Tala Faamama’i o le Talalelei
Tagata Le Taualoa, Valaauga Taualoa
“Po o ni tagata faaletino ea le Au Pulega Aoao?” Ou te manatu o se tasi lenei o fesili o loo i ai i le tele o mafaufau o tagata, ma sa i ai lava mai le amataga lea manatu. Ma o lea lava manatu ua tupu mai ona o le natura o mea, ona o le faaaloaloga maualuga ua tuuina atu i uso o e ua valaauina i nei tofiga.
Ou te manatua se tasi mea na tupu i le amataga lava i le talafaasolopito o le Ekalesia, i ona po o sauaga ma faigata. O le taimi lea sa avea ai Heber C. Kimball ma se tasi o le Aufono a le Toasefululua, ma sa i ai o ia i se tulaga sa ia sailia ai se fesoasoani mai se tasi o le Ekalesia, o se tamaitai lea ua oti lana tane. Sa ofoina atu e lenei tamaitai ia te ia le falaoa ma le susu, ma sa faapea foi ona ia saunia se potu ma se moega mo ia e tofa ai. Sa alu atu lenei alii e malolo. Sa oo ifo le manatu i lenei tamaitai: “O le avanoa lelei lenei mo au. E tatau ona ou iloa (o le fesili lava lenei e tasi ua oo mai i lona loto: “Po o ni tagata ola le Au Pulega Aoao), ou te fia iloa lava po o a upu a se Aposetolo e fai pe a tatalo i le Alii.” Ina ua uma ona tapunia le faitotoa, sa tolotolo malie atu o ia i tua o le faitotoa e faalogologo ai. Sa faalogo atu o ia ua nofo Uso Kimball i luga o le moega. Sa faalogo atu o ia ua tuu ona seevae i luga o le fola. Ma sa ia faalogo atu ua faalagolago o ia i le moega ma ta’u upu nei: “Le Alii e, ia faamanuia mai Heber; ua vaivai lava o ia.”
… O se mataupu lea e tele lava ina i ai talitonuga po o malamalamaaga sese. E toatele foi tagata sa i ai i o latou manatu lenei fesili e tasi i le taimi o Iosefa Samita. Sa saunoa mai le Perofeta i upu nei: “Na faafeiloai a’u i le taeao nei e se tagata mai sasae. Ina ua faalogo i lo’u igoa, na ia faapea mai o a’u lava ua na o se tagata, e faailoa mai ai i lana tala, na ia manatu o se tagata ua finagalo i ai le Alii e agavaa e faaalia i ai Lona finagalo, e tatau ona avea o se mea e sili atu nai lo se tagata. Na foliga ua galo ia te ia le faamatalaga na pau mai i fofoga o Iakopo, faapea o [Elia] o se tagata e i ai ona lagona faapei lava o i tatou, ae peitai na maoae ia te ia le mana ma le Atua, o lea na Ia tapunia ai le lagi ma lē toina mai ai ua mo le tolu tausaga ma le ono masina, o se tali i ana tatalo; ma na toe faapea foi, e tali ai i ana tatalo, na to ifo lea o le ua mai le lagi, ona fua mai ai lea o le eleele i ona lava fua [tagai Iakopo 5:17–18]. E moni lava, e faapena le pogisa ma le le malamalama o lenei augatupulaga, ua latou vaai atu i ai o se mea uiga ese pe afai e [talanoa] le tagata ma lona Foafoa.”1
O le talitonuga lenei o le lalolagi lautele: “Afai e i ai se mea faapena e pei o se perofeta, o ia lea ua matua faamamaluina ma faaeaina ma e tulaga ese lava o ia mai le tulaga e masani ai le soifuaga o tagata.” Atonu e mafai ona latou manatu ane ia Ioane le Papatiso sa nofo o ia i le vao ma ’ai ai se akerise ma melivao, po o se tasi foi e pei o Enoka o le na taua e le nuu, “Ua sau ia te i tatou se tagata o le vao” [tagai Mose 6:38].
E tai faapena lava le talitonuga o loo i ai i tagata o le Ekalesia i nei ona po e tusa ai ma lea mataupu. Tatou te manatu i le faaaloalogia ma le mamalu ma le silisili o lenei tofi. Ma oo ai ina masua nisi o ia lagona ma faaaogaina ai i se ua umia lea tofi.
O loo i ai se tasi ala lelei e mafai ona tuu i ai lenei mataupu i lona tulaga e tatau ai. Ina ia le faaaogaina le fesili lea, “Po o ni tagata faaletino le Au Pulega Aoao?” Ou te fia fesili atu faapea ia te oe, “Po o se tagata faaletino ea lou epikopo?” O le a se tali e tatau ona tuuina mai? Po o lo’u faapea atu foi ia te oe, “Po o ni tagata faaletino ea faifeautalai?” pe mata ea o le tali o le ioe po o le leai? E matua faalagolago la lena i le mea tonu o loo tatou tautala agai i ai. Ioe, o i latou o tagata faaletino i le tulaga lea ona o tiga ma puapuaga uma o le tino e oo i le fanauga a tagata, e mafai foi ona oo ia te i latou ma i tatou uma. Peitai, i le tasi itu, o le Au Pulega Aoao o le Ekalesia, ma epikopo ma faifeautalai—ma faapea foi ona oo atu lea faasologa i tagata uma o le Ekalesia—e le tatau ona avea i latou ma tagata faaletino i le manatu i mea faalelalolagi, po o le sailiga o mea o le lalolagi. Ma e le tatau la ona i ai se tasi o i tatou e avea ma se “tagata faaletino” pe afai e faatatau i le olaga o loo ola ai tagata e faalelalolagi.
