Faaaliga Fou i le Falemataaga a le Ekalesia ua Faalauiloa ai le Aualofa i Tausaga ua Tuanai

Saunia e Bonnie Boyd, Mekasini a le Ekalesia

I le faavaeina o le Aualofa lea na faia i le aso 17 o Mati, 1842, na folafola atu ai e Ema Samita e faapea, “O le a tatou faia se mea e sili atu ona maoae” (Relief Society, Minutebook 1842 Mat.–1844 Mat., faamauina i minute i le aso 17 Mati, 1842, 12, Faamaumauga o loo Teuina a le Ekalesia o le AAG).

O lena saunoaga na musuia ai tamaitai o le faalapotopotoga tau amata i lena taimi, ma ua avea nei ma musumusuga mo se faaaliga fou i le Falemataaga o Talafaasolopito ma Faatufugaga a le Ekalesia ua faaigoaina O Se Mea E Sili Atu Ona Maoae: O Se Filifiliga o Meaalofa a Tamaitai.

O le faaaliga o loo faamanatu ai le faataunuuina o le folafolaga matagofie a Ema e ala i le faaalia o mea faitino e faailoa ai meaalofa ma taleni a tamaitai o le Aualofa mai le lalolagi atoa.

O le mea lauiloa e sili ona taua na aofia ai i le faaaliga o se tusi o minute o le tausaga 1842 na faaaogaina e i latou na faavaeina le Aualofa e faamaumau ai taualumaga o ana fonotaga.

O le tusi ua faaigoaina A Record of the Organization and Proceedings of the Female Relief Society of Nauvoo [O Se Tusi a le Faalapotopotoga ma Taualumaga o le Sosaiete Faamamaavega a Tamaitai o Navu] o loo i ai minute o fonotaga a le Aualofa na faia i Navu mai le 1842 e oo i le 1844. O le tele o upusii mai le tusi o minute ua lauiloa ma silafia lelei e tagata o le Ekalesia i soo se nofoaga, ua avea ai o se faamaumauga taua mo tamaitai o le Au Paia o Aso e Gata Ai.

Ina ia fesoasoani i le faamatalaina o galuega lelei a le Aualofa, toeitiiti lava maua le 60 o mea faitino o loo faaalia ai, e aofia ai le tele o faatufugaga o tausaga ua mavae ma ona po nei, o tusitusiga ma mea faitino o aso fai soo. E tele gaoioiga ma mea e tutupu ua auai ai tamaitai o le Au Paia o Aso e Gata Ai ma o le taunuuga, o nei mea ua tutupu ua fatuina ai se talatuu matagofie o le usoga a tamaitai ma auaunaga.

“Talu mai le taimi na faavaeina ai le Aualofa lea ua silia ma le 160 tausaga ua tuanai, ua faatinoina ai e tamaitai o le Au Paia o Aso e Gata Ai i le lalolagi atoa le tele o galuega alofa ma le auauna atu,” o le saunoaga lea a Marjorie Conder, o le o loo nafa ma le faamaopoopoina o lenei faaaliga. “O lenei auaunaga ua sili atu le maoae, ma ua fatuina ai se talatuu o le usoga a tamaitai ma le faateleina o avanoa mo le Aualofa O Le Ekalesia a Iesu Keriso o le Au Paia o Aso e Gata Ai.”

O le faaaliga o loo i ai se lomiga o se ata vali o Ema Samita, le faletua o le Perofeta o Iosefa ma o le peresitene muamua lea o le Aualofa; musika; ie soosoo; tusikuka; ma aitema mai atunuu o le lalolagi na gaosia lava e tamaitai o le Aualofa e fesoasoani ai i le faamatagofieina o fale o le Ekalesia.

O loo i ai foi i le faaaliga ma se taui [ua ta’ua] o le Grammy Award na tauaaoina ia Gladys Knight, o se tasi o le Ekalesia ma ua ia te ia le tomai i le faatufugaga faamusika ua faamanuiaina. Ua faaaoga e Uso Knight ana taleni maoae e siitia ai isi ma faalautele ai a latou taleni.

Mo faamatalaga e uiga i le falemataaga ma ana faaaliga, asiasi i le www .lds.org/churchhistory/museum.

Upusii mai le Relief Society Minutebook [Tusi o Minute a le Aualofa]

“O lenei mafutaga e le na o le faamama avega i e matitiva, ae e mo le laveaiina o agaga” (Iosefa Samita, Relief Society Minutebook, 9 Iuni, 1842).

“O tu ma aga masani o lenei vaitau, e le tatau ona avea ma o tatou taiala—o le avea ai ma afafine o Siona e tatau ona tatou faia se faataitaiga mo le lalolagi uma” (Eliza R. Snow, Relief Society Minutebook, 17 Mati, 1842).

“[Ou te] fiafia i le faavaeina o le Sosaiete, ina ia mafai ai ona tatou faaleleia a tatou taleni ma saunia ai mo na taleni ma faamanuiaga e le o toe mamao ona faaee mai lea e le Atua i o tatou luga” (Epikopo Newel K. Whitney, Relief Society Minutebook, 27 Me, 1842).

“Matou te faamoemoe e galulue i le Suafa o le Alii—ia faamama avega i mea o loo manaomia e i latou ua puapuagatia, ma faia mea lelei uma tatou te mafaia” (Sarah Cleveland, Relief Society Minutebook, 17 Mati, 1842).

“[Ou te] fiafia o loo mafai ona tatou maua le avanoa e faatasitasi ai e talatalanoa i mea o le Malo, e faamafanafana ma aoao ai e le tasi le isi a o tatou i ai i lenei olaga faaletino.” (Elizabeth Ann Whitney, Relief Society Minutebook, 15 Iulai, 1843).