Veivakauqeti ni Yalotabu

Koniferedi raraba ni Okotova 2023

Veivakauqeti ni Yalotabu

Mai vei Elder Gary E. Stevenson

Ena Kuoramu ni iApositolo Le Tinikarua

Na veitokani tudei ni Yalo Tabu sa dua na isolisoli cecere vakayalo era marautaka tiko na Yalododonu Edaidai.

Ai Vakamacala Taumada

Wale ga qo, era vakanamata tu na dauqito e vuravura kina Bilo ni FIFA e Vuravura ni Marama 2023 ka vakayacori mai Ositerelia kei Niu Siladi O ira na dauqito-cecere kei vuravura e matataka tiko mai e 200 na timi ni veimatanaitu mai na veiyasai vuravura e vakaraitaka na nodra kaukauwa, yalodina, taledi, kei na dauqito ena nodra veisivisivitaka na dokai cecere ni soka e vuravura.

Eda kurabuitaki ira na dauqito ena veimataqali qito ka eso tale na ivakavuvuli era rawata na ivakatagedegede cecere duadua ni nodra sasaga. Eda veitalanoataka na nodra taledi e soli-vaKalou se isolisoli. Oqo e okati ira na danisi, vakatasuasua, ivakatagi, droini, drama, fika, vakadidike, kei na vuqa tale. Na veitamata yadua e vakaraitaka na isolisoli-vaKalou ka qai vakasavasavataki ka vakavinakataki ena dua na bula taucoko ni cakacaka vakaukauwa, vuli kei na vakatovotovo. Na isolisoli-vaKalou e vakalougatataka na tamata.

Cakacakataki ni iSolisoli Vakayalo

Ni rai ena iloilo ni kosipeli, na Kalou e vakalougatataki ira na Luvena ena vuqa na isolisoli vakayalo, ka vakavuna me ra tamata vakalougatataki vakayalo. O ira na lewe ni Lotu ni veiyalayalati e soli vei ira na isolisoli ni Yalo, ka okati kina na solisoli ni ivakadinadina ni o Jisu Karisito me noda iVakabula, na isolisoli ni Yalo Tabu, na isolisoli ni vakabauta me veivakabula ka vakabulai, na isolisoli ni kila, na isolisoli ni ciqomi cakamana, na isolisoli ni vuku kei na kila ka.¹ E sureti keda na Turaga meda vakasaqara na isolisoli cecere, ia na isolisoli vakayalo. E solia na isolisoli vakayalo me vakalougatataki keda ka vakayagataka me vakalougatataki ira tale eso.

Ni lesu tale ki na noda vosa vakatautavata ni dauvakatasuasua, e ka bibi meda nanuma ni na isolisoli walega e sega ni cakava me dua na ivakavuvuli. E dina ga ni vakasakiti na taledi vakatamata, e yaco ena nodra vakatovotovo vakaukauwa ka gugumatua ka vakavinakataka me vakasakiti kina na dauvakatasuasua me ra yacova yani na nodra ivakatagedegede cecere duadua. Na isolisoli mada ga e ciqomi ka sega ni ologi e dau salavata kei na vosa rerevaki “e gadrevi me biuta vata.”

Ni vakatalega kina, Au sa dau raica e dua na sala ni vuli veimoiaki e lako vata kei na isolisoli vakayalo. Na cakacakataki ni isolisoli vakayalo e gadreva na cakacaka vakayalo. “E gadrevi na cakacaka vakayalo ke me tiko na veidusimaki ni Yalo Tabu e nomu bula. Na cakacaka oqo e okati kina na masumasu ena yalodina kei na vulici ni ivolanikalou. E okati talega kina na maroroi ni veiyalayalati kei na ivunau ni Kalou. E okati kina na vakayagataki ena bula kilikili na sakaramede e veimacawa.”³

Na cava na vua ni cakacakataki na isolisoli vakayalo? E okati kina na veivakauqeti mai na Yalo ka vukei keda ena noda sotava na veigagadre e veisiga ka vakaraitaka vei keda na veika meda cakava ka tukuna kei veivakalougatataki ni sautu kei na vakacegu. Ni keda vakarorogo ka cakava na veivakauqeti vakayalo oqo, na Yalo Tabu e vakalevutaka na noda igu kei na rawaka me sivita sara na veika eda rawa ni cakava vakai keda. Na veisolisoli vakayalo oqo e vukei keda ena veitiki kece ni noda bula.⁴

Na veitokani tudei ni Yalo Tabu sa dua na isolisoli cecere vakayalo era marautaka tiko na Yalododonu Edaidai.

