Ena Vakacava na Levu ni Nomu Marau
Au sureti kemuni oqo moni kauta na nomuni kilaka, vakasotari vata kei na ivakadinadina ni vei gauna, ka lako ena kaulotu.
Kemuni na taciqu kei na ganequ lomani, na noqu vakanananu nikua e koto ena vakasokumuni kei Isireli, na ka e vakatoka o Peresitedi Russell M. Nelson “sa ka bibi duadua e yaco tiko e vuravura nikua. E sega ni vakatauvatani rawa na kena cecere, e sega ni vakatauvatani rawa na kena bibi, ka sega ni vakatauvatani rawa na kena lagilagi”1
Na vakasokumuni e kila cecere ni “sa ka talei ena mata ni Kalou na tamata kecega.”2 E rawarawa sara me vaka oya. Eda vakasoqoni ira na luve ni Kalou ena iotioti ni siga oqo me rawa ni “sovaraki e uludra na veivakalougatataki lelevu ka cecere”3 kei na iyalayala ni “iyau ni gauna tawamudu.”4 E muria me sokomuni o Isireli eda na gadreva na daukaulotu—lewe vuqa mai vei ira sa veiqaravi tiko.5 Nikua au na vosa tiko vei ira na lewe vuqa na qase matua ni Lotu ka rawa ni veiqaravi vakadaukaulotu. Na Turaga e gadrevi iko. Keitou gadrevi iko mai Niu Ioka, Chicago, Ositerelia kei Aferika, Thailand kei Mexico, kei na veivanua kece ena kedra maliwa.
Meu na kauti kemuni mada kina yabaki 2015. Au se qai kacivi vou meu lewe ni Kuoramu ni Apositolo Le Tinikarua. E dua vei ira na itavi totoka ni keimami qarava vaka Apositolo me lesi ira na daukaulotu kina nodra vanua ni veiqaravi. Au dau vakaitavi ena iwalewale oqo me vaka e dua na Vitusagavulu,6 ia oqo, me vaka e dua na Apositolo, au vakila taucoko na bibi ni ilesilesi. Au tekivuna ena masumasu tuvani ira na elda kei na sisita gone, yadudua, ena tabana ni kaulotu e veiyasai vuravura. Au qai qarava yani na veiwatini qase. E tiko kina e lewe 10. E sega ni levu sara. E vakidacala vei au, au tarogi noqu itokani mai na tabacakacaka ni Kaulotu, “E vica eda gadreva ena macawa oqo me vakatawana na levu ni gagadre e tiko?”
A sauma mai, “300.”
Na gauna bibi oya e dau tiko voli ga vei au: 10 na veiwatini kina 300 na kerekere.
Sa vakauqeti keda o Peresitedi Russell M. Nelson “mera tekiduru na veiwatini ka taroga na Tamada Vakalomalagi ke sa kena gauna mera lako vata yani i kaulotu.”7 E kaya o koya mai na veika kece meda vakadonui kina, “na gagadre ni veiqaravi sai koya e bibi duadua.”8
Me vaka e kaya na ivolanikalou, “Kevaka dou gadreva mo dou qarava na Kalou dou sa lesi kina cakacaka.”9 Na cakacaka oya sa baleta na lawa ni tatamusuki. Eda wilika ena Joni, “Me reki vata ko koya sa kaburaka kei koya sa tamusuka.”10
Au sa raica ni sa vakayacori na lawa ni tatamusuki ena noqu matavuvale.
Vica na yabaki sa oti, au veisiko kina so na lewe ni matavuvale, ka kerei au na Bisopi meu tinia na soqoni ni sakaramede.11 Ena noqu gole sobu mai na itutu, a torovi au mai e dua na marama vata kei na vitu na luvena ka vakatakilai koya me o Sisita Rebecca Guzman.
E taroga o koya, “Elder Rasband, iko kilai Rulon kei Verda Rasband?”
E waqa na mataqu au sauma lesu, “O rau na noqu itubutubu.”
Sa rawa nio raica na vanua e mua kina na ka oqo. Ena nona veivakadonui o Rebecca, ka tiko eke ena Vale ni Koniferedi kei na nona matavuvale, meu wasea na italanoa ni nona matavuvale.12
Na noqu itubutubu, Elder Rulon kei Sister Verda Rasband, e rau veiqaravi taumada vaka veiwatini qase ena Tabana ni Kaulotu e Fort Lauderdale Florida.13 Erau veivakavulici wavoki tiko ka ena veidusimaki vakalou erau a lai tukituki ena katuba ni vale nei Rebecca. E goneyalewa okoya ka taleitaka vakalevu me vakarorogo kina nodratou ivakatagi na Osmonds, vakabibi, na noqu itokani o Donny—ka tiko talega nikua.14 Ni dau vakarorogo kina nodra veitarogi ena kakaburaki ka vulica nio ratou lewe ni Lotu i Jisu Karisito ni Yalododonu Edaidai. E vakila okoya ni duidui o iratou, ka nanuma ni baleta beka na nodratou lotu, e tauri Rebecca e rua na yabaki na nona vakadikeva na vakabauta ni Lotu ena valenivola e koronivuli. Ia, ni tukituki yani na veiwatini rairai vinaka ena katuba ni nona vale ka vakatakilai rau me daukaulotu ni Yalododonu Edaidai, e kidacala sara.
