Mga Tawo nga Angayang Sundon

Ang unang mga tawo nga angayang sundon kinsa mipresentar sa ebanghelyo ngari kanako mao ang mga misyonaryo kinsa mitudlo sa akong pamilya dinhi sa Pilipinas. Ang ilang mga ehemplo adunay dakong impluwensya sa among desisyon sa pagpasakop sa Simbahan. Mapailubon sila kanamo, ug kanunay silang nagdala og maanindot nga espiritu.

Samtang kami bag-o pa nga mga miyembro, kami nakahimamat og usa ka tawo kinsa mibiya sa Simbahan. Siya mihatag kanamo og daghang mga literatura batok sa Mormon, ug ako natingala. Mao kadto ang una nakong pagkasugat og oposisyon sa Simbahan, ug ang akong pagpamatuod tandugonon pa kaayo. Samtang siya nakigharong kanamo ug miatake sa tanang gipangtudlo sa mga misyonaryo ngari kanamo, ako napuno sa kahadlok. Apan kon ang mga misyonaryo anaa uban kanamo, sila nagdala og kalinaw. Tungod sa mga misyonaryo, ang among pamilya nakakat-on sa pag-ila sa kalainan tali sa hugot nga pagtuo ug sa kahadlok, ug kami mipili sa hugot nga pagtuo.

Sa wala madugay ang akong amahan ug ako na-assign nga magkapares sa home teaching. Ang among unang buluhaton mao ang pagbisita sa mission president ug sa iyang asawa. Sila maabi-abihon kaayo. Ang akong amahan may dala pa nga daghang tradisyon gikan sa among karaang tinuohan. Apan sila mabination, dili masinawayon, sa pagpasabut nganong ang mga butang pagahimoon sa laing pamaagi sa tinuod nga Simbahan. Kami ang mga home teacher, apan kami daghan og nakat-unan gikan sa ehemplo sa among mission president.

Sa wala madugay, sa dihang ako nahimong usa ka full-time nga misyonaryo, nagpadayon ang akong pagkat-on gikan sa mga mission president. Ang akong unang mission president adunay hugot nga pagtuo nga ang butang mahimong mamaayo ra, bisan kon ang mga panahon malisud. Gikan kaniya, ako nakakat-on nga mahimong positibo.

Ang akong ikaduhang mission president kanhi usa ka fighter pilot, apan isip usa ka lider sa Simbahan, siya malumo og kasingkasing ug sensitibo, puno siya sa sama kang Kristo nga gugma alang sa iyang isigka mga sulugoon. Samtang ako ang iyang assistant, akong gibati nga ang pipila sa mga misyonaryo miabusar sa piho nga mga pribilehiyo ug mipahimulos sa iyang pagkabuotan. Ako misugyot nga kami maghimo og mas strikto nga mga balaod ug ipatuman gayud kini. Siya miingon nga siya mibati nga mas maayo nga mosalig sa mga misyonaryo sa pagpili sa matarung kay sa magduha-duha sa ilang mga intensyon. Gikan niining mga tawo nga angayang sundon, ako nakakat-on sa pagsunod sa pahimangno ni Joseph Smith sa pagtudlo sa sakto nga mga baruganan ug pasagdan ang mga tawo sa pagdumala sa ilang mga kaugalingon.

Ako nakahinumdom nga nagtan-aw ni Elder Dallin H. Oaks sa dihang, isip sakop sa Korum sa Napulog Duha ka mga Apostoles, mialagad nga Area President dinhi sa Pilipinas. Ako siyang nakita nga nagtambag sa uban kabahin sa mga hagit nga giatubang sa Simbahan sa atong nasud. Akong nakita ang iyang dako nga gugma sa pagtukod sa Simbahan ug sa paghimo og mga oportunidad sa pagpanalangin sa mga kinabuhi sa mga miyembro. Gikan sa iyang ehemplo ako nakakat-on nga ang mga Apostoles wala lamang maghunahuna sa Simbahan sa kinatibuk-an niini apan sa matag indibidwal usab.

Ang atong Area President karon, nga si Elder Keith R. Edwards sa Seventy, miingon nga bisan tuod adunay bahin sa pagdumala sa buluhaton sa Simbahan, ang Ginoo gusto nato nga mopokus sa kasingkasing. Siya nagpahinumdom kanato kabahin sa kasinatian ni Haring Benjamin nga namulong diha sa tore ug sa unsang paagi nga ang mga tawo mitubag uban ang dakong kausaban sa kasingkasing. Sila “wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2). Gikan ni Elder Edwards, ako nakakat-on sa pagtan-aw sa akong kaugalingong kasingkasing, aron sa pagsiguro nga putli ang akong mga intensyon.