E bibi vakacava na isolisoli oqo? E sauma o Peresitedi Russell M. Nelson vakamatata na taro oqo ni kaya ni “ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.”⁵

Me Sureti vakacava ka Kila na Veivakauqeti ni Yalotabu

Ena noqu cakacaka vakalotu, au sa kunea e dua na gagadre raraba mai vei keda kece me kila na sala me sureti ka kila na veivakauqeti ni Yalo Tabu. Na veivakauqeti ni Yalotabu e nona na tamata yadua ka yaco mai ena sala duidui eso. Ia, eda sa, kalougata ni tiko na vosa ni parofita, ni gauna makawa kei na gauna oqo, ka solia vei keda na vakasama yaga baleta na sala me ciqoma kina na veidusimaki ni Yalo.

Meu na wasea e va na ivakavuvuli veidusimaki ka rawa ni veivuke vei iko ena veisureti kei na kila na veivakauqeti ni Yalotabu.

Tu ena Veivanua Tabu

Na imatai meda tu ena veivanua tabu.⁶ Sa qai oti toka ga oqo na noqu vakaitavi ena dolavale ni Valetabu e Tokyo Japani. Na isau ni nodra a sureti o ira na dau vakau itukutuku kei ira na vulagi VIP me ra vakaitavi e sivia sara na veika e namaki. E drau era lewena na veivakasarasarataki ni valetabu oqo. Era tarai vakatitobu na vulagi ena totoka ni valetabu, ka oka kina na ivakarau kei na ivakaraitaki kei na isema titobu i Japani. Ia e a tarai ira vakalevu cake na vulagi ena nodra vakaraitaka na nodra doka ka rokova na kena vakamacalataki na cakacaka vakalotu ni qase eliu ena kena veirumu. Ia e vuqa na veivakauqeti ni yalo e veivakauqeti ni Yalo.

E na dua na gauna vata oya kei na dua na ivakailesilesi ni matanitu ena toqai tuga ena noqu vakasama. Ni oti e dua na gauna ni vakanananu vakanomodi ena rumu ni silesitieli, ena yalo malumu ka veitarai, a vakasolokakanataka e daligaqu, “Na cagi madaga au ceguva ena rumu oqo e vakilai ni duidui.” Au kila ni tovolea tiko okoya me vakamacalataka ni tiko na Yalo Tabu, ka, vakaidina, e dau tiko ena vanua tabu. Kevaka o nuitaka mo vakila na Yalotabu, tiko e na dua na vanua e rawarawa vua na Yalotabu me tiko kina.

Na noda valetabu kei na vale e sa vanua tabu duadua ka vakatabui. E rawa meda sureta ka kila na Yalo mai kea Na veivanua tabu tale eso e oka kina na valenisoqoni, vale ni semineri kei na inisitute, kei na veivanua ni tukutuku makawa ni Lotu kei na valenivolavola ni vulagi. Tu ena veivanua tabu.

Tu vata kei ira na Tamata Yalosavasava

iKarua, tu vata kei ira na tamata yalosavasava. Au na vakamacalataka na ikarua ni ivakavuvuli mai na dua tale na vakanananu.

Au na sega ni guilecava rawa na vakaitavi ena dua na soqoni e vakayacori ena vanua ni qito kilai levu. Vakavuqa, na vanua ni qito oqo e dau sinai vei ira na dausaraqito kosakosa ka dau kailavaki ira na nodra timi se vakacacani ira na nodra meca. Ia ena bogi oqo, sa duidui sara na draki. Na vanua ni qito sa vakatawana e udolu na tamata gone ka soqoni me doka ka vakananuma na bula ni Parofita Josefa Simici. Nodra vakarokoroko, rorogo malumu, vakavinavinaka, kei na yalo ni masumasu a vakasinaita na vanua ni qito vata kei na vakilai ni Yalo Tabu. Au rawa ni raica ena matadra. Sa ikoya na isolisoli ni Yalo Tabu ni cakacaka, vakadeitaka na ivakadinadina e wasei baleti Josefa Simici kei na Vakalesui Mai.

