Mahala ang Inyong Nasud

Si Nicole ganahan sa Suriname. Mao nga sa dihang nakadungog siya mahitungod sa sangka sa pagsulat og artikulo mahitungod sa iyang nasud, ingon og nindot kini nga buhaton. Ang mga lagda sa sangka nag-ingon sa paghulagway kon unsay iyang buhaton kon siya pa ang Ministro sa Turismo. Sa iyang artikulo siya misugyot nga ang makasaysayanon nga mga bilding sa Suriname kinahanglang limpyohan ug paninduton ug ang mga tawo sa Suriname kinahanglang magmahigalaon sa mga bisita.

Nakadaog si Nicole sa sangka alang sa iyang ka-edad ug mibiyahe ngadto sa Puerto Rico aron makigsangka sa mga mananaog gikan sa laing mga nasud. Nalingaw kaayo si Nicole sa iyang biyahe ngadto sa Puerto Rico. “Matahum kini nga nasud,” siya miingon. “Ang mga tawo buotan kaayo, ug nakaamiga ako og daghan. Apan human sa tanan, ang panimalay nindot gayud.” Ganahan siyang makauban og usab ang iyang mga ginikanan ug ang iyang upat ka mga magulang nga babaye. Ug ganahan na kaayo siya nga makakita sa iyang iring, si Rosty!

Si Nicole nagsimbahan sa Wanica Branch sa Paramaribo Suriname District. Sa simbahan, ang mga tawo nakaila kaniya nga usa ka bata sa Primary nga buotan ug maayo, kanunay nga mopakita og ehemplo sa balaan nga pagtahud.

Usa sa mga paborito nga mga kasulatan ni Nicole mao ang 1 Nephi 8:30, nga naghisgut sa gunitanan nga puthaw. “Ako nasayud nga kon kita magpadayon sa paggunit sa gunitanan nga puthaw, kita makaangkon og kinabuhing dayon uban sa atong Langitnong Amahan,” miingon siya.

Ang ika-dose nga artikulo sa hugot nga pagtuo adunay espesyal nga kahulugan usab ngadto ni Nicole. Siya mi-recite, “[Kita] nagtuo sa kamandoan ubos sa mga hari, presidente, mga magmamando, ug sa mga maghuhukom, sa pagsunod, pagtahud, ug sa paghupot sa balaod.”

Ang mga pamilya adunay mga lagda usab nga kinahanglang tahuron ug sundon sa mga sakop sa pamilya. Si Nicole miingon nga ang iyang inahan, amahan, ug igsoong mga babaye mitabang kaniya nga makat-on sa pagpili sa matarung. “Korihian ako nila kon ako masayop ug modayeg kanako kon ako mohimo og maayo,” miingon siya.

Ang pagkahimong kinamanghuran dili sayon kanunay. Dako kaayong hagit alang kaniya nga makita ang iyang igsoong mga babaye nga manglakaw ug siya magpabilin sa balay. Apan siya nakahibalo nga ang iyang pamilya nahigugma kaniya ug nga maayo ra ang ilang pagpanag-uban.

Usa ka pananglitan mao ang higayon kon sila manganta. Si Nicole ganahan og musika. Ganahan siya nga modumala sa musika, ug siya adunay natural nga abilidad sa pagpasunod sa tanan sa ritmo ug sa tono.

Sa gabii si Nicole ganahan nga maminaw sa tingog sa mga gangis ug sa tingog sa mga baki ug sa mga tingog sa kinabuhi diha sa kakahoyan palibut sa iyang balay. Ganahan usab siyang maghunahuna sa siyudad, sa mga bilding sa gobyerno ug mga timailhan sa kadalanan, sa mga tindahan sa mga bulak ug mga merkado sa pagkaon. Malipayon siya kon asa siya. Ug siya mapasalamaton niana, pinaagi sa pagsulat sa iyang mga hunahuna, iyang napaambit ang iyang gugma alang sa iyang nasud ngadto sa mga tawo sa tibuok kalibutan.