Ua Valaauina le Toatolu i le Au Peresitene o Fitugafulu

Na lagolagoina Elder Quentin L. Cook e avea ma uso o le Korama Muamua a Fitugafulu i le aso 4 o Aperila 1998. Na auauna atu o ia i le Korama Lona Lua a Fitugafulu mai ia Aperila 1996 e oo atu ia Aperila 1998. I le avea ai ma se sui o le Au Peresitene o Fitugafulu, o loo ia te ia le tiute o le vaaia o le Eria a Amerika i Matu, Saute i Sasae.

Na avea Elder Cook ma Faatonu o le Matagaluega o Faifeautalai ma sa avea foi ma Peresitene o Eria a Amerika i Matu, Matu i Sisifo, ma Atumotu o le Pasefika. Na auauna atu foi o ia o se fesoasoani lua i le Au Peresitene o le Eria a Filipaina/ Maikolonesia.

Na maua lona tikeri o le tagata malaga i mataupu faaupufai o malo mai le Iunivesite o le Setete o Iuta ma le tikeri o le fomai i mataupu tau tulafono mai le Iunivesite o Stanford. I le taimi na valaauina ai o ia o se uso o le Au Pulega Aoao, sa avea o ia ma sui taitaifono o le Sutter Health System. Na auauna atu muamua o ia o se peresitene ma se ofisa sili o le California Healthcare System. O luma atu o lena taimi na avea ai o ia ma se tasi o le pulega faapaaga o le Carr, McClellan, Ingersoll, Thompson ma Horn, o se ofisa loia i le San Francisco Bay.

Na auauna foi Elder Cook o se faifeautalai faamisiona i le Misiona a Peretania, ma se epikopo, fesoasoani i le peresitene o le siteki, peresitene o le siteki, sui risone ma se Fitugafulu Eria.

Na soifua mai Quentin LaMar Cook i le aso 8 o Setema, 1940 i Logan, Iuta, ISA. Na faaipoipo atu o ia i a Mary Gaddie ia Novema 1962. E toatolu o laua alo ma a latou fanau e toaiva.

Na lagolagoina Elder Claudio R. M. Costa e avea o se uso o le Korama Muamua a Fitugafulu i le aso 31 o Mati 2001. Na auauna atu o ia i le Korama Lona Lua a Fitugafulu mai ia Aperila 1994 seia oo atu ia Mati 2001. I le avea ai ma se sui o le Au Peresitene o Fitugafulu, o loo ia te ia le tiute o le vaaia o le Eria a Idaho.

Sa avea o ia ma Peresitene o Eria a Amerika i Saute Matu ma Pasila i Matu, ma sa avea foi ma se fesoasoani i le Au Peresitene o Eria a Pasila ma Amerika i Saute i le itu i Saute.

Sa aoga o ia i mataupu tau fefaatauaiga i São Paulo a o talavou ma mulimuli ane ai auauna atu mo le 13 tausaga i tofiga eseese i totonu o le Ofisa o Aoga a le Ekalesia. Na valaauina o ia o se uso o le Au Pulega Aoao, ao avea ma faatonu o mataupu faalelotu a le Ekalesia i totonu o São Paulo.

Sa auauna atu o ia i le Ekalesia o se faiaoga o le seminare ma le inisitituti, fesoasoani i le epikopo, epikopo, fautua maualuga, fesoasoani i le peresitene o le siteki, peresitene o le misiona, ma se sui risone.

Na fanau Claudio Roberto Mendes Costa i Santos, Pasila, i le aso 25 o Mati, 1949. Na faaipoipo atu o ia i a Margareth Fernandes Morgado i le 1978. E toafa o laua alo ma e toatasi se atalii ma ni afafine e toatolu a le la fanau.

Na lagolagoina Elder Steven E. Snow e avea o se uso o le Korama Muamua a Fitugafulu i le aso 31 o Mati 2001. I le avea ai ma se sui o le Au Peresitene o Fitugafulu, o loo ia te ia le tiute o le vaaia o le Eria a Amerika i Matu Tutotonu.

O Elder Snow sa auauna atu o se Faatonu Sili o le Matagaluega a le Au Perisitua, o se Peresitene o le Eria a Aferika i Sautesasae, ma sa avea foi ma se fesoasoani i le Au Peresitene o le Eria lava lea e tasi.

Na maua e Elder Snow le tikeri o le tagata malaga i mataupu tau tausitusi i le Iunivesite o le Setete o Iuta, ma lona tikeri o le fomai o tulafono i le Iunivesite o Polika Iaga.

A o le’i valaauina o ia e auauna atu o se tasi o le Au Pulega Aoao, sa avea Elder Snow ma paaga sinia o le ofisa loia o Snow Nuffer. Na ia lagolagoina malosi le itu tau i aoaoga, ma na auauna atu ai o se sui ma le peresitene o le fono faatonu a lana aoga i le lotoifale, Taitaifono o le Fono Faatonu a Regents o le Setete o Iuta, ma le Taitaifono o le Komisi a Setete i Sisifo mo Aoaoga Maualuluga.

Sa auauna atu foi Elder Snow o se faifeautalai faamisiona i le Misiona a Siamani i Matu, ma sa avea ma se epikopo, fautua maualuga, peresitene o le siteki, peresitene o le Misiona a Kalefonia San Fernando, ma se Fitugafulu Eria.

Na fanau Steven Erastus Snow i le aso 23 o Novema, 1949 i St. George, Iuta, ISA. Na faaipoipo atu o ia i a Phyllis Squire ia Iuni 1971. E toafa o laua alo tama ma a latou fanau e toaono.