Sa sega ni rawa ni tarovi na Yalotabu me tiko ena vanua e soqoni kina na tamata yalosavasava. Kevaka o vinakata mo vakila na Yalotabu, tiko vata kei ira na tamata e rawa ni tiko vakarawarawa kina na Yalotabu. Sa kaya na Turaga ena sala vakaoqo, “Ena vanua eratou soqoni kina e lewe rua se lewe tolu ena yacaqu, au na tiko ena kedratou maliwa.”⁷ Vei ira na tamata gone, vakasamataka na nomuni soqoni ni tamata yalosavasava, kuoramu se kalasi, MST kei na semineri, itaviqaravi ena tabanalevu kei na iteki—io namatasere ni tabanalevu. Digitaka mo tiko vata kei na tamata ka gole ki na vanua e rawa ni kune kina na ivalavala dodonu. Vaqara na nomu kaukauwa ena lewelevu. Vaqara ira na itokani vinaka. Mo itokani vinaka. Veitokoni vakai kemudou ena vanua cava ga o tiko kina. Tu vata kei ira na tamata yalosavasava.

Vakadinadinataka na Dina Tabu

iKatolu, vakadinadinataka na dina tabu e veigauna o rawata. Na Dauveivakacegui e wasea vakavuqa na Domona na gauna keda vakadinadinataka ena domoda. Na Yalotabu e dau vakadinadina vua ka vosa vakakina vei koya ka vakarorogo.

Au nanuma lesu ena dua na gauna au vodo teksi me 45 na miniti ena siti o Niu Ioka. Sa dua na veitalanoa vinaka me baleta na kosiplei kei na driver ena gauna keirau gole kina na rara ni waqavuka, au saumi koya ka vakarau meu curu ituba. Ia qai vaksamataka niu sebera niu wasea na noqu ivakadinadina me baleta na veika au wasea. Cegu mada, Au wasea e dua na ivakadinadina lekaleka ka rawarawa, sureta na Yalotabu ka kauta mai na wainimata kina matai keirau.

Ena nomu vakasaqara ka taura na madigi mo wasea na nomu ivakadinadina vata kei eso tale, sa rawa mo bulia na gauna mo vakila na Yalotabu vakai iko.

Vakarorogo ki na Yalo Tabu

Na iotioti ni ivakavuvuli mo vakarorogo kina Yalo Tabu. E rawa ni noda itokani tudei, ia e vosa ena rorogo malua, vakanomodi. Na parofita o Ilaijia e kunea na domo ni Turaga ni sega ni tiko ena cagi, na uneune, se na bukawaqa—ia e “dua na domo lailai e vinaka.”⁸ E “sa sega ni domo ni kurukuru” ia sa “domo rogo lailai sara ka malumu, vinaka sara me vaka na vakasolokakana,” ka rawa me “lau basikata sara na yalodra.”⁹

E kaya o Peresitedi Boyd K. Packer: “Na Yalo ena sega ni taura na noda vakasama ena kaila se kuretaki keda ena liga bibi. Ia e vakasolokakana. E kauwai sara vakamalua ni kevaka e osooso na noda vakasama keda na sega sara ga ni vakila.”¹⁰ Au dau raica ni so na gauna na Domona e dau rogo malumu, se me dau osooso na noqu vakasama, ena dau veivakananumi kevei au edua au dau lomana. E vuqa na gauna e dau lako mai na veivakauqeti ni Yalo Tabu mai vei watiqu, o Lesa. iTubutubu yalodina se iliuliu sa rawa ni ciqoma na veitokoni veivakauqeti vei iko.

Na rorogo, kosakosa, kei na veileti kilai ena vuravura e rawa ni vakamalumalutaka na veivakauqeti lailai, vakanomodi ni Yalo Tabu. Vaqara na vanua vakanomodi, vanua tabu me rawa ni vakasaqara ka ciqoma na veidusimaki ni Yalo.

Eso na Vosa me Nanumi

Ena nomu vakasamataka na ivakavuvuli oqo ni sureta ka kila na Yalotabu, vakasamataka mada na veivosa ni veidusimaki qaqarauni oqo.¹¹

Vakadeitaka na nomu veivakauqeti vakayalo. Me ivakaraitaki, na veivakauqeti mai na Yalo ena sala vata kei na ivolanikalou kei na ivakavuvuli ni parofita bula.

Mo vakadeitaka ni yalo o ciqoma e tautauvata kei na nomu ilesilesi. Vakavo ke o kacivi mai na lewa dodonu, na veivakauqeti mai na Yalotabu sa sega ni soli vei iko mo vakasalataka se vakadodonutaki ira na tani.