Ang mga kasulatan puno sa talagsaong mga tawo nga angayang sundon. Si Kapitan Moroni mao ang usa sa akong personal nga bayani. Si Mormon nakadayeg kaayo kang Moroni nga ang iyang anak gipanganlan og sama sa iyang ngalan. Si Mormon misulat kabahin kang Kapitan Moroni: “Kon ang tanan nga mga tawo maingon, ug naingon, ug maingon bisan kanus-a, sama ngadto kang Moroni, tan-awa, ang mga gahum gayud sa impyerno nauyog na unta sa kahangturan; oo, ang yawa wala untay gahum ibabaw sa mga kasingkasing sa mga katawhan” (Alma 48:17). Si Mormon usab nakadayeg sa mga anak ni Mosiah ug kang Alma ug sa iyang mga anak nga lalaki tungod kay “silang tanan mga tawo sa Dios” (Alma 48:18). Himoa nga ang mga tawo nga angayan ninyong sundon mga kalalakin-an ug kababayen-an sa Dios!

Lain usab nga talagsaong ehemplo gikan sa mga kasulatan mao si Nephi. Gikan kaniya, ako nakakat-on nga mosalig sa Ginoo kay sa magbagulbol. Tuguti ko sa pagpasabut. Sa dihang ako mibiya sa Pilipinas aron sa pag-eskwela og master’s degree sa Brigham Young University, ako misaad nga ako mobalik. Sa dihang miabut ang panahon alang sa akong pamilya ug nako nga mobalik, ang desisyon dili sayon tungod kay akong gihunahuna nga ang mga oportunidad sa akong nasud nga natawhan dili ingon niana ka maayo o kamabungahon sama sa Estados Unidos. Apan tungod kay ako nakasaad na, ang akong asawa ug ako mihukom sa pagbansay sa hugot nga pagtuo sama kang Nephi ug mobuhat unsa ang gustong ipabuhat sa Ginoo kanamo.

Bisan tuod nga ako nakatrabaho na sa una, ako kinahanglan nga magsugod pag-usab sa pinansyal nga paagi. Ang kwarta nihit kaayo, ug ang mga oportunidad milugway og panahon sa wala pa mamunga. Dayon ang tanan namong tulo ka anak nangasakit, ug ang among pundo nahurot. Mao kadto ang usa sa labing lisud nga panahon sa among kinabuhi.

Ang among kinamanghuran nagsugod og sakit sa usa ka matang sa tuberculosis. Siya nagkinahangalan og tambal nga mahal kaayo, ug iya kining imnon sulod sa siyam ka bulan. Ako nakahinumdom nga nagtan-aw sa akong pitaka, ug kini walay kwarta. Ang akong asawa nangutana nako unsaon namo sa pagpakaon sa among mga anak.

Niadtong mga higayona, ikaw makapangutana. Ug kon ikaw dili magbinantayon, ikaw mahisama ni Laman ug Lemuel ug magsugod sa pagreklamo ug mayugot. Imong bation ang pagkadili patas sa kinabuhi. Dali ra gayud unta kanako ang paghunahuna: “Ako usa ka returned missionary man unta. Ako mialagad sa Ginoo. Kami mibayad sa among ikapulo. Kami mialagad sa Simbahan. Asa naman ang mga panalangin?” Apan kami nagpabilin nga aktibo, kami mialagad sa among mga calling, ug kami nakalahutay ra. Ang akong igsoong lalaki ug iyang asawa mitabang kanamo sa pinansyal nga paagi, ug sa katapusan ako nakasulod og trabaho. Kadto paigo lamang, ug ang suweldo mas gamay ra kay sa akong sweldo sa una sa wala pa ko moeskwela. Ako mibati nga ako pakyas.

Sa kaulahian, human sa pipila ka tuig, ang akong asawa ug ako nakahukom nga ang paghunahuna ug pagkabalaka walay ikatabang. Kami miingon, “Mohunong kita sa pagreklamo, mosalig sa Ginoo, ug magmalipayon unsay anaa kanato.” Ug pagkahuman niana, ang mga butang nahimong lahi. Ako nakakuha og pipila ka tanyag sa pagpanarbaho ug nakapili sa labing maayo. Ako gitawag isip bishop sa among ward. Mora og midagayday lang ang mga panalangin.

