Mo se Taulaga Mu

“Ua faapea mai foi le Atua ia Aperaamo, O Sarai lau avā … Ou te faamanuia foi ia te ia, ma ou foaiina atu foi se atalii mo oe mai ia te ia. …Ona faapaū fao lea o Aperaamo, ma [sa olioli]” (Kenese 17:15–17; tagai Joseph Smith Translation, Genesis 17:23).

Na ou alaga i le fiafia. Atonu na lagonaina e la’u aoga atoa. Na pulato’a mai isi tamaiti aoga ia te a’u, ma fia iloa pe aisea ua ou alaga ai, ae na le mafai ona ou taofiofia lo’u fiafia ina ua ou vaai i lo’u igoa i le lisi o tamaiti aoga ua talia i le iunivesite sili ona lelei i Filipaina. Na matua ou lagona lo’u faamanuiaina.

“E te faaigoa foi ia te ia o Isaako: ou te faatumauina foi la ma feagaiga ma ia, atoa ma ana fanau, pe a mavae atu o ia” (Kenese 17:19).

Ina ua iloa e tagata o le a ou alu i le iunivesite, na latou vaavaai mai ia te a’u ma le maofa. I taimi ou te mafaufau ai i ai, e le mafai ona taofi lo’u ataata. Na mautu lo’u lumanai. Na matua ou faafetai i le Alii mo le fesoasoani mai ia te a’u ua manuia ai le suega e ulufale atu i le iunivesite.

“Ua mavae ia mea, ona [tofotofo] lea o le Atua ia Aperaamo, ua faapea atu ia te ia, Aperaamo: … Ia e ave lou atalii, o lou atalii e toatasi, o le ua pele ia te oe, … ma e avatu ia te ia … e fai ma taulaga mu” (Kenese 22:1–2).

“Le Tama Faalelagi, e le mafai ona ou alu i se misiona i le taimi lenei. E ese le tele o faamanuiaga iinei mo a’u. Tuu mai a’u e faaauau a’u aoaoga. A maua lo’u tikeri, o le a ou alu ma talai Lau talalelei.

“E manaomia ona faaauau a’u aoaoga, Tama. Ou te manaomia lenei mea mo lo’u lumanai.

“Ua e silafia ua maea ona ou taumafai e tauanau le ulu o le matagaluega e tuuina mai ia te a’u se faatagaga mo se avanoa e toesea ai mo le lua tausaga. Na te le’i faatagaina. Na fai mai o ia ou te tusi talosaga e faate’a aloaia au mai le iunivesite pe afai ou te filifili ou te alu.

“Le Tama Faalelagi e, e le mafai ona ou alu i se misiona i le taimi lenei. Ou te manaomia lenei mea mo lo’u lumanai.”

“Ua ave foi e Aperaamo le fafie e fai a’i le taulaga mu, ma faaee ai ia Isaako lona atalii, ua ave foi e ia i ona lima le afi ma le polo; ona o ai lea o i laua” (Kenese 22:6).

Na mamafa lo’u loto ina ua ou ulufale atu i le faitotoa o le ofisa o le failautusi o le kolisi. O le a ta’u mai e ia ua faaletonu lo’u mafaufau, o le a ou ositaulagaina se lumanai manuia. E faapefea ona ou faamalamalama atu ia te ia ua valaauina au e le Alii?

“Ua oo atu i laua i le mea ua ta’uina mai e le Atua ia te ia; ona faia lea e Aperaamo o le fata faitaulaga i lea mea, ma faaafu le fafie; ua na fusifusi foi lona atalii o Isaako, ma faaee ia te ia i le fata i luga o le fafie. Ona aapa atu lea o Aperaamo lona lima i le polo, o le a fasioti lona atalii.” (Kenese 22:9–10).

“Ua ou sau e vaai le failautusi o le kolisi.”

“E uiga i le tusi talosaga e faate’a aloaia au.”

“Leai, o loo lelei le tulaga o o’u togi i le aoga.”

“Leai, ou te le o aafia i ni faiga faasolitulafono.”

“O le mafuaaga? Ua ou maua se valaau mai Le Ekalesia a Iesu Keriso o le Au Paia o Aso e Gata Ai e auauna atu i se misiona talai mo le lua tausaga. E tatau ona taofi a’u aoaoga i le iunivesite ina ia ou auauna atu i le Alii.”

“Leai, e le mafai ona tolopoina le misiona, ma o le a ou auauna atu mo le lua tausaga.”

“Ou te iloa o lona uiga e le mafai ona ou toe foi mai.”

“Ona valaau ifo lea o le agelu a Ieova ia te ia mai le lagi, ua faapea mai, … Soia le oo lou lima i le tama, aua foi e te fai se mea e tasi ia te ia; aua ua ou iloa nei ua e mata’u i le Atua, ina ua e le taofia lou atalii, o lou atalii e toatasi, a ua e tuu mai ia te au.” (Kenese 22:11–12).

“E a? E mafai ona ou talosaga mo se avanoa e toesea ai mo se vaitaimi? Na fai mai le ulu o le matagaluega o le a tatau ona ou alu ese ma le iunivesite aua e na o le tasi le tausaga e mafai ona faatagaina e toesea ai.”

“Na suia lata mai nei le tulafono a le iunivesite? Atonu na te le’i iloaina lena tulaga, ou te le’i iloaina foi.”

“Faafetai tele lava.”

“Ua toe valaau ifo le agelu a Ieova ia Aperaamo mai le lagi, … faapea mai, … o le mea lea ou te matua faamanuia ai ia te oe, ma ou matua faatoateleina lava lau fanau e pei o fetu o le lagi, e pei o oneone foi i le matafaga; … o lau fanau foi e manuia ai atunuu uma lava o le lalolagi; aua ua e usiusitai i la’u upu” (Kenese 22:15–18).

Ina ua maea ona ou auauna atu i le Misiona a Filipaina Ilagan mai le 2000 i le 2002, na faaauau a’u aoaoga i le Iunivesite o Filipaina i le Aai o Quezon ona ou siitia ai lea i le Iunivesite o Polika Iaga—Hawaii. O loo ou faamoemoe ou te faaipoipo ma atiina ae so’u aiga i le talalelei.

E finagalo le Alii ia tatou ositaulaga mea uma ia te Ia. E le faapea o lona uiga o le a tatou le maua faanaunauga o o tatou loto. O nisi taimi na o Lona fia silafiaina pe o le a tatou faamuamua o Ia.