Dili na Gayud Ako Mag-Home Teaching Pag-usab!

Ang akong anak nga lalaki nga nag-edad og 15 anyos nadasig sa daghang mga butang nga nahitabo sa iyang kinabuhi—mga higala, skateboard, mga sakyanan, ug sa iyang lisensya sa pagdrayb. Bisan pa niana, siya wala madasig sa iyang mga responsibilidad isip usa ka home teacher.

Ang akong kasingkasing nahugno usa ka Dominggo dihang siya miingon, “Ang home teaching usa ka pag-usik-usik sa panahon. Akong tawagon ang akong adviser ug mosulti kaniya nga kinahanglan siyang mokuha og lain tungod kay ako dili na gayud mag-home teaching pag-usab!”

Sa wala pa siya makahigayon sa pagpangita sa pangalan sa iyang adviser sa directory sa ward, mibagting ang telepono. Ang iyaha kadtong bag-ong gitudlo nga kompanyon sa home teaching, si Brother Bernd Sucknow, nga gahi og sinultihan nga German.

“Toby, kuhaon ko ikaw karon dayon,” siya miingon. “Ikaw ang akong bag-ong kompanyon, ug naghunahuna ko nga mobisita kita. Maayo kini di ba? OK. Good-bye.”

Si Brother Suckow tingali nadasig nga dili maghulat og tubag, o nagtuo nga ang katingalahang kahilom ni Toby nagpasabut nga uyon siya. Bisan unsa, paglabay sa 10 ka mga minuto dihay nanuktok sa pultahan. Sa wala pa makabalibad si Toby, ang malipayon nga tawo midala kaniya sa gawas ug mibutang sa mga yawe sa sakyanan sa iyang kamot.

“Ang imong pangalan si Toby? Gikalipay ko nga nakaila ka,” miingon si Brother Suckow. “Toby, Igpapahulay karon, ug ang pagtesting sa pagdrayb sa mga sakyanan mao ang akong panginabuhi. Sa akong pagtuo dili kaayo maayo alang kanako nga modrayb sa Igpapahulay kay kini mao ang akong trabaho. Makatabang ka ba nako? Ikaw ba adunay lisensya sa pagdrayb? Mahimo bang ikaw ang mo-drayb ngadto sa atong home teaching nga mga appointment?”

Nahingangha si Toby sa pagkakita sa pinaka bag-o nga modelo sa sports car nga gitestingan ni Brother Suckow nianang semanaha. Nakaamgo dayon siya nga hapit mawala ang unsay gisaad nga mahimong usa ka halandumon nga home teaching assignment.

Sa dihang mibalik na sila pagkataud-taud, gipakita ni Toby kang Brother Suckow ang pipila ka bag-ong ekipo sa computer, ug sila sa wala madugay naghisgut mahitungod sa labing bag-ong kalamboan sa teknolohiya. Sa iyang pagbiya, miingon si Brother Suckow, “Sa akong hunahuna maayo nga atong humanon ang atong home teaching nga mga pagbisita sa sunod Dominggo. Unsay imong hunahuna, Toby?”

Ang manghud nga lalaki ni Toby misagbat, “Mahimo bang mahimo usab ako nga home teacher?”

Si Toby wala magduha-duha sa dihang miabut ang panahon sa pag-home teaching uban ni Brother Suckow. Paglabay sa pipila ka mga bulan, ang home teaching dili na mahitungod sa nindot nga mga sakyanan nga iyang nadrayban. Hinoon, si Brother Suckow nahimong tinuod nga higala, ug si Toby nakat-on unsa ka importante ang home teaching ngadto sa mga pamilya nga ilang gibisitahan.

Si Brother Suckow ug ang iyang asawa, nga si Barbara, sa katapusan mibalik ngadto sa Germany. Ang among stake gimingaw gayud nila. Dili gayud ako makalimot sa gamhanan nga ehemplo sa gugma ni Brother Suckow alang sa usa ka batan-ong lalaki kansang pagpamatuod sa home teaching nagkinahanglan og dakong tabang.