Saili e Aoao e Ala i le Faatuatua
Ua faatele ona apoapoaiina i tatou e tusitusiga paia, e folafola atu upumoni o le talalelei e ala i le mana o le Agaga (tagai MFF 50:14). Ou te talitonu o le toatele o i tatou o matua ma faiaoga i le Ekalesia, ua iloa lenei mataupu faavae ma ua taumafai e faaaoga. Peitai, e ui ina taua lenei mataupu faavae, ae ua na o se elemene e tasi o se mamanu faaleagaga tele naua. Ua aoaoina soo foi i tatou e saili e aoao e ala i le faatuatua (tagai MFF 88:118). Folafola atu i le agaga ma aoao e ala i le agaga, o mataupu faavae ia e vaavaalua e tatau ona tatou taumafai ia malamalama i ai ma faaaoga faatasi ma ia ogatusa lelei.
Ou te manatu ua tatou faamamafaina ma ua tele foi le silafia e uiga i le faiaoga e aoao atu i le Agaga, nai lo le tatou iloa e uiga i se tagata e aoao e ala i le faatuatua. E manino lava, o mataupu faavae ma le faagasologa o le aoao atu ma le aoao mai, e taua i le faaleagaga. Peitai, a o tatou vaavaai atu i le lalolagi o le a tatou ola ai i le lumanai, ua matuai matautia ma fenumiai, ou te talitonu e taua ia i tatou uma lava ona faateleina lo tatou malosi ma le gafatia e saili ai e aoao e ala i le faatuatua. I o tatou lava olaga, i o tatou aiga, ma totonu o le Ekalesia, e mafai ma o le a tatou mauaina faamanuiaga o le malosi faaleagaga, taitaiga, ma le puipuiga a o tatou saili e ala i le faatuatua ia maua ma faaaoga le silafia faaleagaga.
Ua aoaoina i tatou e Nifae, “Pe a tautala atu le tagata i le mana o le Agaga Paia, e moliooina atu [le savali] e le mana o le Agaga Paia i loto o le fanauga a tagata” (2 Nifae 33:1). Faamolemole matau le ala e molioo atu ai e le Agaga le savali i le ae le o totonu o le loto. E mafai e se faiaoga ona faamatala, faaa’oa’o, tauanau, ma molimau atu, ma faia foi ma le atoatoa i le mana tele faaleagaga. Peitai, o le mea moni lava ia, seiloga lava e faataga e le tagata le aano o se savali ma le molimau a le Agaga Paia e ulufale atu ia te ia, ona faatoa tuia ai lea o lona loto. O le aoao e ala i le faatuatua e tatalaina ai le ala i totonu o le loto.
O Le Mataupu Faavae o le Faatinoga: Faatuatua i le Alii o Iesu Keriso
Sa faamatala e le aposetolo o Paulo le faatuatua o le faalagolago lea i mea ua faamoemoe i ai [ma] o le mautinoa lea o mea” (Eperu 11:1). Na tautino mai foi e Alema, o le faatuatua e le o le mautinoa lea o mea; ae afai ua ia te i tatou le faatuatua, tatou te faamoemoe i mea e le o vaaia [ae] ua moni ia” (Alema 32:21). E le gata i lea, ua tatou aoao mai i Tautalaga e uiga i le Faatuatua e faapea, o le faatuatua “o le mataupu faavae muamua i talitonuga faalelotu ua faaalia, ma o le faavae o le amiotonu uma” ma “o le mataupu faavae foi o faatinoga a tagata atamamai uma.”1
O nei aoaoga ua faamamafa mai ai ni elemene faavae se tolu o le faatuatua: (1) faatuatua o le mautinoa lea o mea o loo faamoemoe i ai ua moni, (2) faatuatua o le faamaoniga o mea e le o vaaia, ma le (3) faatuatua o le mataupu faavae o le faatinoga a tagata atamamai uma. Ou te faamatalaina nei itutino e tolu o le faatuatua i le Faaola, e o lua lava ma le vaai atu i le lumanai, tepa i le taimi ua tuanai, ma le amatalia o le faatinoga i le taimi nei.
O le faatuatua o le mautinoa lea o mea o loo faamoemoe i ai i le lumanai. O lenei mautinoa o loo faavae i luga o se malamalama sa’o ma sa faalagolago i le Atua, ma mafai ai ona tatou “fetaomi atu i luma” (2 Nifae 31:20) i mea e le o mautinoa ma o le tele lava o taimi, o ni tulaga faigata tele i le galuega a le Faaola.
