O Le Meaalofa Ou te Le Manatuaina

O se tasi o meaalofa silisili na ou maua mai lo’u tama o se meaalofa e le mafai ona ou manatuaina. Na te lei talanoa lava e uiga i ai. O le auala lena a Tama. Faatoa ou iloa i le tele o tausaga mulimuli ane mai lo’u tina.

Na ola a’e lo’u tina ma lo’u tama o ni tagata o Le Ekalesia a Iesu Keriso o le Au Paia o Aso e Gata Ai, ae o le masani a Tama o le ulaula, na taofia ai i laua mai le faaipoipo i le malumalu. O le epikopo loto alofa na faatinoina le faaipoipoga faalemalo a o’u matua na faamalosiauina i laua e faatu se sini e faaipoipo i le malumalu a o lei i ai sa laua fanau. Na la galulue pea i lena sini ina ua ou fanau mai i totonu o le aiga.

Ina ua latalata mai le taimi o lo’u aso fanau lona lua, e lei o lava o’u matua i le malumalu. Na matua manao lava Tina e faamauina o se aiga a o lei fanau mai se la tama lona lua, ae na ulaula tapaa pea le Tama.

O nisi taimi ou te moomoo ai maimau pe ana mafai ona ou manatua le mea na tupu i lo’u aso fanau lona lua, aua o le taimi lena na ou maua ai le meaalofa. Na manava mai lo’u tama mai le galuega i lena po i le amataga o Novema, ma ina ua tuu ese lana pakete e ave ai lana meaai o le aoauli ma aveese lona peleue, na ia siiina a’u i luga. “Gary,” o lana tala lea, “e i ai la’u meaalofa faapitoa mo oe i lou aso fanau.” Fai mai Tina na faateia o ia aua na ia iloaina e leai se tupe faaopoopo a Tama e faatau ai se meaalofa mo a’u.

Na tago Tama i le taga o lona ofutino, ma aumai i fafo le pepa sikaleti e lei uma ona faaaoga ma tuu mai ia te a’u. Na amata ona tetee i ai Tina, ae na tuu i luga le lima o Tama na pei e faapea atu, “O le mea lea e i le va o a’u ma lo’u atalii.”

I se leo filemu, na ia fai mai loa ia te a’u, “Ua tele ni nai aso o ou mafaufau i lenei mea. Ua ou filifili ou te le manao ia te oe, lo’u atalii, e te manatuaina lava na ulaula lou tama. O la’u meaalofa ia te oe i le aso lenei o le a tuu la’u sikaleti, ma o le a ou le toe ulaula lava.”

Ma o le iuga lena o lana masani o le ulaula. Ai na tauivi o ia e taofi faafuasei lana ulaula. E ui ou te le manatuaina, o lana meaalofa faapitoa lena ia te a’u. Ae na sili atu nai lo lena.

I ni nai masina mulimuli ane, a o maitaga lo’u tina i lo’u uso, na matou o atu ai i le Malumalu i Logan Iuta, lea na faamau faatasi ai i matou o se aiga e faavavau.

Ou te matua faafetai mo lena meaalofa na foai mai i le tele o tausaga talu ai e lo’u tama agalelei ma agaalofa.