Na veika vakayalo e sega ni rawa ni vakasaurarataki. Sa rawa mo bucina e dua na ivakarau kei na vanua me sureta kina na Yalotabu, ka rawa vei iko mo vakarautaki iko, ia e sega ni rawa mo lewa na sala se na gauna me lako mai kina na veivakauqeti. Mo dauvosota ka nuitaka ni ko na ciqomi na veika o gadreva ena gauna donu.

Vakayagataka na nomu lewa vinaka. Eso na gauna eda sa vinakataka na Yalotabu me liutaki keda ena veika kece ga. Ia, vakavuqa na Turaga e dau vinakata meda vakayagataka na noda vuku soli va-Kalou ka cakacaka ena sala e salavata kei na noda kila ka vinaka duadua. E vakavulica o Elder Dallin H. Oaks:

“Na gagadre meda liutaki mai vua na Turaga sa dua na kaukauwa, ia e dodonu me salavata kei na kila ni Tamada Vakalomalagi e dau laiva e vuqa na vakatulewa ki na noda digidigi yadua. … Na tamata e tovolea me vagolea vua na Turaga na vakatulewa kecega ka kerea na ivakatakila ena vei digidigi kece ena kunea ni veituvaki eso era masuta me ira dusimaki kina ka sega ni ciqoma.

“”E dodonu meda vakasamataka vakavinaka e noda vakasama. Meda qai masuta na veidusimaki ka cakacakataka. Kevaka eda sa sega ni ciqoma na veidusimaki, e dodonu meda na vakatulewa vakadodonu sara.”¹²

Vakacavara ena dua na Veisureti

Me kena itinitini, na Yalododonu Edaidai e dodonu me tamata vaka-isolisoli, ka dau maroroi veiyalayalati. Ia, e tiko vei keda e veisiga meda vakasaqara ka cakacakataka na noda isolisoli vakayalo ka qai sureta ka vulica me kila na veivakauqeti ni Yalotabu. E va na ivakavuvuli veidusimaki me vukei keda ena noda sasaga vakayalo bibi na:

Tu ena vanua tabu.
Tu vata kei ira na tamata yalosavasava.
Vakadinadinataka na dina tabu.
Vakarorogo kina Yalo Tabu.

Na nomu rawa ni sureta ka kila na veivakauqeti ni Yalo ena vakatorocaketaka vakayadua na veikalawa ni dua na gauna. “Me yaco me veisemati cake sara kina vosa ni Yalotabu e vaka me vulici e dua tale na vosa. Oqo e dua na iwalewale ena taura toka na gauna ka gadrevi kina na sasaga, gugumatua na dauvosota.”¹³

Ni lesu tale ena vanua keda tekivu kina, yalovinaka daunanuma me vaka ni Yalododonu Edaidai ko sa vakalougatataki. Raitayaloyalotaka mada na ivakaraitaki ni Sigatabu ni lolo kilai vinaka, ka vakamacalataki vei au. A dua na gone lailai, e tu cake ena dabedabe, sega ni laurai vinaka e dela ni tutu ni vunau. O tamana e duri tu e yasana, me solia na veivakayaloqaqataki kei na veivuke ena vakasolokakana i daligana ena nona wasea ena veiuqeti, “Au luve ni Kalou.”

Na ivakadinadina tarava e lako mai vei dua na itabagone qasecake ka tekivu vata ena domo ni rere, “Au diva ke tu e dua me vakasolokakana ki daligaqu me vaka o ya.” Sa qai dua na nona vakasama ni veivakauqeti ka vakadinadinataka, “E sa vakasolokakanataka tiko e daligaqu e dua me vaka o ya—na Yalo Tabu!”

Au tinia ena dua na veisureti vakabibi vei kemuni na tagabone! E levu vei kemuni e tekivunataka na nomu siga ena nomuni tucake e mata ni iloilo. Mataka, na macawa oqo, na yabaki oqo, mo dau, tu vakadua ni o raici iko ena iloilo. Nio vakasamataka, se tukuna e cake kevaka o vinakata: “Wau, raici au mada! Au uasivi dina! Au luve ni Kalou! E kilai au! E lomani au! Au sa vaka-isolisoli—vakalougatataki vata kei na Yalo Tabu me noqui tokani tudei”

Au vakuria kina na noqu ivakadinadina vei kemuni, na Yalododonu Edaidai kalougata, ni Kalou na Tamada, Jisu Karisito, kei na Yalo Tabu, ka vakadinadinataki Ratou. Ena yacai Jisu Karisito, emeni.