Ua Vaaitino Tamaitai Sili o Peru, Paraguay i Galuega o Fesoasoaniga Alofa

I se asiasiga ia Aperila i le Aai o Sate Leki, na vaaitino ai tamaitai sili o Peru ma Paraguay i le ala o loo faatautaia ai fesoasoaniga alofa ma le polokalama Uelefea a le Ekalesia.

Na asiasi atu Pilar Nores de García, o le tamaitai sili o Peru, ma Maria Gloria Penayo de Duarte, o le tamaitai sili o Paraguay, i le Lotoa o le Uelefea ma le Nofoaga Tutotonu o Fesoasoaniga Alofa e vaavaai ma faamalamalama atu i taitai o le Ekalesia a latou lava taumafaiga e fesoasoani ai i tagata i totonu o o laua lava atunuu.

Sa faamatalaina e le tamaitai sili o Peru i taitai o le Ekalesia, faiaoga ma tamaiti aoga o le Iunivesite o Polika Iaga ia lana polokalama o fesoasoaniga alofa o le Sembrando, o loo fesoasoani ai i tagata matitiva o Peru i nofoaga maualuluga. A o i ai le faletua ia García i Iuta, na ia iloa ai o le a tauaaoina atu e le Ekalesia i lona atunuu ni nofoa faataavalevale e 1,000 ma le 50 tone (45 tone) o le Atmit—o se taumafa faaopoopo e foia ai le tino vale ma le matelaina.

O le faletua ia Duarte ma sui mai Paraguay na latou tuufaatasiaina ni pusa se 48 o mea e aoga mo le soifua maloloina. O nei pusa e auina atu i eria ua faatamaia ma o loo i ai ni pulumu fulunifo, kulimi fulunifo, fasimoli, ma se fasi solo taele. Na faatulagaina ai foi se fuafuaga e faaauau ai ona tuuina atu e le Ekalesia le fesoasoani ma aapa atu e ala i le REPADEH (Paraguayan Network of Human Development), o le faalapotopotoga a le faletua ia Duarte i Paraguay. O le tausaga ua tuanai, i se tulaga faifaapaaga ma le Ekalesia, na tufatufaina atu ai e lenei faalapotopotoga le tusa ma le 2000 nofoa faataavalevale.