Ua Tauaaoina Nei e le Ekalesia ni Meatotino a Siaosi A. ma Bathsheba Samita

O loo taatitia i luga o se laulau, ni meatotino a Siaosi A. ma Bathsheba Wilson (Bigler) Samita ua fesootai ai se seneturi o talafaasolopito o le Ekalesia.

O mea taua—mai le faaputuga mata tioata a se Aposetolo e le mamao le malosi o lana vaai, e oo i ata e fatuina ai se talafaasolopito vaaia o le Ekalesia—e faailoa ai le agalelei o se tasi o ulugalii e sili ona taua o le Ekalesia.

O se Tusi a Mamona, pulou ma o latou teuga mo tamaitai, o se pulupulu mamanu felanulanuai, o se fu’a na gaosia lava i lima, o ni tusi ata se tele, tusi, ma se tusi o loo faamauina ai ata o se malaga i le Nuu Paia, o nisi nei o mea na faatumulia ai ni atigipusa na taliaina e Richard Oman, o le pule o le Falemataaga o Talafaasolopito ma Faatufugaga a le Ekalesia.

O Siaosi A., e pei ona iloa ai o ia, o se tagata na sili ona tuuto atu i le Ekalesia mai lava i lona papatisoga i le 1832 seia oo i lona maliu i le 1875. I le avea ai ma tausoga tuofe o le Perofeta o Iosefa Samita ma se tagata liliu mai naunautai, na ia saunoa ai, “Sa avea pea a’u ma uo a Iosefa; o ona fili, o o’u fili ia” (Preston Nibley, “Youngest Modern Apostle,” Church News, 1950–51, o se talaaga o Siaosi A. Samita na lolomiina auauai i vaiaso taitasi). Na malaga faatasi o ia ma le Tolauapiga a Siona i le 1834, ma na tuliesea faamalosi mai Misuri o ia faatasi ma ona matua a o gasegase i le 1838, ma o le 1840, na matua mai tigaina ai o ia ma na tau le mafai ona savali, ae na malaga pea o ia mo se misiona i Egelani.

Mulimuli ane na avea o ia ma se tagata lauiloa na faatagatanuuina aai ma na faaigoaina ia te ia St. George, Iuta, ma na avea foi ma Tusitalafaasolopito a le Ekalesia ma Fesoasoani Muamua i le Au Peresitene Sili.

O lona faletua o Bathsheba (e faaleoina BATH-sh-ba), na avea ma peresitene aoao lona fa o le Aualofa. Sa ia uunaia le lolomiga o le Woman’s Exponent ma sa ia saunoa malosi e faatatau i le aia a tamaitai e palota ai. O lona teuina lelei o tusi ata o paionia, ma ana atigipusa o lipine maanuminumi lanu mumu, paepae ma lanu moana, na faapea ona teuina ma le faamaoni mai faafiafiaga faamanatu o le lotoifale, ua faamatala mai ai lona auai ma le faamaoni i mea e tutupu faatasi ai ma lona alofa mo lona aiga.

Sa ia aoaoina mo augatupulaga e lima le taua o le tausia o faamaumauga o mea e tutupu, na taua ai e le teu faamaumauga o Christy Best. “Ou te vaai ia Bathsheba i le matafaioi o le faasaoina o talafaasolopito o aiga—i le matafaioi o le faasaoina o talafaasolopito o le Ekalesia.”

O le kopi a Bathsheba o le Tusi a Mamona, o le kopi lea na faitauina mulimuli e Ailama Samita a’o le’i Faamaturoina o ia; o le tulimanu o le itulau i le tusi a Eteru o loo liliu lava i lalo, e pei ona ta’ua i le Mataupu Faavae ma Feagaiga 135:4. Na faatauina mai e Elder Samita le tusi i Egelani, lea na lolomi ai, ma o loo tusia ai le faaiu o Bathsheba a’o le’i faaipoipo. Na feiloai o ia i a Bathsheba ma nofo ai i lona aiga i se misiona na malaga muamua ai i 1837. Sa i ai o ia ina ua papatiso Bathsheba i le 15 o ona tausaga, ma “na faia ai [e le alii e 20 tausaga] ni fuafuaga le mautinoa … i le faasaoina o i taua e le Silisili Ese, o le tolu tausaga mai lena taimi o le a ta faaipoipo ai.” I lena foi nofoaga na ia aoao atu ai se lauga e lua ma le afa itula i se taumafaiga ina ia umi atu [lana lauga] nai lo le au faasalavei sa malomaloa ai. (Tagai “Youngest Modern Apostle,” Church News, 1950–51.)