Mo se faataitaiga, na patino le faalagolago o Nifae i lenei mautinoa faaleagaga mo le lumanai, a o ia toe foi i Ierusalema e aumai papatusi apamemea—“sa le muai iloa mea [na te] faia. Ae ui i lea, [na ia] alu atu” (1 Nifae 4:6–7).
O le faatuatua ia Keriso ua nonoa mau ma e afua mai ai le faamoemoe ia Keriso mo lo tatou togiola ma le faaeaga. O le mautinoa foi ma le faamoemoe e mafai ai ona tatou savavali i le taufaasiusiuga o le malamalama ma tau laalaa atu ai i le pogisa—ma le faamoemoe ma le talitonuga e susulu atu le malamalama e faamalamalama ai le ala.2 O le tuufaatasi o le mautinoa ma le faamoemoe, e amatalia ai le faatinoga i le taimi nei.
O le faatuatua o le faamaoniga o mea e le o vaaia, e vaai atu i le taimi ua tuanai ma faamaonia ai lo tatou faalagolago i le Atua ma lo tatou talitonuga i le moni o mea e le o vaaia. Tatou te laa atu i le pogisa faatasi ma le mautinoa ma le faamoemoe, ma tatou te maua foi le molimau ma le faamaoniga a o aumaia le sulu ma maua ai le malamalama tatou te manaomia. O le molimau tatou te mauaina pe a mavae ona tofotofoina lo tatou faatuatua (tagai Eteru 12:6) o le faamaoniga lea e faateleina ma malosi ai lo tatou mautinoa.
O le mautinoa, faatinoga, ma le faamaoniga, e ta’a’ina e le tasi le isi i se faiga faifai pea. O lea faiga e pei o le taaiga ma a o faataamilo agai i luga e oo ina faateleina ma atili ai ona lautele. O nei elemene e tolu o le faatuatua, mautinoa, faatinoga, ma le faamaoniga, e le mavaevae ma tuma’oti; ae e fesootai faatasi ma faifai pea le taamilosaga agai i luga. Ma o le faatuatua e faamumuina lenei faiga faifai pea, e atiina ae ma tuputupu ae malie, ma suia ai. A o tatou toe liliu atu ma faasaga atu i se lumanai e le o mautinoa, o le mautinoa e tau atu ai i le faatinoga ma maua mai ai le faamaoniga, lea e saga faateleina ai le mautinoa. O le a malosi lo tatou faatuatua, o le upu ma le upu, o le fuaiupu ma le fuaiupu, o sina mea itiiti iinei ma sina mea itiiti iina.
Tatou te mauaina se faataitaiga mamana o le fesootaiga o le mautinoa, faatinoga, ma le faamaoniga a o tauaveina e le fanauga a Isaraelu le atolaau o le feagaiga i lalo o le taitaiga a Iosua (tagai Iosua 3:7–17). Manatua ina ua taunuu Isaraelu i le vaitafe o Ioritana ma sa folafola atu ia te i latou o le a vaeluaina le vai, ma o le a mafai ona latou savavali i le eleele matutu. E uiga ese, aua e lei vaeluaina le vai a o tutu le fanauga a Isaraelu i auvai o le vai ma faatalitali ai pe tupu se mea; ae na susu o latou alofivae a o lei vaeluaina le vai. Sa faaalia le faatuatua o Isaraelu ina ua latou savavali i le vai a o lei vaeluaina. Sa latou savavali i le vaitafe o Ioritana ma se mautinoa o le lumanai, i mea ua faamoemoe i ai. A o savavali atu i luma le fanauga a Isaraelu, sa vaeluaina le vai, ma ina ua latou taunuu i le eleele matutu, sa latou toe tepa atu i tua ma sa latou vaaia ai le faamaoniga o mea sa lei vaaia. O lea tala, na avea le faatuatua ma tulaga mautinoa, ma sosoo atu ai ma le faatinoga, ona maua mai ai lea o le faamaoniga o mea e lei vaaia ae ua moni.
O le faatuatua moni e taulai atu i le Alii o Iesu Keriso, ma e sosoo lava ma le faatinoga. O le faatuatua i le avea ai ma se mataupu faavae o le faatinoga, o loo faamamafa mai i le tele o mau ua tatou masani uma ai:
“E faapei o le tino ua oti ia pe a te’a le agaga, e faapea foi le faatuatua ua mate pe a leai ni galuega (Iakopo 2:26; ua faatusilima mea e faamamafa).