Ina ua tatou ulufale mai i le Ekalesia, tatou te faapea atu ua tatou lafoai i le lalolagi. E ao ia te i tatou ona faatoilalo le lalolagi. O le faamatalaga a le Tusi a Mamona e faapea ia tatou tuu ese le tagata o le agasala ma ia avea ma se tagata paia e ui mai i le togiola a Keriso le Alii (tagai Mosaea 3:19). Ioe, afai e mafai e i tatou uma ona ola ai e tusa ma lo tatou malosi ma taitaiina i tatou lava i tulaga faatonuina e tatau ona tatou ola ai, o le a leai lava se tasi o i tatou e avea ma se tagata e faalelalolagi. Ae ui i lea, i se tasi foi itu e mafai foi ona avea i tatou ma tagata e faalelalolagi i le itu lenei, o i tatou uma lava o tagata faaletino atoa ma mea uma o loo aofia ai.
I lalo o le ulutala lenei, “Au Pulega Aoao” i la’u tusi e taua o le Mormon Doctrine, sa ou tusia ai le faamatalaga lenei: “O nisi o le Au Pulega Aoao ua faamamanaina e faia e nisi le tasi mea a o isi se isi mea. Ma o i latou uma lava e tatau ona gauai atu i tulaga e pei ona tuuina mai e le Alii i taimi uma lava i lana au paia atoa ma e ua pulefaamalumalu ai ia te i latou. O tulaga ua latou umia e maualuluga ma faaeaina, peitai o i latou o e ua umia nei tofiga o ni tagata faatauvaa e pei lava o o latou uso i le Ekalesia. O tagata o le Ekalesia ua agavaa ma ua matua lelei ona aoaoina ma e mafai foi e le toatele o uso—pe afai e valaauina, ma taliaina, ma faamanuiaina—ona auauna atu i le tele o tulaga i le Ekalesia.”2
I se tasi vaega i lea lava tusi i lalo o le ulutala lea, “Perofeta” o loo i ai le faamatalaga lenei: “E ui lava ina maua musumusuga ma le silisili e i latou ua taua o perofeta, ae o i latou lava o ni tagata faaletino e i ai foi o latou sese e pei ona i ai i tagata uma lava. E i ai o latou manatu ma o latou vaivaiga ma faapea foi ona tuuina atu ia te i latou lava e foia o latou faafitauli atoa ma le le mauaina o le musumusuga i le tele o taimi. Sa tusia e Iosefa Samita faapea ‘sa talanoa o ia ma se uso ma se tuafafine mai Michigan, sa manatu faapea “o se perofeta o se perofeta i taimi uma lava”; ae sa ou tau atu ia te i laua o le perofeta e avea ma perofeta pe afai e galue ai faaperofeta.’”3
E faapea foi la i mafaufauga ma manatu, e oo lava i se perofeta, e mafai ona i ai ni sese, vagana o ia manatu ma mafaufauga ua musuia e le Agaga. O tusitusiga paia po o faamatalaga musuia e tatau ona talia e tusa ai ma lena tulaga. O loo i ai lea faafitauli ia te i tatou. E pei o Paulo o se tasi lea o perofeta sili ona tautaua i le atamai, ae sa i ai foi nisi ona manatu sa le matua talafeagai lelei ma le finagalo o le Alii, ma sa tusia e ia nisi o ia manatu i ana tusi. Ae ona o lona atamai ma le faautauta, sa tautino mai lava e ia o ia mea o ona lava manatu. Sa faapea mai o ia, “O lo’u manatu lenei.” Ina ua uma ona ia faamatalaina mai lea manatu, sa ia faapea mai, “O le finagalo lenei o le Alii.” Sa iloa e Paulo o ona lava manatu, sa le atoatoa e pei o le tulaga e tatau ona i ai.
O perofeta, o tagata i latou, ae afai e galulue i latou i le Agaga o musumusuga, o le mea ua latou fai mai ai o le fofoga lava lea o le Atua; ae peitai o i latou lava o ni tagata faaletino ma e mafai lava e i latou ona i ai o latou manatu ma o latou lava taofi faaletagata. Ona o le tofa loloto ma le faautautaga o i nei tagata, o o latou manatu e mafai lava ona lelei e pei ona i ai i tagata faaletino, ae vagana ua musuia i latou, vagana ua i ai i latou i le agaga o faaaliga, e mafai lava ona i ai o latou sese e pei ona i ai i soo se tasi i le Ekalesia.
E le tatau ona faamaumauina lo tatou taimi e mafaufau ai pe mata o tautala le Au Pulega Aoao o le Ekalesia i le Agaga o musumusuga pe leai—aua o le mea mautinoa lava e mafai ona tatou iloa lena mea. Ou te faamanatu atu ia te outou se tasi o faamatalaga sili ona tautaua a le Perofeta o Iosefa Samita e faatatau lava i lenei mataupu e faapea: “E leai se mea e faaali mai e le Alii ia Iosefa na te le faaalia i le Toasefululua ma e oo lava i se tagata faatauvaa o le Ekalesia pe afai e lavatia e ia ona tauaveina.”4
Ua sao lava lea tulaga. O lea foi le mataupu sa aoao mai e Paulo. Sa fai mai Paulo, “Aua tou te mafaia ona perofeta uma taitoatasi.” Fai mai a ia, “ia outou naunau ina ia perofeta.” (1 Korinito 14:31, 39). O tagata uma o le Ekalesia e tatau ona latou maua faaaliga. E le faapitoa na o ni tagata toaitiiti ua filifilia, e pei o faifeautalai po o epikopo. E tatau ona maua e i tatou faaaliga. O i tatou uma lava e tatau ona avea e faapei o aposetolo ma perofeta.
Mai se tala na lomia i le New Era o Ianuari 1973; faaonaponei faailoga ma mataitusi tetele.