O Lo’u Liua i le Faaipoipoga e Faavavau

E le’i faapea ou te le’i manao ou te faaipoipo; o le mea moni lava, na ou matua manao lava i ai, o la’u tala lea ia te a’u lava. Na ou faamasani [i ni tamaitai] i lo’u nuu ma sa i ai foi nisi fesootaiga [ma nisi tamaitai] i nuu mamao. Na ou alu i ni tafaoga faamasani i taimi uma, seia oo lava i le tulaga ua ou le lava. Ae na avea ai a’u o se tagata poto i le iloa lelei o mea na ou manatu o “pona” i tamaitai taitasi na ou faamasani i ai. Na i ai i taimi uma mafuaaga tatau e faamuta ai se faamasaniga ae masani lava faatoa faamuta lava i le maea o se tausaga pe lua foi o ou faamaimauina lona taimi. Mo se taimi umi na ou tuua a’u lava i se faataamilosaga o toilalo ma na oo ai ina le mafai ona ou agai i luma i le tulaga o faigauo.

Na ou faia se misiona. Na ou alu i le malumalu i aso uma, anapogi ma tatalo mo le taitaiga a le Alii, ma auauna faamaoni i valaauga i le uarota. Na malosi le lagolago a lo’u aiga. Na ou talanoa soo lava i o’u epikopo. Na umi foi se taimi o ma galulue ma se fomai o le mafaufau e sili ona lelei o le Au Paia o Aso e Gata Ai. Ae na matua ou faanoanoa tele. Na ou le iloa pe faapefea ona ou faaipoipo.

Na fai mai tagata o e na alolofa mai i lo’u faafitauli pau lava ou te lei fetaui “i le tagata sa’o”. Fai mai isi ia te a’u, “Pau lava le mea o le filifili loa ma fai loa.” Ae na tele tele o’u masalosaloga ma o’u lagona mata’u ou te faia ai lena mea.

Na fai ai la’u faaiuga o le faaipoipoga o le a manaomia ai se vavega. E ui lava na ou iloa o lo’u olaga o lo’u lava lea tiutetauave ma e le mafai ona ou faamoemoe i se epikopo na te foia o’u faafitauli, na ou faamoemoe o epikopo fou taitoatasi na ou fesootai i ai o le a mafai ona fesoasoani ia te a’u. Na popole uma lava i latou ma fai mai ou te faalatalata i le Ekalesia, toaga e auauna pea, ma taumafai le mea sili ou te mafaia.

Ina ua 45 o’u tausaga, na suia le au epikopo o le matou uarota. Ina ua faalau mai le igoa o le epikopo fou, na matua ou le fiafia. O le tagata ua valaau nei o se tasi e matuai eseese lava i ma’ua. Na ou faia le faaiuga faavalevalea, o le a ou faatalitali mo le isi epikopo fou e sosoo ai.

I se tasi Aso Sa, e lei umi ona ou alu atu i le sauniga perisitua ae talosaga mai le epikopo lea pe mafai ona ou alu atu loa i lona ofisa mo se faatalanoaga mo le pepa faataga i le malumalu. I lona ofisa na amata ona faamatala la’u tala faanoanoa fai soo: E leai ma se mea o gasolo lelei mo a’u. O tamaitai uma ou te faamasani i ai e i ai faaletonu e le mafai ona ou taliaina. Ma masalo lava ou te le agavaa mo le faaipoipoga i le olaga lenei.

Na le’i taliaina e le epikopo a’u faitioga, na pulatoa mai ia te a’u, ma fesili mai, “E te fia faaipoipo pe leai?” Na ou tali atu na ou manatu ou te manao i ai ae ua matua ou le iloa lava i le taimi lenei. Na faaauau ona faapea mai, “Ou te manao e te alu i le fale ma filifili pe e te matuai manao lava e te faaipoipo. Afai o le tali e leai, ona ou alofa atu lea ia te oe, ae e mafai ona faamuta loa au tafaoga faamasani ma lou faatigainaina o oe lava i lou le faaipoipo. Afai o le tali e ioe, ona e toe sau lea, ma o le a ta galulue ai.”

I le taimi lava lena, na ou maua le lagona manino o lana fautuaga o le a fesoasoani ia te a’u.

Na ou savali ese mai lona ofisa ma ni lagona loloto. Ina ua maea le lotu na ou alu i le fale, ma ina ua uma sina tauiviga faalemafaufau puupuu ae loloto, na ou filifili ai o le tali o le ioe. Na ou matua naunau i le faaipoipoga, ma na ou finafinau ou te usitaia fautuaga a lenei epikopo, po o le a lava.

