Pagtabang sa Uban

Sa pagpangita sa tinuod nga kalipay, kinahanglan nga kita mopokus dili lamang sa atong mga kaugalingon. Daghan ang nagpasakop sa Simbahan—o bisan man lang nakahibalo ug nagtahud sa Simbahan—tungod kay adunay naningkamot sa pagtabang sa uban. Akong ipaambit kaninyo ang bililhon nga kasinatian sa pamilya diin nagsugod kini niadtong 1959, sa dihang ako gitawag sa pagdumala sa Canadian Mission sa Toronto.

Ang among anak nga babaye, nga si Ann, mosingko anyos sa wala madugay human sa pag-abut namo sa Canada. Iyang nakita ang mga misyonaryo nga naghimo sa ilang trabaho, ug siya usab gusto nga mahimong misyonaryo. Ang akong asawa mipakita og pagsabut pinaagi sa pagtugot ni Ann sa pagdala og pipila ka kopya ngadto sa eskwelahan sa Children’s Friend [karon gitawag nga ang Higala]. Kadto dili pa igo alang ni Ann. Gusto niyang dad-on ang kopya sa Basahon ni Mormon aron iyang mahisgutan ngadto sa iyang magtutudlo, nga si Miss Pepper, ang mahitungod sa Simbahan.

Mga pipila pa lamang ka tuig ang milabay, daghang mga tuig na human kami makapauli gikan sa Toronto, mipauli kami gikan sa usa ka bakasyon ug nakita sa among sudlanan sa sulat ang usa ka sulat gikan ni Miss Pepper nga mabasa:

Minahal nga Ann:

Hunahunaa ang daghang mga tuig na nga milabay. Ako ang imong magtutudlo sa Toronto, Canada. Nadasig ako sa mga kopya sa Children’s Friend nga imong gidala sa eskwelahan. Nadasig ako sa imong dedikasyon sa usa ka libro nga gitawag og Basahon ni Mormon.

>Nanaad ako nga moabut ang adlaw nga ako moadto sa Siyudad sa Salt Lake ug susihon ngano nga ikaw naghisgut niini ug ngano nga ikaw nagtuo sa paagi nga imong gituohan. Karon nakaangkon ako og pribilehiyo sa pag-adto sa inyong visitors’ center sa Temple Square. Salamat sa singko anyos nga batang babaye kinsa nakasabut sa iyang gituohan, ako karon mas nakasabut na sa Ang Simbahan ni Jesukristo sa mga Santos sa Ulahing mga Adlaw.

Si Miss Pepper namatay sa wala madugay human niana nga pagbisita sa Siyudad sa Salt Lake. Pagkamalipayon ni Ann sa dihang mitambong siya sa Templo sa Jordan River Utah ug mipahigayon sa buhat sa templo alang sa iyang minahal nga magtutudlo nga iyang gitabangan sa daghan nang mga katuigan ang milabay.