“A tukuna o tinaqu meu kauti rau tani,” a vola e muri o Rebecca, “ia na lomaqu e tukuna, ‘Sega.’ Au raica na matadrau, ka vakila na veitokoni kei na loloma. Na vakanananu e dau kauta mai na wainimata i mataqu ka yavalata vakatitobu na lomaqu.”15
A sureti rau iloma o Rebecca, ka wasea o rau na noqu itubutubu daukaulotu na itukutuku vata kei koya, rua na tacina gone, kei, dina ni a saqata, o tinana talega.
E vakamacalataka o Rebecca vei au, E dau totoka o rau na nomu itubutubu ni vakamacalataki e dua na taro e tu vei keitou.” Au se rawa ni raica na matadrau me vaka na rarama e vakavolivoliti rau. Keitou dau mokoti tinamu ena gauna e dau biubiu kina, ka dau cakava okoya dau vakacegu ka rokovi o tinaqu. E dau tiko na serau ena matai tamamu ni dau vakavulica okoya me baleti Jisu Karisito. E dau tovolea me okati tamaqu ki na veiwasei ka mani rawati koya. Na tamaqu e dau vakasaqa ena mataisoqosoqo ni tikotiko ka tekivu me vakasaqara na kedrau vakayakavi na nomu itubutubu, ka dau cakava talega na ka taleitaki nei tamamu, key lime pie.”16
Na gauna o Elda kei Sisita Rasband a kerei Rebecca kei na nona matavuvale me wilika na iVola i Momani, o Rebecca e cakava ena loma ni lima na siga E vinakata okoya me papitaiso vakatotolo, ia na vo ni nona matavuvale era se sebera tu ni vakarau. Ni oti e va na vula, e cikeva okoya me papitaiso ka sema kina Lotu dina. E nanuma lesu okoya, “Na veitiki kece ni yaloqu e kila ni dina.”17 Ena ika 5 ni Epereli, 1979, erau a papitaisotaki o Rebecca yabaki 19, tinana, kei rua na tacina yalewa na daukaulotu. Na tamaqu a dua na vakadinadina.
Na gauna au sotavi Rebecca kei na nona matavuvale ena lotu, keitou taba vata kei nona matavuvale. Au kauta ivale vei tinaqu, ka taura matua okoya i utona. Ka qai tukuna okoya vei au, “Ronnie, oqo e dua na siga marautaki ni noqu bula.”
Na kena isau mai vei tinaqu e vakavuna na taro vei ira na noda qase, “Na cava o cakava tiko ena gauna oqo ni nomu bula?” E vuqa sara na sala e rawa ni cakava na daukaulotu qase ka sega tale ni dua e rawata. O dua na kaukauwa vakasakiti ni vinaka, vakabulabulataki ena Lotu, ka tu vakarau me vakayaloqaqataka ka vueti ira na luve ni Kalou.
Eso beka veikemuni na vakasamataka, “Ia ena vakacava beka nida biut ira tu mai na makubuda? Eda na calata na veika ni matavuvale, siganisucu, itokani, vaka talega kina na manumanu mareqeti.” Kevaka au tarogi tinaqu na cava na vuna e rau lako kina kei Tamaqu ena kaulotu, au kila ni na tukuna okoya, “Sa tiko na makubuqu. Au vinakata mera kila nio tamamu kei au a veiqaravi ena were ni kaulotu, keirau via biuta e dua na ivakaraitaki vei ira na neirau kawa, ka keirau vakalougataki, vakalougatataki dina.”
Ni au sikova na tabana ni kaulotu e veiyasai vuravura, au dau raica na veiqaravi totoka ni vuqa na noda daukaulotu qase. E matata ni ra cakava tiko na “nona inaki na Turaga” ka kitaka na “cakacaka ni Turaga.”18
Vei ira eso, keitou nuitaka ni udolu vei kemuni, na veiqaravi tudei vakadaukaulotu ena dua na yasai vuravura ena timo ena vanua donu.19 Vei ira tale eso, na kaulotu mo veiqaravi ena Lotu e vale e rawa ni vinaka cake. Me baleta na ituvaki ni bula kei na veituvaki eso, e tiko o ira era sega ni rawa ni veiqaravi. Keitou kila na veituvaki vakaoqo, ka sa noqu inuinui ni rawa ni vaqara na sala me tokoni ira ka sa veiqaravi tiko. Vakamuria na ivakasala ni parofita ka masulaka mo kila na cava e vinakata na Turaga mo cakava.