O le faiga o lenei filifiliga na avea ma fetaulaiga o lo’u liua i la’u sailiga ia ou faaipoipo. Mo tausaga e tele sa le tuua atoa i ai lo’u loto ma lo’u malosi. E le’i avea le faaipoipoga o se mataupu sili ona taua ia te a’u, e ui lava na faafoliga e taua ia te a’u. Seiloga lava e talafeagai ma a’u fuafuaga ona faatoa ou mafaufau loloto lea i le faaipoipoga, ae o isi mea, e pei o a’u taumafaiga faalegaluega o se faimusika faakonaseti ma se polofesa i le iunivesite, na masani lava ona sili atu ona taua. O le mea na manaomia ona ou aoaoina o le auala e tuliloa ai le sini o le faaipoipoga ma le agaga faamaoni lava lea e tasi.

Ina ua ou toe foi atu e talanoa ma lo’u epikopo, na ia talanoa sa’o mai lava. Na le’i fia faalogo o ia i la’u lisi o ‘alofaga. Na fai mai sa’o lava o ia “Se’i o ta sailia po o le a tonu lava le faafitauli—le mea tonu lava lea e faaletonu ai au faauooga—ona faalelei lea.” Na muamua lava faateia au, ae peitai na faamalosiau ona manatu tuusao. Na ou iloa e mafai ona ou faatuatuaina o ia. Na manaomia tele le malosi ma le lototoa e suia ai a’u amioga masani, ae na amata ona ou talitonu e mafai ona ou faia.

O lana taitaiga muamua lava ia te a’u ia fai ni a’u taumafaiga fou e saili ai se soa o lē, i ana lava upu, e faatuatua, faamaoni, ma alofa—uiga tumau ia e sili ona taua—nai lo na o ni uiga faaalia i le laualuga na ou manatu e taua. (I lo’u mafaufau, na ou manaomia se tamaitai e enaena lona lauulu, o se tagata pese, ma se kuka sili ona lelei.) O lo’u fatonuga, ia faapelepele o ia i le ituaiga o alofa lava lea e i lo tatou Tama Faalelagi mo i tatou taitoatasi, i le malosi ou te mafaia.

Na fesoasoani mai foi lo’u epikopo ia te a’u ou te iloa tulaga faaletonu i la’u sailiga mo se faaipoipoga. Na iu lava ina ou taliaina e faailoa atu e le’i faaletonu tamaitai na ou faamasani i ai, e pei ona ou talitonu i ai mo se taimi umi lava. O le mea moni, sa i ai i o’u lava mafaufauga sese ma faamoemoega le tonu. Na ia faataatia mai ni tulafono fou na tatau ona ou faaaogaina i a’u faamasaniga.

O le mea muamua lava, na tatau ona ou sauni e faia ni suiga. Na matua ou fiafia lava i ala na ou ola ai, ma e ui lava ina sa ou naunau i le faaipoipoga i se uiga lautele, ae na ou manatu o le a faalavelave i a’u fuafuaga masani. O le a tatau ai ona amata ona suia le faiga o nisi mea. Ua 25 tausaga o ou faia lava i la’u auala, ma faia pea lava pea mea sese lava e tasi, ma e manino lava e le’i aoga. Talu ai ua ou 45, na tatau ona ou malamalama e le o toe tele so’u taimi ou te faia ai ni uo faamasani.

Lona lua, o faamasaniga e le faatatau i tafaoga faafiafia ae mo le iloa ai o se soa o le o loo manatu loloto foi i le faaipoipoga ma o loo saunia i ai. O le taimi lea e faaaoga e faamasani ai e le gata i uiga o le tagata, ae sili atu foi ona taua, i lona agaga.

Na aoao mai foi a’u e lo’u epikopo o le a mafai ona ou iloa pe a maea ni nai tafaoga faamasani pe i ai i se tamaitai uiga taua o loo ou sailia. Afai e le o i ai, ua oo mai foi le taimi e faamuta ai lena mafutaga. Ina ia suia la’u masani o le faia o faamasaniga uumi lē aoga, na tuuina mai e le epikopo se faatonuga malosi faaiu na faateia ai a’u: O le a ou agai i luma i soo se mafutaga faamaoni seia taunuu i le faaipoipoga po o le faamutaina. A mavae sina taimi umi [o se mafutaga], e le mafai ona ou toe foi i tua vagana ua le manao le tamaitai ia te a’u. O la’u masani i le taimi ua mavae, o lo’u savali ese mai se mafutaga nai lo lo’u faia o se tautinoga. O le taimi lenei ua le faatagaina a’u ou te toe alu ese e pei ona ou faia muamua. I sa’u filifiliga lototele e ese mai i o’u uiga masani, na ou malie i ai i lea tuutuuga.

