O Le a E Tausia Lelei A’u
A o ou tilotilo i lo’u tofiga fou o se uso asiasi, na ou vaai ai i le suafa o se tagata fou o le matou uarota. Na ou lagona le popole i le asia o se tagata ou te le iloaina, ae na faatulagaina e la’u soa le taimi e asia ai Sieni (ua suia igoa). Na ma taunuu atu i le taeao tuupoina ma vave ona fai se tatalo ae ma te le’i o ese atu. Na ma o atu o faatali mai Sieni ma lana fanau tama laiti ia i maua.
A o faasolo ina matou felatai tele ma Sieni e ala i a ma asiasiga faalemasina, na ma taumafai foi e faamasani i lana fanau tama. E o mai le toalua laiti nonofo i o ma tafatafa ma la’u soa, ona ma faitau lea i ai o tusi ma matou taaalo faatasi. Ae o Aleki e fa tausaga, o le ulumatua o le toatolu, sa lei naunau e faamasani mai i faiaoga asiasi masani a lona tina. Na ese lava o ia ma sa lei manao e faauo mai ia i maua.
Ua tusa o se tausaga talu ona avea a’u ma faiaoga asiasi o Sieni ae ou maua se telefoni ua mu le fale o Sieni! Na musuia i maua ma lo’u toalua e ave ni pepa masi, fagu vai ma ni taavale taalo ma faavave atu loa e vaai pe mafai ona ma fesoasoani i ai. Na ma maua atu Sieni o tu i le ala savali i le isi itu ala ma lona fale o loo talali. O loo fesoasoani le tane a Sieni i le au fuimu e vaai mea ua faaleagaina a o tau faamafanafana e Sieni lana fanau e toatolu o loo fetagisi, ma o loo taupeupe i ona vae.
Ina ua ma talanoa atu ia te ia, na fai mai o ia o loo manao e alu atu i le mea o loo i ai lana tane. Na ma aveina tamaiti laiti e toalua i le ma taavale. Na fia aai ma fia feinu i laua, ma na ou faafetai mo le musumusuga a le Agaga Paia e aumai ni meaai ma vai. Na lei umi ae toafilemu i laua. Ae o Aleki, o loo tagi pea, na matua pipii mau i lona tina. Na le mafai ona ave o ia e Sieni, ma na lagona e ia lona vaeluaina i le fia alu i le mea o i ai lana tane ma le faamafanafanaina o lana tama.
Na ou faamalosiau ia te ia e alu ona ou soso atu lea ma fesili ia Aleki pe mafai ona ou siiina o ia ae sei alu lona tina e sue lona tama. Na faateia a’u ina ua ia malie i ai. A o ou siina ae Aleki i o’u lima, na tuu lona ulu i luga o lo’u tauau, ma sa ou milimiliina lona papatua. A o alu Sieni e su’e lana tane, na ou musumusu atu ni upu faamafanafana i le taliga o Aleki. Na ou lagonaina le fai ifo o lona masusu ma amata ona toafilemu lana manava.
A o ma tutu i le auala savali, na fai mai lemu Aleki ia te a’u, “O le a e tausia lelei a’u aua o oe o le faiaoga o lo’u tina.”
Na maligi lemu o’u loimata ina ua ou iloa o loo iloa e Aleki lo ma taua i le olaga o lona tina. Na iloa e ia e mafai ona ia faatuatuaina ma faalagolago ia te a’u e tausi lelei foi o ia aua o a’u o le faiaoga o lona tina.