Valetabu e Kirtland, e rairai vei Josefa Simici kei Oliver Cowdery na ikatolu ni italai vakalomalagi. Au tukuna tiko na parofita o Ilaijia, kau via vosa tiko nikua me baleta na lewa kei na idola ka vakalesuya tale mai.¹¹ Na kaukauwa me vakadonuya kina na veicakacaka vakalotu kece ni matabete ka vakayacori ira mera vauci e vuravura kei lomalagi—na kaukauwa ni veivauci—e bibi ki na nodra vakasoqoni vata ka vakarautaki edua na matatamata ni veiyalayalati ena tai ruarua ni ilati.

Ena vuqa na yabaki yani i liu, sa vakamatatataka oti o Moronai vei Josefa Simici nio Ilaija ena kauta mai na lewa ni matabete ka gadrevi: “Au na vakatakila vei iko na Matabete, ena ligai Ilaijia na parofita.”¹² A qai vakamacalataka e muri o Josefa Simici: “Na cava me talai mai kina o Ilaija? Baleta ni taura tu o koya na idola ni lewa ni kena vakayacori na cakacaka tabu vakalotu kece sara ni Matabete; ni [vakavo ga] ke soli na lewa, ena sega ni rawa ni vakayacori na cakacaka vakalotu ena ivalavala dodonu,”¹³—oya, ni cakacaka vakalotu ena sega ni vauci ena gauna oqo kei na tawamudu.¹⁴

E vakatavulici ena ivolanikalou ka kilai tu me Vunau kei na Veiyalayalati, tukuna na Parofita: “Ena kena irairai beka vei ira eso ni sa rui ivunau kaukauwa eda veivosakitaka tiko oqo—e dua na kaukauwa e vola se vauca vata e vuravura ka vauca vata talega mai lomalagi. Ia, ena veitabayabaki kece ni vuravura, ni sa solia na Turaga edua na itabagauna ni matabete vua edua na tamata ena ivakatakila, se ki na dua na umatamata, sa dau soli kina na kaukauwa oqo. Ia, na veika kecega era vakayacora na tamata oqori ena dodonu e tu vei ira, ena yaca ni Turaga, ka ra vakayacora dina sara ena yalodina, ka maroroya toka e dua na kena itukutukuvolai dodonu ka dina, sa yaco me lawa e vuravura ka vakakina mai lomalagi, ka na sega ni rawa ni bokoci, me vaka na nona lawa ko Jiova cecere.”¹⁵

Eda dau nanuma ni lewa ni veivauci e yaga ga ki na so na cakacaka vakalotu ni valetabu, ia na lewa oya e gadrevi mena vakadonuya ka vauca kina edua na cakacaka vakalotu e vuravura ka vakakina e taudaku ni mate.¹⁶ Na kaukauwa ni veivauci e vakatikora edua na drega ni veivakadonui ena nomu papitaiso, me ivakaraitaki, me kilai kina eke ka vakakina mai lomalagi. Me kena ilutua, na cakacaka vakalotu kece ni matabete era vakayacori ena ruku ni idola ni Peresitedi ni Lotu, me vaka e vakamacalataka o Peresitedi Joseph Fielding Smith, “O koya [na Peresitedi ni Lotu] sa solia vei keda na lewa, sa solia na kaukauwa ni veivauci ena noda matabete, baleta ni tiko vua na idola oya.”¹⁷

E tiko edua tale na inaki bibi ena vakasoqoni vata i Isirelina kena ibalebale nida veitalanoataka na veivauci e vuravura kei lomalagi—sai koya, na tara kei na cakacakataki ni veivaletabu. E vakatavulica na Parofita o Josefa Simici: “Na cava beka na inaki ni nodra sokumuni na tamata ni Kalou ena yabaki cava ga e vuravura? Na inaki levu oya me tara e dua na vale vua na Turaga me rawa ni vakaraitaka kina o Koya vei ira na Nona tamata na cakacaka vakalotu ni Nona vale kei na lagilagi ni Nona matanitu, ka vakavulica vei ira na tamata na sala ni bula; ni tiko eso na cakacaka vakalotu kei na ivakavuvuli e kilai deivaki ni, ena gauna era vakavulici ka vakatovotovotaki kina, e dodonu me caka ena vanua se dua na vale e tara ena inaki oya.”¹⁸

Na dodonu ka solia na kaukauwa ni veivauci kina cakacaka vakalotu ni matabete e okati kina na, cakacaka vakalotu veisosomitaki era vakayacori ena vanua ka vakarautaka tu na Turaga—na Nona valetabu. Eke eda raica kina na lagilagi kei na savasava ni kaukauwa ni veivauci—e yaco rawa kina na veivakabulai kei na bula vakacerecerei kina tamata yadua kei na matavuvale vei ira na luve ni Kalou e vuravura ena gauna kei na vanua cava ga era a bula kina e vuravura. E sega ni dua tale na vakabauta vakalotu se vuku ni tamata se lewa, e rawa ni tautauvata kei na madigi veikovuti oqo. Na kaukauwa ni veivauci oqo e ivakaraitaki uasivi ni lewa dodonu, veivosoti, kei na loloma ni Kalou.

