Vai Tipolo ma se Papā Falaoa
Ina ua ono o’u tausaga, na siitia lo’u aiga i se fale fou i le matou nuu o Quetzaltenango, i Kuatemala. I le aso na matou siitia mai ai, sa matou vaivai ma fia feinu. Na ave a’u e lo’u tuagane matua i le umukuka e aumai ai sa’u ipu vai, ae peitai sa le’i faaolaina mai le vai ma le uila.
Na matou le iloa po o le a le mea a fai. Ua po, ae matou te le iloaina se isi. I le taimi lava lena, na tuitui mai ai se tasi i le faitotoa. O ia o se tamaitai matua laufofoga fiafia ma le tausaafia. “Faafeiloai atu mai lo outou tuaoi,” o lana tala lea. “O a’u o Tenchita, o lo outou tuaoi. Na ou manatu atonu e leai ni tou vai, o lea la ua ou aumaia ai se vaitipolo ma se falaoa mo outou.”
Na matua ou fiafia e vaai atu i le vaitipolo ma na ou matua mata ataata. I ni nai aso mulimuli ane, na valaaulia ai i matou e Tenchita e auai i Le Ekalesia a Iesu Keriso o le Au Paia o Aso e Gata Ai ma sa ia tuuina mai se Tusi a Mamona.
E lei umi ae faia loa a matou lesona e faifeautalai, ma i le tolu masina mulimuli ane na luiina ai i matou ina ia papatisoina. Na talia e o’u uso ma tuagane matutua e toalima le lui, ae na lagona e o’u matua e le’i saunia i laua. Ae ui i lea, na faaauau pea ona auai i le lotu, ma na papatisoina ma faamauina i laua i le lua tausaga mulimuli ane, ina ua valu o’u tausaga.
Na ou laitiiti, ae na ou vaaia suiga na faia e le talalelei a Iesu Keriso i le matou aiga. E pei o aiga uma, na i ai o matou faafitauli, ae na faateleina pea fesootaiga ma le lotogatasi i lo matou aiga, ma na matou talitonu o le a oo mai fofo ona o aoaoga na matou maua i le Ekalesia moni. Na matou faafetai ona na faailoa mai e Tenchita ia i matou le talalelei, ae na lei umi ae siitia ese o ia, ma na matou le toe maua se tala mai ia te ia.
O le sefulutolu tausaga mulimuli ane, na faamauina ai lo’u aiga i le Malumalu o le Aai o Kuatemala i Kuatemala, ma na ou filifili e auauna atu i se misiona. I la’u eria muamua i le Misiona i le Aai i Saute o Kuatemala i Kuatemala, na masani ona ma asia tagata o le Ekalesia o e na gasegase pe na le toe toaaga mai. I se tasi aso na talosagaina ai i maua e le epikopo e asia se uso matua na gasegase ma sa le mafai ona tuua lona fale. Na ta’u mai e ia o le vai e sili ona fiafia i ai lenei uso o le vaitipolo.
Ina ua ma taunuu atu ma la’u soa i le fale, na taoto le uso i le moega, ae na ou iloaina o ia i le taimi lava lena ma fusi atu ia te ia. Na le iloa a’u e Uso Tenchita i le taimi muamua, ae ina ua uma ona matou talanoa mo sina taimi, na susulu lana vaai ina ua ia iloaina a’u. Na ataata o ia ma faapea mai, “Na ou avatuina le vaitipolo ma le falaoa mo outou.“
Na ou faafetai atu ia te ia mo le aumaia foi ia te a’u o le talalelei ma maua ai le avanoa ou te auauna ai i se misiona.
O le foai atu o se ipu vaitipolo ma se papā falaoa e faigofie ma taugofie, ae o le auala na foai atu ai e Uso Tenchita—faatasi ai ma lagona alofa ma lagona popole mo lo matou manuia faavavau—na matua taua ai ia mea. Na suia e ia lo’u olaga ma olaga o tagata o lo’u aiga. E faapena foi, e mafai ona tatou suia olaga o tagata e ala i le fesoasoani atu ia i latou e saili lo latou ala i le “vai o le ola” ma le “areto o le ola” (Ioane 4:10; 6:48).
I le taimi nei ua le na o vaitipolo ma falaoa matou te faasoaina atu i o matou tuaoi; ae matou te faasoaina atu foi le talalelei moni a Iesu Keriso.