Faia o Mea Lelei i le Aso Sapati

Ina ua maea ona foafoaina e le Tama Faalelagi ma Iesu Keriso le lagi ma le lalolagi i aso e ono, na malolo i Laua i le aso fitu.

Na La faamanuiaina le aso fitu e avea ma aso paia. O se aso e malolo ai mai a tatou galuega fai soo ae mafaufau ia i Laua. E mafai ona tatou faaali atu lo tatou alolofa ia te i Laua i le faia o mea lelei i le aso Sapati.

O le auai i le lotu ma le aai ma feinu i le faamanatuga e faaali atu ai i le Tama Faalelagi ma Iesu Keriso tatou te alolofa ia i Laua ma mananao e mulimuli i a Laua aoaoga. E taua foi le faiga o o tatou lavalava, amioga, ma faalogo i o tatou faiaoga.

E tatau ona tatou tausia ia paia le aso Sapati i o tatou aiga. O se aso tatou te mafuta ai ma o tatou aiga.

E mafai ona tatou faalogologo i musika lelei, fai taaloga filemu, pe o foi e savalivali ma o tatou aiga. E manaia foi le faitau o tusitusiga paia, tala mai tusitusiga paia, po o Le Uo.

O le aso Sapati o se aso lelei e auauna atu ai i isi. E mafai ona tatou tusitusi ata pe tusi ni tusi i aiga, i e pele ia i tatou, i faifeautalai, po o tagata o loo tautua i le militeli.

O le isi foi auala tatou te auauna atu ai o le asiasi i tagata mamai, tagata matutua, faapea e pele ia i tatou.

Ua folafola mai e le Tama Faalelagi ma Iesu Keriso afai tatou te tausia ia paia le aso Sapati, o le a sili atu ona tatou fiafia ma maua le tele o faamanuiaga i o tatou olaga.