iVakatakilakila ni Marau

Ena noqu a vuka tiko vakabisinisi ena vica na yabaki sa oti, au kunea niu dabe toka ena yasai dua na turaga mai na Necaladi. Au maqusa sara meu sikovi koya baleta niu a veiqaravi e Belgium kei na Necaladi vakadaukaulotu gone.

Ni keirau sa mai veikilai, a solia mai na nona kadi ni bisinisi nona vakaraitaka ni nona itutu vakacakacaka na “parofesa ni marau.”  Au vosa sara ena nona cakacaka totoka au tarogi koya sara se cava e dau cakava e dua na parofesa ni marau. Tukuna o koya ni dau vakavulici ira na tamata ena sala mera rawata kina na bula marau ena nodra tauyavutaka na veiwekani vakaibalebale ka vaka lalawa. Au sauma lesu, “Totoka dina qori, ia vakacava ke o vakavulica talega na sala e rawa ni tomani kina na veiwekani oya kina taudauku ni bulubulu ka sauma na veitaro eso ni yaloda, me vaka na inaki ni bula, e rawa vakacava meda vorata na noda malumalumu, kei na vanua eda na lako kina nida sa mate?” A vakatusa o koya ni na totoka kevaka e tiko vei keda na isaunitaro kina vei taro vakaoqo, ka ni marau vei au meu wasea vua na veika eda dau vakayacora.

Nikua, au via railesuva e vica na ivakavuvuli yaga ni marau dina e dau levea e lewelevu ena vuravura veilecayaki oqo, na vuravura e levu kina na veika e taleitaki ia e vica ga e bibi dina.

A vakavulica na tamata o Alama ena nona gauna, “Raica, au kaya vei kemuni ena yaco vakaidina e vuqa na veika; ka raica, e dua ga na ka sa uasivi duadua vei ira kece oqo—ia raica, sa sega ni yawa na gauna ka ni bula na Dauveivueti ena lako mai ena kedra maliwa na nona tamata.”¹

Na ivakaro oqo e bibi vakatautauvata vei keda nikua nida nanamaki ka vakavakarau kina iKarua ni Lesu mai ni Karisito!

O koya gona, na imatai ni noqu vakadidike sa ikoya na taraicake ni yavu i Jisu Karisito esa ka yaga kina noda marau. Oqo e dua na yavudei, “kevaka sa tara cake na tamata ena yavu oqo, ena sega sara ni bale rawa.”² Ni caka vakakina e vakarautaki keda kina bolebole ni bula, se mani vakacava sara.

Ena vica na yabaki sa oti, au gole kei luvequtagane o Justin kina dua na keba ni Scout ena vulaikatakata. Ni caka tiko na itaviqaravi, a tukuna ena marau o koya nio koya kei iratou na nona icaba e ratou vinakata me ratou rawata na beji yaga ni dakaititi. Me rawati e gadrevi vei iratou me ratou pasitaka e dua na veitarogi volai ka me lauta e dua na takete na nodratou gasau ni dakaititi.

E luvuci na lomaqu. Ena gauna oya, e malumalumu voli o Justin ena vuku ni cystic fibrosis, e dua na mate a tauvi koya tiko mai na gauna a sucu kina. Au yalotarotarotaka kevaka ena rawa ni dreta vakayawa sara i muri na dakaititi me rawa ni vakauta na gasau kina takete.

Ni gole o koya kei iratou na nona itokani kina kalasi ni dakaititi, au masu lo ni na sega ni vakamaduataki o koya ena veika ena sotava. Ni oti e vica na auwa ni lomaleqa, au raici koya ni sa gole cake tiko mai ena mata mamarau. “Ta!” a kaya o koya. “Au sa rawata na beji ni cakacaka yaga! Au a vana e dua kina loma ni takete; e lauta na takete ka tarava na noqu, ia lauta na loma ni takete na noqu!” A dreta i muri o koya na dakaititi ena nona kaukauwa taucoko ka laiva na gasau me vuka, ka sega ni lewa rawa na vanua e vuka kina. Sa dua na ka na noqu vakavinavinaka vei koya na dauveivakatavulici ni dakaititi, ni sega ni tukuna, “Vosota, takete cala!” Ia, ena nona raica ni vakaiyalayala na kaukauwa nei Justin kei na nona sasaga dina, a sauma ena yalovinaka, “Totoka saraga!”