Isip bishop ako nakadiskobre kon sa unsang paagi nga ang lisud nga mga panahon nga akong naagian nakatabang kanako nga makatabang sa uban. Sa piho, ako nakahinumdom nga naminaw sa usa ka miyembro kinsa miagi og lisud nga mga panahon sa pinansyal, ug ako mibati og kalooy. Ako dili unta mobati niana nga kalooy kon ako wala pa makasinati sa susamang mga butang sa akong kaugalingon. Ug ako nakahinumdom unsa ang gisulti ni Nephi: “Ingon nga ang Ginoo buhi, ug samtang kita buhi, kita dili mobalik ngadto sa atong amahan sa kamingawan hangtud matuman ang butang nga gisugo sa Ginoo kanato” (1 Nephi 3:15).

Ako nakahinumdom giunsa, sa dihang sila anaa sa barko padulong ngadto sa yuta nga saad, nga bisan siya gigapus sa pipila ka mga adlaw ug nanghubag ang iyang mga pulso ug mga buol-buol, si Nephi miingon, “Bisan pa niini, ako midangop sa akong Dios, ug ako midayeg kaniya sa tibuok adlaw; ug wala ako magbagulbol batok sa Ginoo tungod sa akong mga kasakit” (1 Nephi 18:16) Mao nga akong gisultihan ang miyembro nga kadaghanan kanato adunay taas pa nga agian aron mahimong sama kang Nephi, apan siya usa ka buotan nga tawo nga angayang sundon. Ako nakahimo sa pagtabang niadto nga miyembro nga makakita nga ang tubag wala diha sa pagbagulbol apan anaa sa pagbuhat unsa ang gimando sa Ginoo, tungod kay Siya siguradong moandam og paagi (tan-awa sa 1 Nephi 3:7).

Sama ni Nephi, ako sigurado gayud nga nabulahan nga matawo sa maayong mga ginikanan. Ang akong inahan usa ka mahiyason ug lig-on nga babaye. Ako nahimong ingon niini nga tawo karon tungod sa lig-ong pundasyon sa ebanghelyo nga iyang gi-establisar sa among panimalay. Ang akong amahan usab, bisan tuod og dili hingpit, usa siya ka talagsaong tawo nga angayang sundon para kanako. Iyang siguradohon nga kami anaa sa saktong dalan, apan siya sa kanunay mangutana kanamo, “Unsa man sa inyong hunahuna?” Ug siya maminaw.

Siya nainteresado sa Simbahan tungod kay siya nakakita og usa ka timailhan nga nag-ingon “Walay lain nga kalampusan ang makahulip sa kapakyasan sa pamilya.” Siya gayud nagtuo niana. Siya nahigugma sa iyang pamilya ug nagkugi gayud aron sa pagsangkap sa among mga panginahanglanon.

Adunay usa ka higayon sa dihang ang dako nga kompanya sa pharmaceutical asa siya nagtrabaho kanunay naghatag kaniya og mas nagkadaghan nga mga responsibilidad, ug kana nagpasabut ug mas nagkadaghang mga biyahe. Kini miabut sa punto nga siya anaa lamang sa panimalay tulo na lang ka adlaw sa usa ka bulan. Dayon sa kalit lang, among nahibaloan nga siya miundang sa iyang dugay na nga trabaho ug nindot nga mga oportunidad sa maong trabaho.

Ako nakahinumdom nga pagkasunod namong family council meeting siya miingon nga kami nagkinahanglan nga mohugot sa among mga bakos sa sunod nga pipila ka mga bulan samtang siya nangita og bag-ong trabaho. Kami nangutana kaniya nganong siya miundang, ug ang iyang tubag dili gayud namo kalimtan hangtud sa kahangturan: “Kamong tanan nagdaku padulong na sa inyong pagkabatan-on, ug kana importante kaayo nga panahon sa inyong mga kinabuhi. Ako dili gusto nga moabut ang panahon nga kamo moingon kanako, “Diin ka man sa mga panahon nga kami nagkinahanglan kanimo?” Iyang giuna ang iyang pamilya.

Tungod niana nga ehemplo gikan sa akong amahan, mga pipila ka tuig ako naghimo og susama nga desisyon. Ako bag-ohay lang nga nadawat sa usa ka consulting company, ug kaming unom ka mga empleyado gipadala sakay sa eroplano gikan sa Pilipinas padulong sa Sydney, Australia, aron sa pag-apil uban sa 400 ka mga manager gikan sa tanang bahin sa kalibutan aron sa pagbansay. Kami misakay sa eroplano nga first class. Usa ka limousine ang mikuha kanamo sa airport ug dali nga midala kanamo sa usa ka five-star hotel, diin ang matag kwarto adunay dakong basket nga puno sa mga pagkaon ug ilimnon. Ang gustong ipakita kanamo sa kompanya nga kini maayo nga kompanya nga trabahoan, ug gusto niini nga ang bag-o nga mga empleyado magpabilin.

