Ua Lava Le Televave

A o ou laitiiti, na avea le Aso Sa anapogi ma avega mamafa. Na gogolo lo’u tamai manava i le aso atoa, ma na faigata ona ou faatali mo le taimi o le aiga o le afiafi lea e mafai ona tatala ai la’u anapogi. E oo mai i le taumafanafana a o lumanai lo’u tausaga i le vasega ono, ua amata ona ou maua se malamalamaaga tele e uiga i le mataupu faavae o le anapogi, ma e oo mai loa lea malamalamaaga, ae tupu loa—ua ou ma’i.

O le ma’i lea e le o se fulū masani foi. Na uiga ese mea na tutupu i lo’u tino, ma e leai ma se isi na foliga mai e iloa pe aisea. Ina ua mavae le fa masina ma le tele o asiasiga i le le mafaitaulia o fomai faapitoa, ona oo mai lea ia te a’u o le tali. Na suesueina lo’u mai ma iloa ai o se mai tulaga ese e oo mai ai ia te a’u le fia inu soo ma aafia ai i le matutu o le vai o le tino. Talu ai o se mai e le taatele, na le mafai ai ona ta’u mai e fomai ia te a’u pe o le a le tulaga o le a i ai lo’u olaga mai lea aso i lea aso. Sa na ona aumai lava o vai ma le faamoemoe o le a fesoasoani ia te a’u.

Ina ua oo mai la le Aso Sa anapogi e sosoo ai, na ou taumafai ou te anapogi mai mea taumafa ma le vai, e pei lava ona ou masani ai. O se sese tele lea. Ona o lo’u mai, o le anapogi mai le vai mo ni nai itula laiti ou te tigaina ai lava, e pei lava ona vave ona ou iloa i le taimi lea.

Na matuai ou le fiafia i lea tulaga. “Afai ou te inu a o ou anapogi,” o lo’u manatu lava lea ia te a’u, “o le a le atoa le anapogi! O le a le lava mea ou te faia!” Na lofituina ai a’u i lea manatu mo le tele o masina. Na matua ou suesueina mau e faatatau i le anapogi ma matua tatalo ai e uiga i lenei faafitauli. Na ou talanoa foi i o’u matua faapea taitai o Tamaitai Talavou e uiga i ai, ae na le mautonu pea o’u lagona.

Na oo mai ia te a’u le tali i le taeao o se tasi o Aso Sa anapogi a o ou faitauina le tala i tupe iti a le fafine ua oti lana tane i le Feagaiga Fou (tagai Mareko 12:41–44). O le taulaga a le fafine ua oti lana tane e laitiiti i le vaaiga a le lalolagi, ae na taliaina ma le alofa e le Faaola aua na Ia silafia o mea uma lava ia na ia te ia. Na ou iloa ai o la’u anapogi ua lava ma totoe aua o le mea sili lea e mafai ona ou faia. Na le fuatia e le Alii la’u taulaga e faatusatusa i taulaga e faia e isi, ae faatusatusa i le mea e mafai ona ou tuuina atu.

Talu mai lena aso ua tupu ia te a’u se molimau maumaututu o le anapogi. Ua ou aoaoina e tatau foi ona ou suesue ma tatalo a o ou anapogi ina ia mafai ai ona faatasi mai le Agaga ia te a’u. Ae sili ai ona taua, ua ou aoao ina ia tuuina atu i taimi uma le mea sili ou te mafaia, ma ua lava lava lena. E le finagalo le Alii tatou te tuuina atu se mea e sili atu nai lo le malosi ua ia i tatou (tagai Mosaea 4:27).