Afai e Lele Sina Manu Itiiti i Lou Fofoga

Ina ua ou alu i fafo i lena taeao o le Aso Toonai, ou te lei faapea ifo ia te a’u lava, “Talosia ae lele mai sina manu itiiti i lo’u gutu i le aso lenei.” Ae na tupu ina o ou toleni. Na lele sa’o mai lava si manu itiiti i lo’u gutu! E le o a’u e sese. E leai ma se mea sese na ou faia. Ou te lei vaai atu foi o sau.

Faamata o le a sou manatu o le a le mea na ou faia ina ua masau mai le manu itiiti lenei i le va o o’u nifo? Ia, ou te lei mitimitiina ma faato’ato’a lelei so’u fiafia i lona manaia. Ou te lei tuua ai foi sei o’u vaai po o le a se mea e ono tupu mai ai. Ou te lei foloina. E lei lava foi se taimi ou te mafaufau i ai. Na ona ou anuina lava i fafo ma ou tamo’e pea, ma faaauau ona ou tuufeanu i le ala.

Ua lele ea sina “manu itiiti” i lou fofoga? Ua i ai ea se taimi ua e tau ai i se ata po o se pese po o se upu po o se manatu le talafeagai e aunoa ma sou fuafuaina? Atonu ua e oo i ai. O loo siomia i tatou i uunaiga leaga, ma a o tatou taumafai i auala e tele e tetee i latou, atonu o le a tatou oo i ai e aunoa ma se tau fuafuaina. O nei manu ninii faaleagaga e matua matuia le oona—e sili atu ona oona i o tatou agaga nai lo lena manu itiiti sa i lo’u tino.

O le a le mea e tatau ona e faia pe a lele se tasi o manu ninii faaleagaga i lou fofoga? E tatau ona e faia e pei o le faiga na ou faia i le manu itiiti lea na lele i lo’u gutu: Anu i fafo! Aua e te faatali. Savali ese. Tamoe ese pe a manaomia. Tape le TV. Tape le leitio. Tape le komepiuta. Tiai ese le tusi po o le mekasini i le lapisi lea e tatau ona tuu i ai.

Faaaoga le mea na taua e Peresitene Polika Iaga (1801–77) o le “malosi faalemafaufau o le faatuatua.” Na faapea mai o ia: “A mavae sina taimi o le a liua le lalolagi e tusa ai ma afioga a perofeta, ma o le a tatou vaaia ai le oo mai o le nofotupu o le amiotonu, ae o le a aveesea le agasala ma le leaga. Ae o mana ma mataupu faavae a le tiapolo, pe afai e mafai ona taua o mataupu faavae, o le a le gauai atu lava i sina vaega o le savaliga agai i luma a le Faaola, sei vagana ua latou faavaivai i lea taimi ma lea taimi, ma o le a tatou tuliese ai loa le tiapolo e ala i le faamalosi. Ioe, e ala i le malosi o le faatuatua, ma galuega lelei, ma o le a faatupulaia, ma faasalalauina, ma tupu ma olaola ai lava le savaliga agai i luma o le Talalelei.”¹

Na saunoa mai Peresitene Iaga e faatatau i a tatou taumafaiga e faatumuina le lalolagi i le talalelei, ae o lana saunoaga e aoga foi i a tatou taumafaiga e faatumuina o tatou olaga i mea lelei. Uunai malosi ese lena manatu po o lena ata leaga mai lou mafaufau e ala i le usuina o se viiga, taulotoina o se mau, faia o se tatalo. “Aua le faatoilaloina oe i le leaga, a ia e faatoilaloina le leaga i le lelei” (Roma 12:21).

Manatua le mea o loo aoaoina mai pea lava pea e Peresitene Gordon B. Hinckley ia i tatou e uiga i ponokalafi:

“Ioe ua faaosoosoina outou. E foliga mai ua lofia le lalolagi atoa i le lagona feusuai. I se uiga tau faasese ma le faaoleole, ua soona lafo atu ai lagona feusuai ia te oe e le aunoa. Ua e vaai i ai i le televise, i mekasini ma tusi, i vitio, e oo lava i musika. Fuli i ai lou tua. Alo ese ai. Ou te iloa e faigofie ona fai atu faapena, ae faigata ona fai. Peitai o taimi uma lava e te fai atu ai faapena, o le a faigofie atu i le isi taimi. O se mea o le a matagofie lava pe afai e i ai se aso e mafai ai ona e tu i luma o le Alii ma fai atu, ‘Ou te mama.’

“Sa tuuina mai e le Alii se poloaiga i o tatou taimi, lena e faatatau ia i tatou taitoatasi. Ua Ia fetalai mai, ‘Ia teuteuina ou manatu i le mama e le aunoa.’ Ma i le faia o lea mea ua Ia tuuina mai ai foi se folafolaga, ‘Ona malosi ai lea o lou faatuatua fai ifo i luma o le Atua’ (MFF 121:45). Ou te talitonu o loo fetalai mai o Ia afai e mama le mafaufau ma le tino, e oo mai le taimi e mafai ai ona tatou tutu ma le mautinoa i luma o le Alii… . O le a i ai se lagona mautinoa ma o le a i ai se laufofoga fiafia mai o le faamaonia.”²

Manatua: afai e lele sina manu itiiti i lou fofoga, ia anu vave i fafo!