Oya na sala talega vei keda kevaka eda cakava na noda vinaka taucoko me da muri Karisito kina kei ira na Nona parofita dina ga ni vakaiyalayala tu. Kevaka eda lako mai vei Koya ena noda maroroya na veiyalayalati ka veivutunitaka na noda ivalavala ca, eda na rogoca ena marau ni vakacaucautaki keda na iVakabula: “E vinaka, a tamata vinaka ka dina.”³

Au wasea na noqu ivakadinadina ni sa vakalou na iVakabula ni vuravura kei na Nona loloma veivueti kei na kaukauwa me veivakabulai, veivakaukauwataki, ka laveti keda ena gauna eda sasaga kina vakaidina meda lako Vua. Me kena veibasai, e sega ni rawa nida toso kei na ilawalawa ka toso tale tikoga vei Jisu. Na iVakabula sa vakadrukai mate, tauvimate, kei na ivalavalaca ka sa vakarautaka e dua na sala me vinaka sara kevaka eda muri Koya mai na vu ni yaloda taucoko sara.⁴

Na ikarua ni noqu vakadidike ka bibi kina noda marau sa ikoya na noda nanuma ni da sa luvena tagane ka luvena yalewa na Tamada Vakalomalagi dauloloma. Na kilai kei na nuitaki ni dina oqo e veisautaka na veika kece.

Ena vuqa na yabaki sa oti, ena dua na noqu a vuka lesu i vale mai na dua na ileslesi ni Lotu, keirau a dabe toka kei Sister Sabin e dakuna e dua na turaga levu, e dua na mata cudrucudru a samuqawe taki tu ena dakuni nona qavokavoka pori ka vaka talega kina na naba 439.

Ni keitou kele, au tukuna, “Vosoti au, saka. O sega beka ni kauwai kevaka au taroga na bibi ni naba e samuqawe tu ena ulumu e muri?” Au sega ni via taroga me baleta na mata cudrucudru.

A tukuna o koya, “Qori o au. Qori o cei o au. Au taukena na vanua qori: 219!”

Vanadrau tolusagavulukaciwa naba ka vakasamataka tiko, au kurabui ni cala okoya ni sa rui bibi vei koya.

Au mai vakananuma ni dua na ka vakaloloma vua na tamata oqo kei na nona yalo ni dokai koya ni sa lei veikilaitaki koya yavutaki ena dua na naba ni ilawalawa. Au vakasamataka: na tamata rairai kaukauwa oqo ena dua na gauna e cauravou lailai e gadreva tu ga me vakila ni bibi ka kilai. Kevaka walega me kila se o cei dina o koya se e nei cei, ka nida sa “voli ena dua na isau.”⁵

E dua na vosa ni vuku e tiko ena sere ni iyaloyalo The Prince of Egypt ka tukuna, “Raica nomu bula mai na mata vakalomalagi.”⁶ Me vaka na kila nida kawa vakalou kei na rawaka tawamudu e lutu sobu yani kina vuni yaloda, eda na rawa ni raica na bula me vaka inaki, ilakolako meda vuli ka tubu mai kina, me vaka nida “sa raica me vaka na titiro e nai iloilo buawawa,”⁷ me dua na gauna lekaleka.

Na ikatolu ni ivakatakilakila ni marau meda dau nanuma sa ikoya na bibi ni dua na yalo. Eda cakava oqo nida vakamuria vakavinaka na ivakasala ni iVakabula “mo dou veilomani, me vaka au sa lomani kemudou.”⁸

E vakatavulica talega o Koya, “Ni kemuni a cakava vua e dua sa lailai vei ira na wekaqu oqo, ni a cakava vei au.”⁹

Na vola ni Vakaibaleba e veivakasalataki vakavuku, “Mo kakua ni bureitaka na ka vinaka vei ira e dodonu me nodra, ni sa rawa vei iko mo cakava.”¹⁰

Eda na sega ni veivutunitaka nida yalovinaka. Ena mata ni Kalou, na yalovinaka e tautauvata kei na cecere. Na tiki ni yalovinaka sa ikoya meda dau veivosoti ka kakua ni vakalelewa.

