MANATU MO AFIAFI FAALEAIGA

O nei manatu e mafai ona faaaoga mo aoaoga i le potuaoga faapea foi i le aiga. E mafai ona e fetuunaia nei manatu i lou aiga po o le vasega.

“Tagata Le Taualoa, Valaauga Taualoa” i. 8: Tuu atu i tagata o le aiga e faamatala mai se perofeta. O a vaaiga a le lalolagi i perofeta? Faitau leotele faamatalaga a Elder Heber C. Kimball, Enoka, ma Paulo. Faamatala atu o taitai o le Ekalesia o ni tagata le taualoa o e na valaauina e le Atua. Talanoaina auala e mafai ona faalelei atili ai lo tatou mulimuli i o tatou taitai e faaaoga ai parakalafa mulimuli e lima. Fai se meaalofa (meaai, ata, po o se kata) e avatu i se taitai o le Ekalesia i lo outou nuu e faaali atu ai lou agaga faafetai.

“Saili e Aoao e Ala i le Faatuatua” i. 16: Faaali atu ni nai fagu e eseese le lapopoa eseese foi gutu. Taumafai e togi i ai ni tupe po o ni lole. O fea o fagu ia o ni matatia sili ona faigofie? Fesili atu pe faapefea ona faatusa fagu taitasi i le naunautai o se tagata e aoao mai le Agaga. Matau ni faamatalaga mai lenei tala o loo faamatala mai ai auala aoga e aoao ai. Faatu se sini ia faaaoga nei aoaoga faavae.

“Afai e Lele sina Manu Itiiti i Lou Fofoga,” i. 32: Faaali atu se manu itiiti lava po o se ata o se manu itiiti. Fesili atu, “Faamata e te tausamiina lenei manu?” Talanoaina le aafiaga a le tusitala. Faamatala le tala o Iosefa i Aikupito ma le auala na ia “anuina ai i fafo” lona faaosoosoga.

“Faia o Mea Lelei i le Aso Sapati,” i. U8: Gaugau se laupepa ina ia maua ai ni faatafafa se valu. Talanoaina manatu taitasi mai le tala, ma ia tusiina e le aiga se ata mo manatu autu taitasi. Tuu atu i le aiga e faaopoopo isi gaoioiga o le aso Sapati i le isi itu o le pepa. Faaaoga nei manatu i le isi taimi e te manaomia ai se gaoioiga lelei mo le aso Sapati.

“Tele ma Tele o Ataata,” i. U12: Oti se pepa enaena i ni fasipepa uumi e faafoliga o ni fasi laau. A o e faitauina le tala, faaopoopo se fasi “laau” mo galuega alofa taitasi o loo lisiina ina ia faatulaga o se afi o se tolauapiga. Faamalamalama atu o fasi laau taitasi e faamumu tele ai le afi. Valaaulia tagata o le aiga e ave “laau” ma tusi ai auala e auauna atu ai i le faagasologa o le vaiaso e sosoo ai.