“A ia fai outou ma e anaana i le upu, a e aua le na ona faalogologo” (Iakopo 1:22; ua faatusilima mea e faamamafa).
“Ae peitai, faauta, afai tou te ala mai, ma fagua o outou mafaufau e oo i le tofotofo i a’u upu, ma faaaoga sina faatuatua itiiti lava” (Alema 32:27; ua faatusilima mea e faamamafa).
Ma o le faatuatua i le avea ai ma se mataupu faavae o le faatinoga, e matuai totonugalemu lava i le faagasologa o le aoao ma le faaaogaina o upumoni faaleagaga.
Aoao e ala i le Faatuatua: E Filifili mo i Latou Lava Ae Le Galueaiina
I le avea ai o le faatuatua ma mataupu faavae o le faatinoga i tagata atamamai uma, e faapefea ona fesootai ma le aoaoina o le talalelei? A o le a foi le uiga o le saili e aoao e ala i le faatuatua?
I le vaevaega aoao o foafoaga uma a le Atua, e i ai mea e galue ma mea e galueaiina (tagai 2 Nifae 2:13–14). O i tatou o atalii ma afafine o lo tatou Tama Faalelagi, ua faamanuiaina i tatou i le meaalofa o le saolotoga—o le tulaga gafatia ma le mana o faatinoga tumaoti. O i tatou o sui ua faaeeina i ai le saolotoga, ma o le mea e aupito taua o lo tatou galulue ae le na o le galueaiina—aemaise lava a o tatou saili ina ia maua ma faaaoga le malamalama faaleagaga.
O le aoao e ala i le faatuatua ma aafiaga, o vaega tutotonu ia e lua o le fuafuaga mo le fiafia a le Tama. Sa faasaoina e le Faaola le saolotoga mama e ala i le Togiola, ma mafai ai e i tatou ona faatino ma aoao e ala i le faatuatua. O le fouvaleina e Lusifelo o le fuafuaga, na saili ai e faatamaia le saolotoga o le tagata, ma o lona faamoemoega i le avea ai o i tatou ma ni tagata a’oa’o, ia seiloga lava e tau galueaiina.
Manatu i fesili na tuuina atu e le Tama Faalelagi ia Atamu i le Faatoaga i Etena: “O fea o i ai oe?” (Kenese 3:9). Na silafia e le Tama le mea sa lafi ai Atamu, ae peitai, sa ia fesili lava. Aisea? Sa faia lava e se Tama poto ma le alofa ina ia mafai e Lona atalii ona galue ia lava i le faagasologa o lona aoaoina, ae le faatinoina pe galueaiina e se isi mo ia. Sa le o se tautalaga fai itu tasi i se atalii le usitai, lea atonu e mafuli i ai le toatele o i tatou. Nai lo lena, sa fesoasoani le Tama ia Atamu o se tagata o loo aoao, ina ia faatino e ia lava ma faaaoga tatau ai lona saolotoga.
Manatu i le manao o Nifae ina ia iloa mea sa vaai i ai lona tama o Liae i le faaaliga i le laau o le ola. E maeu lava, na amata ona faiaoga le Agaga o le Alii ia Nifae i le faia o fesili nei, “Faauta, se a le mea ua e manao i ai?” (1 Nifae 11:2). O le mea moni na silafia e le Agaga le mea sa manao i ai Nifae. Ae o le a la le mea na fesili ai? Sa fesoasoani le Agaga Paia ia Nifae e galue i le faatinoga o le aoaoina ae le tau galueaiina. I le 1 Nifae 11–14, matau le fesili atu o le Agaga ma le uunaia o Nifae e “vaai”, o ni elemene ola i le faagasologa o le aoaoina.