Ena vica na yabaki sa oti keitou a gole vaka matavuvale me keitou lai sarava e dua na iyaloyalo me tiki ni neitou lotu vakavuvale. Keitou tiko kece ena motoka vakavo ga e dua na neirau gonetagane kei na watiqu, o Valerie. Sa buto mai, ena gauna a dolava kina na neirau gonetagane na katuba me cici mai kina motoka, a caqeta vakacalaka na ka a nanuma o koya ni neitou vusi ka toka ena varada. E ka ni rarawa vei luvei keirau kei na watiqu, ka muri koya voli mai, ni sega ni neitou vusi ia e a dua na skunk a sega saraga ni marau, ka vakaraitaka vei rau! Keitou lesu kece tale ivale, ka rau sili ka savata na uludrau ena wai ni tomata, na ka e dau nanumi me iwali dina ni kena kau laivi na iboi ni skunk. Mai na gauna e rau savata ka veisautaka kina na nodrau isulu, keitou sega ni vakila tu na duidui ni boi, ka keitou vakatulewataka ni donu me keitou sa lako kina yaloyalo. 

Ni keitou dabe e muri ena valeniyaloyalo, era lako yadudua na tamata era dabe wavoliti keitou toka mera lai voli popcorn. Ni lesu mai, a sega ni dua e mai dabe tale ena nona idabedabe taumada.

Keitou dau veidredrevaki ni keitou nanuma lesu na veika sotavi oya, ia vakacava beka kevaka e tiko na iboi ni noda ivalavalaca kece? Vakacava kevaka e rawa vei keda meda boica na lawaki, na garo, na kocokoco, se dokadoka? Ni vakatakilai na noda malumalumu, eda nuitaka nida na dau veikauwaitaki ka qarauna vakalevu cake na tani, ka vakakina, o ira talega vei keda nida vakayacora na veisau e gadrevi ena noda bula. Au taleitaka na boi ni tavako e valenilotu, baleta e vakaraitaka ni dua e sasaga tiko me veisau. Era gadreva na ligada ni veiciqomi me mokoti ira.

A kaya vakayalomatua o Peresitedi Russell M. Nelson, “E dua na sala rawarawa duadua me kilai kina e dua ka muri Jisu Karisito dina sa ikoya na ivalavala ni nona qaravi ira na tani ena yalololoma.”¹¹

A vola o Paula vei iratou na Efeso, “Ia dou veilomani vakai kemudou, dou lomavinaka, dou kakua ni veicudruvi, me vaka sa sega talega ni cudruvi kemudou na Kalou e na vuku i Karisito.”¹²

Nida tisaipeli i Jisu Karisito, eda kerei meda nuitaka na Tamada Vakalomalagi kei na iVakabula ka kakua ni tovolea meda sosomitaki Rau. E kila o Jisu Karisito na nodra malumalumu vakavinaka cake ka na lewai ira vakavinaka sara.

Na ikava ni ivakatakilakila ni marau sa ikoya me da taura matua e dua na rai e tawamudu. Na tuvatuva ni Tamada e tete yani kina tawamudu, e rawarawa meda vakanamata kina gauna oqo ka guilecava na veika ni oti qo.

Au vulica ena lesoni kaukauwa oqo ena vica na yabaki sa oti ni se yabaki 16 kina na luvei keirau yalewa, o Jennifer. Sa vakarau me veisau ruarua na nona yatevuso, ena kau laivi vakadua kina na lima na ivau ni yatevuso ka vakaisosomitaki mai na rua na ivau lailai bulabula, ka rau solia e rua na itokani vaKarisito vakasakiti. Oqo e dua na iwalewale bibi sara, ia ena bogi ni bera na nona veisele, a voleka sara ni vunau vei au ena kena bibi taucoko vaka 90 na paodi o Jennifer, ka kaya, “Kakua ni leqa, Ta! Ni mataka au na yadra mai kei rua na yatevuso vou, se au na yadra ena dua na vanua vinaka sara. Na sala cava ga vei rau e sa na cecere.” Oya na vakabauta, oya na rai e tawamudu! Na raici ni bula mai na vanua ni tawamudu e vakarautaka na matata, vakacegu, doudou kei na inuinui.

