Pag-abli sa mga Kalangitan

Si Propeta Joseph Smith sa makausa misulti niining makapaikag kaayo nga obserbasyon kabahin sa pag-abli sa kalangitan: “Ang mga pagpakita sa gasa sa Espiritu Santo, ang mga pagpangalagad sa mga anghel, o ang kalamboan sa gahum, kaharianon o himaya sa Dios panagsa ra ipakita sa publiko, … apan sa kasagaran kon ang mga anghel moabut, o ang Dios mopadayag sa Iyang kaugalingon, nahitabo kini sa mga indibidwal sa pribado, sa ilang kwarto, sa kamingawan o sa kaumahan, ug nga sa kasagaran walay kasaba o kaguliyang.”¹

Sa walay swerte, ang modernong kinabuhi puno sa kasaba ug kaguliyang. Ang atong katilingban naghatag og daghang mga makabalda ug gawas kon kita mogahin og panahon ug paningkamot nga mapalingkawas ang atong kaugalingon gikan niini, ang tingog sa Espiritu mahimong dili nato mabati. Mao nga niadtong adlaw sa tinglarag pagka 1820, si Joseph Smith sayo nga mibiya sa iyang panimalay aron sa pag-adto sa kakahoyan aron siya mag-ampo sa hilom nga mag-inusara kabahin sa iyang pangutana sa relihiyon. Ang tubag miabut uban sa talagsaong pagkaklaro sa dihang ang Langitnong Amahan ug si Jesukristo nagpakita kaniya, nagpasiuna sa dispensasyon sa kahingpitan sa panahon (tan-awa sa Joseph Smith—Kasaysayan 1:14–19).

Sa samang mga paagi, ang yawe sa pag-angkon og espirituhanong kalig-on nga atong gikinahanglan anaa sa unsay gihulagway sa makausa ni Presidente Thomas S. Monson nga pagsulod sa usa ka “sagradong kakahoyan” sa atong kaugalingon. Siya nagtudlo ngadto sa mga bishop, apan ang tambag magamit alang sa tanang mga miyembro sa Simbahan: “Ang matag bishop nagkinahanglan og sagrado nga kakahoyan diin siya mahimong mopahulay aron mamalandong ug mag-ampo alang sa giya. Ang sa akoa mao ang among daang simbahan sa ward. Ako dili makasugod sa pag-ihap sa mga okasyon nga sa usa ka mangitngit nga gabii sa mga lawom nga kagabhion moadto ako sa pulpito niini nga bilding diin ako napanalanginan, nakumpirmahan, naorden, natudloan, ug sa kaulahian gitawag aron sa pagdumala. Ang simbahan nadan-agan og gamay sa mga suga sa karsada sa atubangan niini, walay tingog nga madungog, walay samukan nga makadisturbo. Naggunit sa pulpito ako moluhod ug mopakigbahin Kaniya sa akong mga panghunahuna, akong mga kabalaka, akong mga problema.”²

Siyempre, kini nga mga panghitabo sa “sagrado nga kakahoyan” dili kapareha sa unsay nahitabo ni Propeta Joseph Smith sa Sagrado nga Kakahoyan. Kita wala mosulod niining mga panahon sa debosyonal nga magpaabut nga makakita sa Amahan ug sa Anak nga mas labaw pa kay sa nahitabo kang Joseph Smith. Apan kita makasalig nga ang Langitnong Amahan motubag sa atong mga pag-ampo; kon unsaon Niya sa pagtubag niini, hinoon, magdepende Kaniya.

Adunay dakong gahum sa paggahin og hilom, mainampoon, mapalandungon nga panahon. Sa kahilom nga nag-uban sa atong mga pagpamalandong, kita mahimong makaila sa Amahan ug sa Iyang Anak (tan-awa sa Salmo 46:10; D&P 101:16).

Sa dihang ako mialagad isip mission president sa Hawaii, ako adunay daghang mga oportunidad nga mamulong sa batan-ong mga elder ug mga sister kinsa naningkamot nga mahimong mas maayo nga mga misyonaryo. Ako nakahinumdom og usa ka misyonaryo kinsa nawagtangan gayud sa kadasig. Ang iyang buluhaton sa misyon alang niya bug-at ra kaayo, ug siya nagsugod na sa pagduha-duha sa iyang pagpamatuod. Siya miduol kanako uban sa hangyo nga siya akong papaulion.