O nei faataitaiga ua tatou iloa ai, i le avea ai o i tatou ma ni tagata e aoao, e tatau ia te oe ma a’u ona galulue e faatino ma avea ma e anaana i le upu ae le na ona faalogologo ae tau galueaiina e isi. Pe o oe ma a’u ea o ni sui o loo galulue e faatino ma saili e aoao e ala i le faatuatua, pe o ta faatalitali ea i isi e aoao ma galueaiina i taua? Pe o galulue ea tamaiti, talavou laiti, ma tagata matutua o loo tatou tautuaina e faatino ma saili e aoao e ala i le faatuatua, pe o latou faatalitali ea tatou te aoaoina ma tau galueaiina i latou? Pe o ta uunaia ea ma fesoasoani ia i latou o loo tatou tautuaina ina ia saili i le aoao e ala i le faatuatua? Ua tatau ia i tatou uma ona matua galulue punouai e ole atu, saili, ma tu’itu’i atu (tagai 3 Nifae 14:7).
O se tagata aoao na te faaaogaina le saolotoga e ala i le galue e faatino e tusa ai ma mataupu faavae sa’o, e tatalaina lona loto i le Agaga Paia ma valaaulia Ana aoaoga, o le mana molimau, ma molimau faamaonia. O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae le tau lava ina talia. O le faamaoni a’ia’i ma le ogatasi o a tatou faatinoga musuia i le faatuatua, e faailoa atu ai i lo tatou Tama Faalelagi ma Lona Alo o Iesu Keriso lo tatou naunautai e aoao ma talia faatonuga po o aoaoga mai le Agaga Paia. O le mea lea, o le aoao e ala i le faatuatua e aofia ai le faaaogaina o le saolotoga mama e galue ai e faatino, ina ua mautinoa o mea ua faamoemoe i ai ma valaaulia le faamaoniga o mea e le o vaaia mai le faiaoga moni e toatasi, o le Agaga lea o le Alii.
Manatu i le ala o loo fesoasoani ai faifeautalai i tagata sailiili ina ia aoao e ala i le faatuatua. O le faia ma tausia o tautinoga faaleagaga, e pei o le suesue ma tatalo e uiga i le Tusi a Mamona, auai i sauniga a le Ekalesia, ma le tausia o poloaiga, e tatau ai i se tagata sailiili ona faaaoga le faatuatua ma faatino ai. O se tasi o matafaioi taua a se faifeautalai o le fesoasoani lea i se tagata sailiili e faia ma faamamalu ni tautinoga—e galue e faatino ma aoao e ala i le faatuatua. O le aoao atu, tima’i, ma le faamatala atu, e ui lava ina taua tele, ae e le mafai lava ona avatu ai i se tagata sailiili se molimau i le moni o le talalelei toefuataiina. E na o le faatuatua lava o se tagata sailiili e matua’ia le galue e faatino ma tatala ai le ala i le loto, ma mafai ai e le Agaga Paia ona molioo atu se molimau e faamaonia ai. E tatau lava i faifeautalai ona aoao ia iloa ona aoao atu i le mana o le Agaga. Peitai, e faapena foi ona taua o le tiutetauave o faifeautalai e fesoasoani ai i tagata sailiili ina ia aoao e ala i le faatuatua.
O le aoao lea ou te faamatalaina atu, ua le na o le malamalama i ai i le mafaufau ma le teuina ma manatuaina o faamatalaga, ae e mamao tele atu i tua. O le ituaiga o aoao lea ou te tautala atu ai, e afua ai ona tatou lafoai ese le tagata o le lalolagi (tagai Mosaea 3:19), e faaliliu ai o tatou loto (tagai Mosaea 5:2), ma faaliliuina ai i le Atua ma le toe liliu ese lava (tagai Alema 23: 6). O le aoao e ala i le faatuatua e manaomia ai le loto ma le mafaufau matala (MFF 64:34). O le aoao i le faatuatua o le taunuuga lena o le tauaveina e le Agaga Paia o le mana o le upu a le Atua e le gata i le loto ae faapea foi i totonu o le loto. O le aoao e ala i le faatuatua e le mafai ona sii mai i se faiaoga i se tamaitiiti aoga e ala i se tautalaga, o se ata faataitai, po o se galuega faatino o aafiaga; nai lo lena e tatau i se tamaitiiti aoga ona faaaoga le faatuatua ma galue ai ina ia maua le malamalama mo ia lava.
Na malamalama lelei lava le taulealea o Iosefa Samita i le uiga o le aoao e ala i le faatuatua. O se tasi o tala aupito lauiloa o le olaga o Iosefa Samita, o lona faitauina lea o fuaiupu e uiga i le tatalo ma le faatuatua i le tusi a Iakopo i le Feagaiga Fou (tagai Iakopo 1:5–6). O lea fuaitau na musuia ai Iosefa e mapu atu i se togavao e latalata ane i lo latou fale, e tatalo ai ma saili atu mo le malamalama faaleagaga. Matau ia fesili na fatufatua’i e Iosefa i lona mafaufau ma lagona ai i lona loto—ma na ia aveina ai i le vao. Sa manino lona saunia o ia lava e “ole atu i le faatuatua” (Iakopo 1:6) ma galue e faatino.
