Ako nabunyagan mga usa na ka tuig ang milabay, ug ako nagpasalamat sa Ginoo sa pagpadala sa mga misyonaryo sa akong panimalay. Salamat sa mga kasulatan ug mga pagtulun-an sa mga propeta nga gimantala sa Liahona, ako mas nakasabut na niini nga kinabuhi ug sa gugma sa Dios alang kanako ug alang sa akong pamilya. Ang mga kasulatan ug mga pagtulun-an sa ebanghelyo diha sa Liahona milig-on sa akong pagpamatuod, mitabang kanako sa paglambo, ug miamuma sa akong kalag. Ako nag-awhag sa tanan nga mobasa sa Liahona; kini nagtabang kanato nga mas maduol sa atong Amahan ug naggiya kanato sa sakto nga dalan.

Ako mapasalamaton sa Liahona, ilabi na ang isyu kabahin sa Manluluwas (Marso 2008). Kini nagdasig kanako ug naglig-on sa akong pagpamatuod kabahin Kaniya. Iyang gibuhat ang tanang butang para kanato. Siya mipakita sa hingpit nga ehemplo unsaon sa pagpuyo niini nga kalibutan, unsaon sa pagbuntog sa mga pagsulay, ug unsaon nga dili matarug sa pagsunod sa mga sugo. Ako mapasalamaton kaayo sa Manluluwas. Ako nasayud nga Siya buhi. Siya andam nga mohupay kanato sa kanunay ug mopakita kanato sa agianan. Ang atong buhaton mao lamang ang pagduol ngadto Kaniya.