Hinoon, ako siyang gihangyo nga mosunod sa ehemplo ni Nephi sa pagpamalandong ug pag-ampo kabahin sa iyang mga problema ug mga tinguha (tan-awa sa 1 Nephi 10:17; 11:1). Kini usa ka buhat nga akong gisunod sa daghang mga katuigan ug usa usab ka buhat nga gisunod sa daghang mga General Authorities sa Simbahan. Akong gihangyo ang misyonaryo sa pagbalik sa iyang apartment ug mobuhat sa mosunod:

• Bangon og sayo—sa iyang iskedyul, mga pipila ka minuto sa dili pa mag alas 6:30 sa buntag.

• Mag-ehersisyo sulod sa pipila ka minuto.

• Maligo ug mamarbas —himoong limpyo ang iyang kaugalingon.

• Mag-ilis para nianang adlawa.

• Moadto sa usa ka hilom nga lugar sulod sa iyang apartment.

• Moluhod, ipaubos ang iyang espiritu sa atubangan sa Langitnong Amahan, ug mosangpit Kaniya. Makig-istorya Kaniya diha sa pag-ampo nga may balaan nga pagtahud.

• Magpaabut alang sa Iyang balaanong pagdasig, mamalandong sa mga kasulatan o sa usa ka bag-o nga pakigpulong sa kinatibuk-ang komperensya ug maghunahuna kabahin sa piho nga mga problema nga iyang giatubang.

Ako misaad niining batan-ong elder nga kon iya kining buhaton ug itutok ang iyang kaugalingon diha sa mga kasulatan, ilabi na sa Basahon ni Mormon, sulod sa pipila ka minuto matag adlaw, siya makasinati og hingpit nga kalipay ug makadawat og kalig-on nga mopadayon.³

Pipila ka adlaw ang milabay siya nakigkita kanako. Ang iyang mga mata napuno sa luha samtang siya misulti kanako sa iyang mga kasinatian panahon sa iyang sayo sa buntag nga oras sa debosyonal. Siya talagsaon nga nangalagad isip usa ka sulugoon sa Dios ug nakakompleto og usa ka dungganon nga misyon. Ang iyang asawa bag-ohay lang nga misulti kanako nga siya nagpadayon sa pagbangon og sayo aron adunay pribadong panahon uban sa iyang Langitnong Amahan.

Ako mitudlo niining susama nga baruganan ngadto sa matag misyonaryo diin ako adunay kahigayunan sa pagdumala kanila. Ako nabalaka nga wala namo mabuhat ang tanan nga among mahimo aron sa pagdala sa kahayag sa ebanghelyo ngadto sa mga tawo sa Hawaii. Sulod sa maingon og mubo ra nga panahon human nga ang mga misyonaryo misugod niini nga buluhaton, ang gidaghanon sa mga referral nga among nadawat gikan sa mga miyembro misaka, ang mga oportunidad sa pagtudlo misaka, ug ang gidaghanon sa mga bunyag sa among misyon nadoble ug dayon natriple. Kining tanan nahitabo tungod kay ang mga paningkamot sa mga misyonaryo napadako pinaagi sa gahum sa Espiritu Santo.

Ako nasayud gikan sa akong personal nga kasinatian nga ang espirituhanong gahum mahimong modagayday sa imong kinabuhi kon ikaw mosunod niini nga buhat. Kamo mobati sa gugma sa Dios ug sa makalimpyo, makapaputli pag-usab sa inyong espiritu (tan-awa sa 1 Nephi 11:22–25; D&P 50:28–29). Kamo makasinati og mga tipik sa panahon sa pagpadayag, kon ang Espiritu mohunghong sa inyong espiritu unsa ang inyong gikinahanglang buhaton nga mahimong usa ka mas maayo nga amahan, usa ka mas maayo nga inahan, usa ka mas maayo nga anak nga lalaki o anak nga babaye, usa ka mas maayo nga disipulo ni Jesukristo.

Ako nakaila og usa ka maayo nga miyembro sa Simbahan kinsa nakaangkon og malampuson nga kaminyoon ug unom ka matahum nga mga anak. Siya naningkamot nga mahimong labing maayo nga kapares sa iyang bana ug mahimong labing maayo nga inahan ngadto sa iyang mga anak. Siya usa ka epektibo nga lider sa Young Women sa iyang ward. Apan usahay siya mobati nga siya dili pa gayud ingon niana ka maayo. Siya nawad-an sa kadasig ug mibati og kahaw-ang sa kalag.