Human sa unang adlaw sa mga miting, kami adunay usa ka mapyestahong panihapon, usa ka pormal nga kalihokan. Kami nanglingkod mga 12 ka tawo sa usa ka lamesa, matag usa adunay 10 ka mga manager ug 2 ka managing partner kinsa mahimo namong mga tawo nga angayang sundon diha sa kompanya. Sila naghisgut kanamo og mga istorya kon giunsa nila pagsugod diha sa kompanya ug milambo sa ilang mga trabaho uban niini. Sila misulti kanamo sa daghang mga minilyon nga dolyares nga kontrata nga ilang nakasabut, sa importanting mga tawo sa negosyo nga ilang nakauban sa pagpanarbaho, ug sa dagkong mga proyekto nga ilang nadumala. Ako nakadungog sa Fortune 500 CEO nga kanunay mahisgutan ug mataha niining mga tawhana tungod sa ilang mga nahimo.

Kaming tanan mibati og nindot kabahin sa mga oportunidad hangtud nga ang usa sa mga tawo diha sa lamesa nangutana, “Unsay gibati sa imong asawa sa tanan nimong mga pagbiyahe? Kanunay man ka nga wala.” Ang usa sa mga partner mitubag, “Ako nadibursyo mga duha ka tuig pa lang ang milabay.” Ug ang laing partner sa among lamesa mitubag, “Ako nadibursyo mga lima na ka tuig ang milabay.”

Ako nakahinumdom: “Dili ingon ani nga klase sa tawo nga ako gustong mahimo. Naghunahuna ko nga dili na lang motrabaho niini nga kompanya tungod kay wala kaayo sa akong hunahuna ang mga kalibutanong katumanan kon ang akong pamilya mabungkag man lang.” Ang ehemplo sa akong amahan nakapahimong sayon para kanako nga mohukom nga unahon ang akong pamilya, ug ako nakakita og laing trabaho nga mitugot kanako nga kini mahitabo.

Ang tawo nga labing angayan nga sundon sa atong mortal nga kinabuhi, siyempre, mao si Ginoong Jesukristo, ang Anak sa Dios, kinsa hingpit sa tanang pamaagi ug kinsa mihatag sa Iyang Kaugalingon isip sakripisyo alang sa atong mga sala. Ang tanan natong matarung nga mga kinaiya ug mga binuhatan naggikan sa atong hugot nga pagtuo diha sa atong Manunubos, ug kana nga hugot nga pagtuo naggikan sa atong pagpamatuod kon si Kinsa siya ug unsa ang Iyang nabuhat para kanato. Ako tinud-anay nga mapasalamaton sa Iyang sakripisyo. Ako mopamatuod nga Siya buhi ug gusto Siya nga ang matag usa kanato magpuyo og usa ka takus nga kinabuhi aron kita makabalik ug makapuyo uban sa atong Langitnong Amahan. Kon kita mosunod sa Manluluwas ug mahimong mas mahisama sa atong Amahan sa Langit, kita siguradong mapanalanginan.

Ang pagsunod og mga tawo nga angayang sundon usa ka yawe sa imong umaabut. Ikaw mahimong sama niadtong imong gilantaw, busa pangitaa ang maayong mga bayani, ug paningkamuti nga magpakabuhi sama sa ilang pagpakabuhi. Hunahunaa ang mahangturong mga butang isip sukdanan kon si kinsa ang tawo nga himoon nimong angayang sundon. Tan-awa ang maayong mga ehemplo sa imong kaugalingong pamilya, ug himoa kini nga sundanan sa imong kinabuhi. Tan-awa ang uban kinsa mihimo sa Manluluwas nga sundanan sa ilang kinabuhi, ug himoa kini nga sundanan sa imong kinabuhi.

Pagmaalamon sa imong pagpili sa mga tawo nga angayang sundon tungod kay sila ang mahimo nimong mga bayani. Ikaw makahinumdom unsa ang ilang gipangbuhat, ug kana mahimo nimong sundanan, makatabang kanimo sa paghimo og maalamong mga desisyon. Ug sa dili pa kini nimo mahibaloan, ang uban maglantaw kanimo ug isunod nila ang maayong pamatasan basi sa tawo nga angayan nilang sundon—ikaw.