“I le taulotoaiga o lea taua’iupuga ma le lasi o taofi na ou faapea ifo ai ia te au lava: O le a se mea e ao ina ou faia? O ai o nei lotu uma ua sa’o; po ua sese i latou uma? Afai foi ua sa’o se tasi o i latou, o le fea, ma pe faapefea ona ou iloa? …
“O le autu o lo’u alu atu ou te fesili i le Alii, ia ou iloa po o le fea o lotu uma ua sa’o, ina ia ou iloa le lotu e ao ina ou auai. O le mea lea, ina ua ou lagona ua tatalaina au ma ua mafai ona tautala atu, sa ou fesili atu loa ia i Laua na tutu mai i o’u luga i totonu o le malamalama, po o le fea o lotu uma ua sa’o … ma tatau ona ou auai” (TIS 2:10, 18).
Matau e le’i taulai atu fesili a Iosefa na o se mea na manaomia ona ia iloa, ae pe o le a foi le mea e tatau ona ia fai. O le fesili muamua na taulai atu i le faatinoga ma pe o le a le mea e tatau ona fai! O lana tatalo sa le na o lē fea lotu e sa’o. O lana fesili sa faapea po o le fea lotu e tatau ona ia auai. Sa alu Iosefa i le togavao e aoao ai e ala i le faatuatua. Sa naunau o ia e faatino.
O le mea taua lava, o le matafaioi e aoao e ala i le faatuatua ma faaaoga upumoni faaleagaga, e i luga o i tatou lava ia taitoatasi. O se matafaioi ua matua faateleina lona taua i le lalolagi lea o loo tatou nonofo ai, faapea foi e o le a ola mai ai. Pe o a, pe faapefea, ma pe o afea foi tatou te aoao ai, e lagolagoina—ae le faalagolago i—se faiaoga, se metotia e faaaoga e aoao atu ai, po o se autu patino po o le faiga o se lesona.
E moni, o se tasi o luitau tele i le olaga nei o le saili e aoao i le faatuatua. Ua faia e le Perofeta o Iosefa Samita se aotelega sili o le faagasologa o le aoao ma ona taunuuga o loo ou taumafai e faamalamalama atu. I se tali atu i se talosaga a Aposetolo e Toasefululua mo ni faatonuga po o aoaoga, sa aoao atu ai e Iosefa, “O le ala sili lava e maua ai upumoni ma le poto e le o se saili atu i tusi ae ia o i le Atua i le tatalo, ma maua mai ai aoaoga faalelagi”3
I se isi foi taimi, na faamalamalama atu ai e le Perofeta o Iosefa “o le faitau i aafiaga o isi, po o faaaliga na tuuina atu ia te i latou, o le a le mafai lava ona tatou maua ai se vaaiga lautele o le tulaga o tatou i ai ma se sootaga moni i le Atua.”4
Fautuaga Mo Faiaoga
O mea moni e uiga i le aoao e ala i le faatuatua e matua tele ai lava ni fautuaga mo matua ma faiaoga. Se i o tatou mafaufau faatasi i ni vaega se tolu o nei fautuaga.
Fautuaga 1. O le Agaga Paia o se faiaoga mai le Tama.