Ena noda rawa ni vakayagataka na kaukauwa ni veivauci, na yaloda e gole sara ga vei ira era sa liu yani. Na vakasoqoni kina veiyalayalati ena veisiga emuri oqo e kosova na ilati. Ena ituvatuva vinaka vakaoti ni Kalou, era na sega ni rawa ni vakila na bulatawamudu ena kena taucoko o ira na bula ke sega nira bulia edua na isema e dei vei ira “na qase,” sai ira na noda qase e liu. Sa vakakina na nodra toso o ira ena taudaku ni ilati, se o ira era na qai kosova na ilati ni mate ka sega ni vauci, era na sega ni taucoko me yacova ni sa caka na cakacaka vakalotu veisosomitaki me vauci ira vei keda, nodra kawa, kei keda vei ira ena ituvatuva vakalou.¹⁹ Na yalayala meda veivukei vakaikeda meda kosova na ilati e rawa ni vakatokai me dua na yalayala ni noda veiyalayalati, ka tiki ni veiyalayalati vou ka tawamudu. Ena vosa i Josefa Simici, eda vinakata meda “vauci ira na noda mate mera tucake [vata kei keda] ena imatai ni tucaketale.”²⁰

Na ivakaraitaki cecere ka tabu duadua ni kaukauwa ni veivauci, e kunei ena duavata tawamudu ni dua na tagane kei na yalewa ena vakawati kei na semati vata ni kawatamata ena nodra itabatamata kecega. Baleta ni ka tabu dina na lewa me veiliutaki ena veicakacaka vakalotu oqo, na Peresitedi ni Lotu e raica sara ga vakaikoya na kena soli na lewa oqo. A tukuna ena dua na gauna o Peresitedi Gordon B. Hinckley, “Au sa dau tukuna vakavuqa ni kevaka e sega ni dua tale na ka e basika mai na rarawa kei na dredre kece kei na mosi ni veivakalesui mai mai na kaukauwa ga ni veivauci ni matabete me vauca vata na matavuvale me tawamudu, sa na qai veirauti vinaka kei na kena isau.”²¹

Ke sega na veivauci ka bulia na matavuvale tawamudu ka semata vata na itabatamata eke kei na bula sa bera mai, ena sega ni qai vo vei keda na wakana se tabana—ena tawamudu, oya, o ira na qase e liu se noda kawa. Na ituvaki sega ni vakadeitaki, ka sega ni semati ni tamata yadua, ena dua na yasana, se isema ka saqata na vakawati kei na veiwekani vakamatavuvale esa lewa oti na Kalou,²² ena dua tale na yasana, ena vakaseva na inaki ni buli ni vuravura. Ke yaco oya mena vakina, ena tautauvata kei na kena cudruvi na vuravura ena cudru se “vakarusai sara” ena lako mai ni Turaga.²³

Eda raica rawa na vuni “Nona lesia na Kalou na vakawati ni dua na tagane kei na dua na yalewa ka uto ni ituvatuva ni nodra icavacava tawamudu na luvena na Dauveibuli na matavuvale.”²⁴ Ena gauna vata oya, eda kila kina ena gauna sega ni taucoko oqo, ni oqo e sega ni o koya na ka dina se me rawa ni rawati vei ira eso. Ia eda vakanuinui vei Karisito. Nida waraka na Turaga, e vakananumi keda o Peresitedi M. Russell Ballard ni “ivolanikalou kei ira na parofita ni gauna oqo era vakadeitaka nio ira taucoko era yalodina tiko ki na kena maroroi na veiyalayalati ni kosipeli e na nodra na madigi ni bula vakacerecerei.”²⁵

Eso era sa sotava oti na ituvaki sega ni marautaki ka sega ni vinaka vakamatavuvale ka lailai kina na nodra gadreva edua na veiwekani tawamudu vakamatavuvale. E vakadikeva o Elder Bednar na veika oqo: “Kivei kemuni oni sa sotava oti na mosi ni yalo ni veisere ena nomuni vuvale se o vakila na rarawa ni voroki na veivakabauti, yalovinaka nanuma [ni ituvatuva ni Kalou me baleta na matavuvale] e tekivu vei iko! Edua beka na isema ena sinucodo ni nomu itabatamata e sa cagutu beka, ia, na veiisema dodonu kei na kena e se vo tiko era bibi ka tawamudu. Ena rawa nio vakuria na kaukauwa ni nomu sinucodo ka na rawa beka mo veivuke ni vakalesuya mai na isema ka sa cagutu. Na cakacaka oqori ena vakayacori vakayadudua.”²⁶

