O Le Taulaga Anapogi a Uso Ioane

Na ou le talitonu i le mea na ou vaai i ai. O lena ua tu mai o ia i le pulelaa. Ou te le’i vaai muamua lava ia Uso Ioane i le lotu, pe ou te faalogo foi ia te ia o fai sana molimau. I le isi masina mulimuli ane na toe sau foi o ia i le lotu ma toe fai foi lana molimau.

Na amata lava i le taeao o se tasi Aso Sa i le fonotaga a le komiti o taitai perisitua. Na avea au ma peresitene o Alii Talavou. Na faatoa uma lava ona matou faitau mai i le Tusitaulima o Faatonuga a le Ekalesia, ona nofo filemu lava lea o le epikopo, ma mafaufau loloto. Ona ia vaai mai lea ma fai mai, “Ou te manao i o tatou uso o le Perisitua Arona e amata ona o e ao mai taulaga anapogi mai tagata e le o toaaga mai.” Na ia talosaga mai ia i matou e faaaoga ai ma aoao ma ositaulaga.

Na faateia a’u. I Cape Town, i Aferika i Saute, o le toatele lava o tagata e vavamamao mea e nonofo ai. E tusa e 35 minute e alu ai le taavale mai le tasi itu o le matou uarota i le isi itu. E le’i aoina lava muamua e alii talavou se taulaga anapogi aua e le mafai ona savavali i fale o aiga—na matua mamao tele le va, ma na matou popole mo lo latou saogalemu.

A o matou talanoaina pe faapefea ona matou foia nei faafitauli, na maua faatasi e la matou komiti se fuafuaga. Na malilie le korama a le au toeaina e tofi uso e avea alii talavou i ni nai aiga i le Aso Toonai a o lumanai le Aso Sa anapogi. Na matou vaevaeina le uarota i eria ma tofi loa soa taitasi e asia ni nai aiga toaaga ma ni nai aiga le toaaga. Na matou iloa ai foi o le matou fuafuaga o le a maua ai le avanoa lelei mo uso e masani ai i le autalavou ma le autalavou foi e talia ai fautuaga mai toeaiina.

Ina ua matou faailoa atu le fuafuaga i alii talavou, na latou naunau e taumafai e fai. Na matou faamanatu atu ia i latou e fai ofu lotu ma o se vaega lea o lo latou tiutetauave paia e vaavaaia le uarota.

Na tofia a’u e ave lo’u uso laitiiti, o Anetelu. I le Aso Toonai na sosoo ai na ma asia tagata uma lava i le ma lisi, ae o le toatele lava o tagata e le’i i ai i o latou aiga. O le tagata mulimuli lava na ma asia o Uso Ioane, o lē ma te le masani lelei i ai.

Na oso i fafo Anetelu mai le taavale, tuitui le faitotoa, ma faatalitali. Na toetoe lava toe foi mai o ia i le taavale ae tatala mai loa le faitotoa. Na lulu e Anetelu le aao o Uso Ioane ma faapea atu, “Talofa, o lo’u igoa o Anetelu, ma ou te sau mai Le Ekalesia a Iesu Keriso o le Au Paia o Aso e Gata Ai. O taeao o le Aso Sa anapogi, ma ua talosagaina i matou e le epikopo e asia tagata o le Ekalesia e ao mai ni foai o taulaga anapogi latou te mananao e tuuina mai.”

Na ia tuuina atu ia Uso Ioane se teutusi. Na faateia Uso Ioane, ae na savali o ia i totonu ma le teutusi. Ina ua mavae ni nai minute na toe foi mai o ia mai le fale ma foliga ataata. Na faafetai ma le faaaloalo ia Anetelu ma tuuina atu ia te ia le teutusi. Na ou oso i fafo o le taavale, ma matou talanoa toatolu ai mo sina taimi. A o ma malaga ese, na talotalo faatofa mai Uso Ioane ia i maua ma faapea mai, “Tautuana e te lua o mai i le masina lea.” Na fiafia Anetelu i le taimi atoa e oo lava i le falesa, lea na ma tuuina atu ai a ma teutusi i se tasi o le au epikopo.

I le masina na sosoo ai na mautinoa ia ma asia Uso Ioane. Na toe ataata fiafia mai foi [o ia]. Ina ua mavae ni nai masina na amata ona auai o ia i le lotu i Aso Sa anapogi. O la ma asiasiga i le Aso Toonai na faamanatu atu ai ia te ia sauniga o le Aso Sa, ma na sau o ia i le aso na sosoo ai.

Na ma fiafia tele ina ua toe toaga Uso Ioane i le Ekalesia. Na ma lagonaina se fesootaiga faapitoa ma ia. E le mafai e upu ona faamatalaina le olioli na oo mai ia i maua ona ua toe foi mai se agaga e toatasi i le lafu. I ni nai masina, ua toaga mai o ia i aso uma, ma na vave ae valaauina o ia e auauna atu i le au peresitene o le korama a le au toeaina.

Mo maua, o le taualuga o lenei aafiaga na oo mai ina ua talosagaina Uso Ioane e lauga i le sauniga faamanatuga e uiga i sefuluai ma taulaga. I le faaiuga o lana lauga na ia taua ai le asiasiga muamua lava a Anetelu.

Ma ona loimata na ia faapea mai ai: “Anetelu, o le a e le iloaina lava le malosiaga na e faia i lo’u olaga i le taeao o lena Aso Toonai ina ua e oo atu i lo’u faitotoa ma le teutusi lanumoana. Atonu na e manatu o se faamaimau taimi, ae na oo mai faamanuiaga i lo’u olaga aua na e saunia se avanoa e totogi ai la’u taulaga anapogi. O lau auaunaga o se tasi lea o mafuaaga ua ou i ai iinei i le aso.”