O le Agaga Paia o le sui lona tolu lea o le aigaAtua, ma o Ia o le faiaoga ma le molimau o mea moni uma. Sa faamatala mai e Elder James E. Talmage (1862–1933) o le Korama a Aposetolo e Toasefululua: “O le tofi o le Agaga Paia i Lana galuega i tagata, ua faamatala mai lea i tusitusiga paia. O ia o se faiaoga na auina mai e le Tama; ma o i latou uma ua i ai le aia tatau mo Ana aoaoga, o le a Ia faaalia i ai mea uma e tatau ai mo le siitia o le agaga.”5
E ao lava ona tatou manatua i taimi uma, o le Agaga Paia o le faiaoga lea e mafai ona ulufale mai i le loto o se tagata a’oa’o, pe a valaaulia faalelei. E moni, o oe ma a’u ua i ai le matafaioi o le talai atu o le talalelei e ala i le Agaga; o le Fesoasoani lava lea, o se tulaga muamua lea e moomia mo le aoao i le faatuatua, lea e na o le Agaga Paia e mafai ona faataunuuina ai (tagai MFF 50:14). O lea tulaga, ua pei ai oe ma a’u o se muia’a tioata lea e faaaoga e gaosi mai ai uaea ‘alava malamalama, lea e avatu ai sulu faailoilo i vaega vavamamao naua. E faapei ona tatau i tioata o i totonu o nei uaea ona manino ina ia lelei ona avatu ai le malamalama, e faapena foi ona tatau ai le avea o i tatou ma alāsulu e mafai ona galue atu ai le Agaga o le Alii.
Peitai e tatau ona tatou matua faaeteete ina ia manatua i la tatou auaunaga o i tatou o alāsulu ma alāleo; e le o i tatou o le malamalama. “Aua e le o outou e tautala atu ai, a o le Agaga o lo outou Tama e tautala mai ai i totonu ia te outou” (Mataio 10:20). E le o se mea e uiga ia te au, e le o se mea foi e uiga ia te oe. O le mea moni, soo se mea lava e te faia pe ou te faia foi o se faiaoga, ma le iloa ma le faamoemoe e taaina atu ai le vaaiga ia te oe po o a’u lava ia—i savali tatou te tuuina atu, i metotia tatou te faaaoga, po o o tatou uiga faaletagata—o se ituaiga lava lena o faitaulaga pepelo ua faalavefau i le lelei o le aoao atu a le Agaga Paia. “Pe na tala’i atu ea i le Agaga o le upumoni po o se isi ala? Afai foi ua faia i se isi ala e le mai le Atua ia” (MFF 50:17–18).
Fautuaga 2. E sili atu ona lelei ma aoga lo tatou avea ai o ni faiaoga, pe a tatou uunaia ma saunia tagata aooga e aoao i le faatuatua.
Ua tatou masani uma i le ‘agana faapea a avatu se i’a i se tagata ona ‘ai ai lea o ia mo le aso e tasi. O le aoao o le tagata e fagota, i se isi itu, o le a maua ana meaai i aso uma o lona olaga. I le avea ai ma faiaoga o le talalelei, tatou te le o galulue e tufatufa atu ni i’a; ae, o la tatou galuega o le fesoasoani atu lea i tagata e aoao ia iloa “fagota” ma mafai ai ona faalagolago ia te ia lava i le faaleagaga. E sili ona ausia lenei faamoemoega taua, pe a tatou uunaia ma saunia le au aooga e tusa ai ma mataupu faavae sa’o—a o tatou fesoasoani ia i latou e aoao e ala lea i le faia. “Ai se tasi e fia fai lona finagalo, e iloa ai e ia le mataupu, pe mai le Atua” (Ioane 7:17).
Matau le faatinoga o lenei fautuaga i le apoapoaiga na tuuina atu ia Junius F. Wells e Peresitene Polika Iaga (1801–77) ina ua tofia Uso Wells i le 1875 e faatulaga ia alii talavou o le Ekalesia:
“I a outou fonotaga, e tatau ona e amata mai i le pito i luga o le lola [tauvalaauga] ma valaaulia ni tagata se toatele pe a lava le taimi, e fai ni a latou molimau ma a oo i le fonotaga e sosoo ai, ona amata foi lea i le mea na gata ai ma valaaulia isi, ina ia aofia ai tagata uma ma ia faamasani i le tutu i luga e tautatala. Atonu e toatele nisi e manatu, e leai ni a latou molimau e tuuina mai, peitai faatutu pea i latou i luga ma o le a faagaganaina lava e le Alii i upumoni e tele latou te lei mafaufau i ai muamua. Ua toatele tagata e maua a latou molimau pe a tutu i luga e taumafai e tuuina atu nai lo le tootutuli ma tatalo mo ni molimau”6
Ua tuuina mai e Peresitene Boyd K. Packer, Sui Peresitene o le Korama a Aposetolo e Toasefululua, se fautuaga faapena i o tatou taimi:
“Maimau e, pe ana mafai ona ou aoao atu ia te outou lenei mataupu faavae e tasi. E maua se molimau i le ta’uina atu! E i ai lava se vaipanoa o lau sailiga mo le malamalama faaleagaga, o loo i ai le “fana’e o le faatuatua,” e pei ona ta’ua ai e le au faitofa. O le taimi lea ua e oo atu ai i le faatausiusiuga o le malamalama, ma laa atu ai i le pogisa, ma iloa ai o loo malamalama le ala i luma atu mo na o se tasi pe lua foi ni laa. “O le mafaufau o le tagata,’ e pei ona ta’u mai i le mau, e moni lava ‘o le lamepa lea a Ieova’ (Faataoto 20:27).