Na veiwere ni kaulotu era kerea tiko na nomuni veivukei. E tukuna o Peresitedi Nelson me baleti ira na noda daukaulotu qase, “Era sa gone vakayalo, vuku, ka tu vakarau mera cakacaka.”20
Ena were, sa tu vei iko e dua na madigi vinaka: mo veiqaravi ena valenivolavola ni kaulotu se valetabu, vaqaqacotaki ira na daukaulotu gone, vaqaqacotaki ira na tabana lalai, cakacaka ena valenivolavola ni TuvaKawa se ena veivanua makawa, vakatavulica na inisitute, vakarautaka na veiqaravi ni veivuke raraba, cakacakavata kei ira na itabagone qase cake, veivuke ena valenivolavola ni cakacaka se ena veiteitei ni Lotu. Na matailalai ni sala mo veiqaravi kina, na cava e ganiti iko, vanua cava o gadrevi kina, ka mo vakarau vakacava sa tiko ena mataveilawa “Senior Missionary.”21 Sa rawa mo veivosakitaka talega vei nomu bisopi se peresitedi ni tabana.
Au sa kaciva e vuqa na veiwatini mera kaulotu ka raica ni sa vakasinaiti na kedra irairai na Rarama kei Karisito.22 Ena nodra lesu mai era vakamacalataka nira toro voleka vua na Turaga vaka kina vei ira, vakila na Yalo ni Turaga e sovaraki vei ira, kei na kila nira cakava tiko e dua na veisau.23 O cei ena sega ni vinakata oya?
Na kaulotu e rawa ni iwase levu ni nomudrau bula vakaveiwatini. E dua na ulutaga e rawa ni “Gadrevi Au Ko Jisu.”24 O na sega beka ni matau kina; ia, na kaukauwa ni Yalotabu ena vukei iko mo vakila nio sa tiko donu ivale.
Noqu itubutubu kei na tini vakaudolu na veiwatini daukaulotu era sa veiqaravi oti era wasea na nodra ivakadinadina baleta na marau era kunea ena cakacaka ni daukaulotu. Sa tukuna na Turaga ena ivolanikalou ni gauna oqo, “Ia kevaka sa yaco mo drau cakacaka tiko ena nomudrau bula taucoko ena vunautaki ni veivutuni vei ira na tamata oqo, ka kauta mai e dua mada ga na yalo kivei au, sa na vuabale sara na nomudrau marau vata kei koya ena matanitu i Tamaqu!”25
E serekalitaka o Aisea na kena ibalebale me veiqaravi ena “were” ni kaulotu. Na ivolanikalou e tukuna vei keda “na were ko vuravura.”26 Na parofita vakasakiti ni gauna makawa oqo e vola, “Ni dou na marau, ni dou sa lako yani; ka vakacegu, ni dou sa tuberi yani; na veiulu-ni-vanua kei na veiulu-ni-koro ena lagata na sere e matamudou, ia na kau kecega ni vanua ena ia na vakasausau.”27 Na ulunivanua, delana, vanua, kei na vunikau e rawa ni vakatauvatani me ira na peresitedi ni kaulotu, bisopi, liuliu ni tikina, lewenilotu, kei ira era vakasaqara na dina ia “nira sa sega ni kila na vanua mera vakasaqara kina.”28 Era na vakadinadinataka nio ira na daukaulotu qase era veisautaka na kedra ituvaki ena nodra ivakadinadina ni iVakabula kei na Dauveivueti, Jisu Karisito.
Me vaka niu Apositolo ni Turaga o Jisu Karisito, au kerea vei kemuni moni veiqaravi vakadaukaulotu ena sokomuni mai kei Isireli ka rairai veiqaravi tale. Keitou gadrevi iko—keitou gadrevi iko. Keitou sa vakavinavinaka vei kemuni na qase na bula ni sa liutaka kei na ivakaraitaki ena nomuni vale, tabanalevu kei na iteki. Au sureti kemuni oqo mo ni kauta na nomuni kila-ka, vakasotari vata kei na ivakadinadina ni vei gauna, ka lako ena kaulotu. Sa noqu masu ni gauna tarava au na dabe meu lesi ira na veiwatini qase, ena tiko e drau vei kemuni na waraka tu ena nuidei na nomuni ilesilesi.
Au yalataka talega ena nomu veiqaravi, ona vakila na loloma ni Turaga ena nomu bula, ona kilai Koya, ena kilai iko o Koya, kei “na vuabale na nomudrau marau.”29 Na nomu veiqaravi vakatabui ki vei Jisu Karisito ena vakauqeta ka vakalougatataki ira na nomu matavuvale, na makubumu, kei na makubumu vakarua. “Me vakalevutaki na yalololoma, kei na vakacegu”30 ena nomuni bula ni veiyabaki sa tu mai. Au yalataka. Ena yacai Jisu Karisito, emeni.