Usa ka adlaw siya miduol kanako kuyog sa iyang bana ug mihulagway sa gibati niyang kawalay pulos sa ingon niadto nga mga panahon. Siya nakahisgot na sa iyang problema ngadto sa iyang mga lider sa priesthood ug ilabi na sa iyang bana apan siya nangita pa gihapon og kahupayan. Ako misugyot nga kon ang iyang bana makalakaw na padulong sa trabaho ug ang ilang mga anak anaa na sa eskwelahan, siya mangita og usa ka luna sa iyang panimalay ug didto sa paagi nga may balaan nga pagtahud ug sa mapainubsanong paagi makig-istorya sa Langitnong Amahan. Ako misugyot nga siya mopahayag sa iyang pasalamat ngadto sa Dios alang sa iyang mga panalangin ug dayon mopaabut alang sa Iyang balaanong pagdasig. Siya mipasalig nga iya kining buhaton matag adlaw.

Paglabay sa pipila ka panahon ako nakadawat og usa ka sulat gikan kaniya. Siya miingon nga samtang siya miluhod niadtong hilom nga mga higayon matag adlaw ug gitugyan ang iyang palas-anon sa tiilan sa Langitnong Amahan, Siya mitangtang sa iyang mga problema. Siya mibati sa iyang dakong bili ngadto Kaniya ug nakakat-on og mas daghan kabahin sa “pamaagi sa pagpang-ayo”⁴ samtang Siya miayo sa iyang kalag.

Samtang kita mogamit sa matag adlaw nga panahon sa debosyonal aron sa pag-angkon og mas dako nga espirituhanong kalig-on, kita mapanalanginan nga mas makasabut sa Langitnong Amahan ug sa Manluluwas ug sa Iyang Pag-ula. Kita makatagamtam “sa kaayo ni Jesus” (Mormon 1:15). Kita mobati sa “tuman nga hingpit nga kalipay” (1 Nephi 8:12) sa gahum sa Iyang mahangturong gugma. Kita mas mahigugma pa sa Manluluwas tungod sa Iyang gibuhat alang kanato panahon sa Iyang mortal nga pangalagad—ilabi na didto sa Getsemani, didto sa krus, ug sa Pagkabanhaw—ug tungod sa Iyang padayon nga gibuhat alang kanato karong panahona (tan-awa sa Juan 6:51; Alma 7:11–12).

Mga pipila na ka tuig ang milabay, si Elder Melvin J. Ballard (1873–1939) sa Korum sa Napulog Duha ka mga Apostoles adunay kasinatian samtang nagbisita sa Fort Peck Indian Reservation sa Montana, USA. Nianang higayona, siya nagkinahanglan og pagdasig ug kalig-on aron sa pagtabang sa mga tawo niana nga komunidad.

Usa ka gabii siya adunay damgo diin siya giubanan ngadto sa usa ka kwarto, diin siya nakakita sa “labing mahimayaong tawo nga iyang nakita, ug siya gipaduol aron maila-ila ngadto Kaniya. … Siya mipahiyum, mitawag sa akong ngalan, ug Iyang gitunol ang Iyang mga kamot ngari kanako. Kon ako mabuhi sulod sa usa ka milyon ang pangidaron ako dili gayud makalimot niadto nga pahiyum. Siya migakos kanako ug mihalok kanako, samtang ako Iyang gidala sa Iyang sabakan, ug Siya mipanalangin kanako hangtud nga nabayaw ako sa hilabihan. Sa dihang Siya nahuman na ako miyukbo sa Iyang tiilan, ug didto akong nakita ang mga marka sa lansang; ug samtang ako mihalok niini, uban sa tumang kalipay nga misaka sa akong tibuok lawas, ako mibati nga ako anaa gayud sa langit. Ang pagbati … dayon mao kini: O! Kon ako makahimo … makaadto sa Iyang presensya ug makadawat sa pagbati nga akong naangkon … , akong ihatag ang tanan kanako ug manghinaut gayud sa kanunay nga mahimo kini!

“Ako nasayud—sama sa akong kahibalo nga buhi ako —nga Siya buhi.”⁵

Ako wala masayud kon kamo aduna bay sama niana nga kasinatian niini nga kinabuhi. Apan ako nasayud nga kon ikaw mopadayon sa matag adlaw nga pagpakigkita sa Langitnong Amahan diha sa pribadong lawak sa imong panimalay, ikaw makaila Kaniya ug sa atong Manluluwas sa paagi nga dili gayud nimo mahimo sa laing paagi (tan-awa sa 3 Nephi 19:16–23, 25–29). Unta imo kining buhaton ug ang mga pultahan sa kalangitan maabli para kanimo sa bisan unsang mahimayaong paagi nga giandam sa imong Langitnong Amahan para kanimo.