O le tolu tausaga mai lena taimi, na faasaoina ai i laua e le Silisili Ese a o nonofo ai i itu eseese o Atelani. I se tusi i se tasi o lona aiga, na tusia ai e le Aposetolo e le’i leva ona valaauina e faapea: “Ta’u atu ia Tuafafine Bathsheba, ou te le’i faagaloina lava ia… . Afai ua faaipoipo o ia, ou te ofo alofa atu ia ona maua le olioli tele, ae afai o loo nofo toatasi pea, ou te ofo alofa atu i ai ia ona maua le olioli tele pe a ma faatasi.”

Na toe foi atu o ia i le Iunaite Setete i le 1841, asiasi atu i ona matua, ona alu sa’o lea i le fale o Bigler. I le 10 o aso mulimuli ane, sa la faaipoipo ai ma Bathsheba i le aso 25 o Iulai.

I le 1844 sa i ai o ia i Michigan e talai le talalelei. O se tasi o mea sa i ai faatasi ma meatotino a Samita o se pepa o se faasalalauga mai lena taimi ma lena nofoaga, o le faalauiloaina o Iosefa Samita e avea ma peresitene o le Iunaite Setete ma o loo folafolaina ai le “faatemokalasi e pei ona faia e le faigamalo a Jefferson.” Ina ua mautala e uiga i le Maliufasia [o Iosefa Samita], na faanatinati atu loa Elder Samita i le fale. Sa la tutu faatasi ma Uiliata Risati e tetee atu i le sailia o le taui ma sui i le mea na tupu i Karefasi.

E ui lava i tiga ma faigata o Karefasi ma luitau o le malaga agai i sisifo na faapea ona sosoo ai, ae o Siaosi A. Samita o se tagata agamalie e pei ona taua e Uso Oman. “E le’i faigofie le olaga i tuaoi o laueleele ainā o le Iunaite Setete ma laueleele e le’i aināina faapea ma tulaga faaupufai, ae sa fiafia lava o ia. O lona igoa i le faaPiute o le ‘Tagata e Mafai Ona Aveesea Ia Lava’. Na malie le mafai ona ia saunoa i konafesi faalesiteki i aso vevela, ma tago aveese lona lauulu faapipii ae solo ai lona muaulu. E leai se ivi faamaualuga i lona tino.”

Ina ua mavae se soifuaga galue, na maliu Siaosi A. Samita i le 1875 ina ua 58 tausaga o lona soifua, ma tuua ai na o Bathsheba mo le isi 35 tausaga. Na matua faateia lona faletua i lona maliu; sa nofo o ia i ona talaane i le taimi na faalagolago atu ai [Siaosi] ia te ia ma manava lana manava mulimuli.

I tausaga mulimuli ane, na tumau le galue malosi o Bathsheba. Na auauna atu o ia i le aufono a le Deseret Hospital ma faia galuega i le Fale o Faaeega Paia ma malumalu ina ua faamaeaina. Sa avea o ia ma se vaega o le uluai Aualofa na faavaeina i le 1842 i Navu ma na valaauina o ia o se fesoasoani lua ia Zina D. H. Young a o avea o ia ma peresitene aoao o le Aualofa. Ina ua maliu Sister Young, na auauna atu Sister Samita o se peresitene aoao o le Aualofa mai le 1901 seia oo i lona maliu i le 1910.

Sii mai le Church News, 5 Me, 2007.