“E ese le maua o se molimau mai mea e te faitauina pe o mea foi sa ta’u mai e se isi; ma o se amataga talafeagai foi lena. E ese foi le faamaonia mai e le Agaga ia te oe i lou loto faapea e moni mea sa e molimau atu ai. Pe le o mafai ea la ona e vaai atu o le a aumaia lava ia te oe a o e faasoa atu? Pe a foai atu au mea o i ai, o le a i ai foi se mea e sui ai, faatasi ai ma se faaopoopoga!”7
Ua ou matauina se uiga masani i faiaoga, o e ua tele sa latou faatosinaga i lo’u olaga. Sa latou fesoasoani ia te au ou te saili e aoao i le faatuatua. Sa latou mumusu e ta’u mai ia te a’u ni tali faigofie. O le mea moni, latou te lei ta’ua maia lava ia te au ni tali. Ae sa latou faasino mai le ala ma fesoasoani mai i laasaga ou te uia e sue ai a’u lava tali. Ou te lei talisapaia i taimi uma lenei faiga, peitai o aafiaga sa mafai ai ona ou malamalama, o se tali e aumai i se isi tagata e masani lava e le umi se taimi e manatua ai, pe afai foi e manatua. Peitai o se tali tatou te maua e ala i le faaaogaina o le faatuatua, e masani lava ona manatua i le olaga atoa. O aoaoga aupito taua o le olaga e pu’e mai—ae le o le aoao mai.
O le malamalama faaleagaga ua faamanuiaina oe ma a’u e maua, ma ua faamaonia le moni i o tatou loto, e le mafai ona foai atu i se isi tagata. E tatau lava ona faia taumafaiga ina ia filiga ma aoao e ala i le faatuatua ina ia maua ai e “oe” lava ia lena malamalama. E na o le pau lea o le auala e mafai ai ona faaliliu atu mea o i le mafaufau, i le loto. E na o le pau lea o le ala, e mafai ai e se tagata ona agai atu i luma ma faalagolago i le malamalama faaleagaga ma le poto masani o isi tagata, ma maua ai na faamanuiaga mo ia lava. E na o le pau lea o le ala e mafai ai ona tatou sauniuni faaleagaga mo mea o le a oo mai. E tatau ona tatou “saili i le a’oa’o, e faapea foi i le suesue ma le faatuatua” (MFF 88:118).
Fautuaga 3. E faamalosia lo tatou faatuatua a o tatou taumafai e fesoasoani atu i isi ina ia saili e aoao i le faatuatua.
O le Agaga Paia, o le e mafai ona “aoao i [tatou] i mea uma ma faamanatu ia i [tatou] mea uma” (Ioane 14:26), e naunau o ia e fesoasoani ina ia tatou aoao a o tatou galulue e faatino ma faaaoga le faatuatua ia Iesu Keriso. E maeu foi, aua o lenei fesoasoani paia e aoao, atonu e leai se mea e sili ona manino mai ai nai lo le taimi tatou te faiaoga ai, a le o le fale po o tofiga faale-Ekalesia. E pei ona faamanino atu e Paulo i tagata Roma, “O oe le aoao atu i le tasi tagata, e te le aoao ea oe ia te oe?”(Roma 2:21).
Matau fuaiupu nei mai le Mataupu Faavae ma Feagaiga pe faapefea e le aoao atu ma le maelega ona valaaulia le alofa tunoa ma faatonuga mai le lagi:
“Ou te tuuina atu foi ia te outou le poloaiga ia outou aoao le tasi i le tasi i mataupu o le malo.
“Ia outou aoao atu ma le filifiliga ma o lo’u alofa tunoa o le a mafuta ma outou, ina ia aoaoina atoatoa lelei outou i teori, mataupu autu, mataupu faavae, i le tulafono o le tala lelei, ma mea uma lava tau le malo o le Atua, e tatau mo outou ona malamalama ai” (MFF 88:77–78; ua faatusilima mea e faamamafa).