Na amata ona ou iloa ni nai mea. Muamua, na ou iloa o le mea ua ta’ua e isi o le “tosinaga” e faatoa lagonaina pe a mavae se talanoaga faatagata matua ma faamaoni, ae le o luma atu. O se tasi lea o sese masani e faia e tagata—pau lava le mafuaaga latou te tuliloaina ai se mafutaga ona o se tosinaga faaletino na latou lagonaina i le uluai taimi lava. O nisi tagata nofofua e fiafia atu e talanoa i mataupu faatauvaa nai lo talanoaga faamaoni ma fesili faigata, ma aloese ai mai fesili faigata ma le faamoemoe le faavaea faapea e maua loa le “alofa moni”, atonu o le a te’i lava ua mou atu ai faafitauli moni o le olaga. O le mea moni, e alia’e mai le faafeagai. Afai e te faaaogaina talanoaga faamaoni ma iloa tali i fesili faigata, ona tupu ai lea o le faatuatuaina. O le faatuatuaga lea e soloia le mata’u, lea e masani ona mafua mai ai le le mautonu, leai se tautinoga faamaoni, ma i’u ai lava i se mafutaga maluelue.

O le mea e sili ona taua, na ou aoao ai o le alofa e le faatatau mo na o a’u. O le faavae o le alofa e faatatau i le manatu alofa i le isi tagata. Na manaomia lo’u galue i le faamaualaloina o a’u lava ma le aveesea o lo’u uiga faamaualuga faapea atonu e leai lava se tamaitai e talafeagai mo au.

Semanu e manaia pe ana faapea e mafai ona ou faapea atu na ou faaipoipo i le tamaitai lava na sosoo ai. Na ou faamasani puupuu lava i ni nai tamaitai faatasi ai ma se mafutaga faamasani umi atu lea na iu lava ina teena [e le tamaitai] a’u. Ae na faaaoga lo’u faatuatua ma mulimuli i faatonuga a lo’u epikopo, e ui lava e lei vave ona maua se taunuuga.

O le tausaga na ou faaaogaina ai nei suiga i o’u uiga ma o’u manatu, na ou toe tilotilo ai i se tamaitai na ou masani ai mo le tele o tausaga. Na ma tafafao faamasani muamua, ae i le taimi lea na ese ai se itu ou te vaai ai ia te ia—o se tasi e ono avea ma soa faavavau e fiafia tele ma matagofie i auala uma aua e ia te ia uiga e anagata (ma le tele o isi uiga lelei faaopoopo). Na agalelei tele o ia ma sa ia toe tuuina mai ia te a’u se avanoa, ma o lea ua avea o ia ma a’u ava ma tina o la’u fanau pele. E matua loloto lo’u alofa ia te ia. I le sefulu tausaga talu ai, na le mafai ona ou mafaufauina lenei taunuuga.

O le a le mea na mafua ai lenei liua? (Ma o se liua moni lava—o se liliu i se isi itu.) Ou te talitonu na oo mai le suiga ona ua aoaoina a’u e se epikopo i le loloto o le alofa o le Tama Faalelagi ia te a’u ma manao ia ou fiafia ma maua uma faamanuiaga ua maea ona ia folafolaina mai mo a’u. Na fesoasoani mai lo’u epikopo ia te a’u e toe faatulaga mea e taua i lo’u olaga, o mea na le’i manino. Na talanoa sa’o mai lava ma sa le’i faatagaina a’u ou te faaseseina i le mau ‘alofaga na ou faia mo se taimi umi tele.

O lea ua ou iloa nei le lagona o le liua. Ua oo mai ia te a’u le faaliliuina tele o le loto e tusa ai ma lea aoaoga faavae, ma ua faia ai le eseesega tele i lo’u olaga. E mafai ona ou toe sailia i tua le taimi tonu o lo’u liua i le aso lena i le ofisa o lo’u epikopo ina ua ia faailoa mai ia te a’u afai ou te mulimuli i lana fautuaga, o le a faamanuiaina a’u.

E moni lava ua faamanuiaina a’u.