Ni yaco mai na siga sa waraki dede tiko mai me kau laivi na paipo ni cegu ka bokoci na misini ka vukei Jennifer tiko me cegu, keitou a wawa ena lomaleqa me laurai kevaka ena cakacaka na rua na ivau lailai. Na gauna sa taura kina na imatai ni nona icegu, sa tekivu me tagi o koya. Ni raica na neitou lomaleqa, a kailavaka vakatotolo sara mai, “Sa dua dina na ka vinaka ni sa rawa na cegu.” 

Mai na siga oya, au dau vakavinavinaka vua na Tamada Vakalomalagi ena veimataka kei na veibogi ena noqu rawa ni cegu. Eda wavoliti tu ena veivakalougatataki sega ni wiliki rawa ka rawa nida vakawalena kevaka eda sega ni nanuma. Me kena veibasai, ni sega ni namaki e dua na ka kei na veika kece e vakavinavinakataki, sa yaco me veivakurabuitaki na bula.

A tukuna o Peresitedi Nelson: “Na veimataka kece e isolisoli mai vua na Kalou. Na cagi eda ceguva e sa dinau ni loloma mai vei Koya. E mororoi keda e veisiga ka tokoni keda mai na dua na gauna kina dua tale. O koya gona, na imatai ni noda cakacaka vakaturaga ni mataka me sa dua na masu ena yalomalumu ni vakavinavinaka.”¹³

E kauti au kina ikalima ka icavacava ni noqu vakadidike, oqori na nomu na sega ni marau vakalevu cake mai na nomu vakavinavinaka.

E vakarota na Turaga, “Ia ko koya sa vakavinavinakataka na ka kecega sa soli vua ena vakalagilagi.”¹⁴ E baleta beka ni vakavinavinaka e sucu mai kina e vuqa tale na vei valavala dodonu.

Na sala ena veisau kina na noda kila kevaka eda yadra ena veimataka eda yadra vata kei na veivakalougatataki eda a vakavinavinakataka ena bogi sa oti. Na noda sega ni vakavinavinakataka na noda veivakalougatataki e rawa ni yaco me da vakila ni da sega ni vakacegui, ka rawa ni butakoca na reki kei na marau ka kauta mai na vakavinavinaka. O ira na tiko ena vale levu ka vakaitamera e rawa nira temaki keda meda rai sivita na maka, ka calata kina vakadua na maka.

Na ka dina, na marau levu duadua kei na veivakalougatataki ni bula oqo ena kunei mai vei koya e sa yaco me da vakataka ena loloma soli wale ni Kalou nida vakayacora ka maroroya na veiyalayalati tabu vata kei Koya. Na noda iVakabula ena qusia ka vakasavasavataki keda ena cakacaka ni Nona isoro ni veisorovaki ka sa tukuna vei ira era dau muri Koya ena lomasoli, “Ka ra na noqu ena siga au sa lako mai kina me’u kumuna na noqu iyau talei.”¹⁵

Au yalataka vei kemuni ni kevaka oni tara cake na nomuni bula ena yavu i Jisu Karisito; vakamareqeta na keda ivakatakilakila dina ni luvenatagane ka luvenayalewa na Kalou; nanuma na bibi ni yalo ni tamata; taura matua e dua na rai e tawamudu; ka vakavinavinakataka na levu ni veivakalougatataki, vakabibi na veisureti ni Karisito me da lako Vua, eda na rawa ni kunea na marau dina eda vakasaqara tiko ena ilakolako ni bula oqo. Ena tikoga na vei bolebole ni bula eso, ia e rawa ni da sotavi ira yadua ena inakinaki kei na vakacegu baleta na dina tawamudu eda kila ka bulataka tiko.

Au cavuta na noqu ivakadinadina ni bula dina tiko na Kalou, na Tamada dauloloma kei na Luvena Lomani, ko Jisu Karisito. Au vakadinadinataka talega na parofita bula, daurairai ka dauvakatakila. Sa dua na veivakalougatataki dina me ni da ciqoma na ivakasala ni lomalagi mai vei ira. E tukuna vakamatata na iVakabula, “Se mai na domoqu ga se mai na domodra na noqu tamata, e sa tautauvata ga.”¹⁶ Ena yaca tabu i Jisu Karisito, emeni.