Mafaufau o faamanuiaga o loo faamatala atu i nei mau, ua faamoemoe patino lava mo le faiaoga: “Aoao … ma le filiga ma o lo’u alofa tunoa o le a mafuta ma outou”—ina ia mafai ai ona aoao oe lena, le faiaoga!
O loo molimauina foi lena lava mataupu i le fuaiupu 122 mai le vaega lava lena e tasi:
“Ia tofia mai ia te outou lava le faiaoga, ma aua nei failauga uma faatasi, a ia tuuina atu i tagata taitoatasi e lauga ma ia faalogo uma i ana upu, ina ia faamalamalamaina uma i lauga a tagata uma, ina ia tutusa le avanoa i tagata uma” (MFF 88:122; ua faatusilima mea e faamamafa).
A lauga pe tautatala tagata uma, ma a faalogo tagata uma i se ala mamalu ma le faatulagaina lelei, o le a faamalamalamaina tagata uma. O le faaaogaina taitoatasi pe faatasi foi o le faatuatua i le Faaola, e valaaulia ai aoaoga ma le malosi mai le Agaga o le Alii.
Saili e Aoao e ala i le Faatuatua: O se Faataitaiga Lata Mai Nei
Sa faamanuiaina i tatou uma i se lu’i mai ia Peresitene Godon B. Hinckley ia Aokuso 2005 e faitau le Tusi a Mamona ia oo atu i le faaiuga o le 2005 ua maea. Ina ua tuuina mai le lu’i, sa folafola mai e Peresitene Hinckley, o le tausia ma le faamaoni o lenei polokalama faigofie o le faitauina, o le a aumaia ai i o tatou olaga se fuataga faaopoopo o le Agaga o le Alii, o se folafolaga mausali o le a savavali i le usiusitai i Ana poloaiga, ma se molimau malosi atu e uiga i le moni o le i ai o le Alo o le Atua.”8
Faamolemole ia matau le avea o lenei lu’i musuia ma faataitaiga maoae o le aoao i le faatuatua. Muamua, e lei poloaiina oe ma a’u, pe tauanau, pe manaomia ona tatou faitauina. Ae, na valaaulia i tatou e faaaoga lo tatou saolotoga ma galulue e faatino e tusa ai ma mataupu faavae sa’o. O Peresitene Hinckley, o se faiaoga musuia, sa ia fautuaina i tatou e galulue e faatino ae le na o le tau galueaiina. O le taunuuga lava, sa tofu filifili i tatou, pe faapefea ae pe tatou te tali atu foi i le lu’i—ma pe tatou te tumau foi i le faataunuuina o le galuega.
Lona lua, i le tuuina mai o le valaaulia e faitau ma faatino, sa fautuaina e Peresitene Hinckley i tatou taitoatasi ina ia saili e aoao e ala i le faatuatua. Sa le i toe tufatufaina i tagata o le Ekalesia ni tusi fou e suesue ai, sa leai foi nisi lesona faaopoopo, vasega, po o ni polokalama sa fatuina e le Ekalesia. Sa tofu i tatou ma se kopi o le Tusi a Mamona, ma sa i ai se ala i o tatou loto na matala tele i tua e ala i le faaaogaina o lo tatou faatuatua i le Faaola, a o tatou tali atu i le lu’i a le Au Peresitene sili. O le mea lea, sa tatou saunia ai mo le mauaina o aoaoga mai le faiaoga moni e toatasi, o le Agaga Paia lea.
O le matafaioi e saili e aoao i le faatuatua, e i luga lava o i tatou taitoatasi, ma o le a faateleina le taua o lenei matafaioi ao aga atu foi ina faateleina le fenumia’i ma le faaletonu o le lalolagi o loo tatou ola ai. E taua le aoao e ala i le faatuatua mo lo tatou atinaega faaleagaga patino, ma le tuputupu ae o le Ekalesia i nei aso amuli. Talosia ia tau fai fia feinu moni i tatou taitoatasi i le amiotonu ma ia faatumulia i le Agaga Paia (tagai 3 Nifae 12:6)—ina ia tatou saili ai e aoao i le faatuatua.
Mai se lauga na faasalalauina i le satelite i faiaoga o le Ofisa o Aoga a le Ekalesia i le aso 3 o Fepuari, 2006.