Ena lotu ni veibulu vei Sisita Pat Holland, na wati Elder Jeffrey R. Holland, ena Jiulai sa oti, a vakavulica kina o Peresitedi Russell M. Nelson: “Ena yaco na gauna, merau na duavata tale o, Patricia kei Jeffrey. Erau na qai tomani emuri mai vei ira na luvedrau kei ira na nodrau kawa dau maroroi veiyalayalati mera vakila na taucoko ni reki ka sa vakarautaka tu na Kalou vei ira na luvena yalodina. Ni kilai oya, eda kila kina ni tikinisiga bibi duadua ena bula nei Patricia a sega ni nona tikinisiga ni sucu se ni nona mate. Na tikinisiga bibi duadua vua oya na ika 7 ni June, 1963, na gauna rau a vauci kina kei Jeff ena valetabu na St. George Temple. Na cava e rui bibi kina na ka oqo? Baleta na vu dina ni kena a buli na vuravura sai koya me tauyavutaki na matavuvale ka ra vauci vei ira vakai ira. Na veivakabulai e ka ni tamata yadua, ia na bula vakacerecerei sa ka vakamatavuvale. Sega ni rawa ni dua me bula vakacerecerei vakaikoya ga.”

Ena dua wale tikoga na gauna sa oti, keirau a veitomani kei na watiqu vua edua na itokani daulomani ena dua na rumu ni veivauci ena valetabu na Bountiful Utah Temple. Na imatai ni gauna au a sotavi koya kina na itokani oqo, oya ni a se gonelailai mai Córdoba, Argentina. Keirau a veitaratara tiko kei noqu itokani kaulotu vata kei ira na tamata ena dua na itikotiko voleka kina valenivolavola ni tabana ni kaulotu, ka dolava mai na katuba ni keirau yacova yani na nona vale. Ena kena gauna ga, eratou a yaco me lewena na Lotu kei tinana vata kei iratou na tacina, ka ratou lewenilotu yalodina tiko. Sa yaco oqo o koya me marama totoka, ka keitou a tiko ena siga oqo ena valetabu me vauci rau vauci vata na nona itubutubu ka qai vauci koya vei rau.

Edua na veiwatini ka rau yaco merau itokani voleka sara ena loma ni vica vata na yabaki erau a matataki nona itubutubu ena icabocabo ni soro. E gauna vakaciriloloma ka yaco me totoka cake sara ni sa vauci o neirau itokani mai Argentina vei rau nona itubutubu. Keitou a lewe ono ga na tiko rawa ena dua na yakavi vakanomodi ka yawa mai vei vuravura, ia edua vei ira na ka bibi duadua ka dau caka e vuravura a yaco tiko. Ia au a marau ni noqu itavi kei na veiwekani e sa mai vakacavari, mai na tukituki e nona katuba vaka dua na daukaulotu gone ki na gauna oqo, ena vica vata na yabaki ki muri, ena vakayacori ni cakacaka vakalotu ni veivauci ka semati koya kina kei rau nona itubutubu kei ira na itabatamata sa oti yani.

Na veika vata oqo e yaco tiko e veigauna ena veivaletabu kece e vuravura. Oqo na ikalawa cecere duadua ni nodra vakasoqoni vata na tamata ni veiyalayalati. E sai koya na ivotavota cecere duadua ni nomu lewena na Lotu i Jisu Karisito. Au yalataka nio vakasaqara ena yalodina na ivotavota oya, ena gauna oqo se ena tawamudu ena nomu vakaidina.

Au vakadinadinataka ni kaukauwa ni veivauci kei na lewa ka sa vakalesuitale mai ki vuravura mai vei Josefa Simici era dina, ni veika e vauci e vuravura era vauci vakaidina mai lomalagi. Au vakadinadinataka ni o Peresitedi Russell M. Nelson, me vaka ni Peresitedi ni Lotu, e sai koya na tamata duadua ga e vuravura nikua ena nona idola e dusimaka na kena vakayagataki na kaukauwa vakalomalagi oqo. Au vakadinadinataka ni Veisorovaki i Jisu Karisito sa yaco kina na tawamate rawa me ka dina kei na veiwekani ena matavuvale vakacerecerei me ka dina. Ena yacai Jisu Karisito, emeni.