Elder Neil L. Andersen: Tawo sa Hugot nga Pagtuo

Si Neil Linden Andersen natawo niadtong Agosto 9, 1951, ang ikatulo sa lima ka mga anak, ngadto nila ni Lyle ug Kathryn Andersen. Ang amahan ni Neil usa ka estudyante sa Utah State University nga nagtuon sa agricultural husbandry. Sa dihang si Neil nag-edad og tulo, ang pamilya mibalhin ngadto sa Colorado.

Ang mga ginikanan ni Neil mitudlo sa ilang pamilya pinaagi sa ilang kaugalingon nga hugot nga pagtuo ug sakripisyo. Nagpuyo sila og mga 90 ka mga milya (145km) gikan sa meetinghouse. Ang pagbiyahe ngadto sa mga miting sa simbahan usa ka butang nga ilang gibuhat matag Dominggo. “Kami gusto nga mopakita sa among mga anak unsa ka importante ang Simbahan,” ang iyang inahan, nga si Kathryn, mipasabut.

Sa dihang si Neil nag-edad og lima, ang iyang pamilya mibalhin ngadto sa dairy farm sa Pocatello, Idaho. Si Neil nagbuhi og mga koneho, misakay og mga kabayo, ug nagdula diha sa kaumahan uban sa iyang mga igsoon. Sa dihang si Neil mga pito ka tuig, usa ka koneho nga giganahan niya pag-ayo nakagawas gikan sa tangkal niini. Siya misaysay:

“Akong gipangita sa among gamay nga uma, pero wala nako makit-i. Nahinumdom ako nga naglakaw luyo sa karaan nga kamalig ug nag-ampo nga akong makit-an ang koneho.

“Diha-diha human sa pag-ampo, usa ka imahe miabut sa akong hunahuna sa usa ka lugar ilawom sa mga tabla. Ug mao gayud, akong giadto ang lugar ug nakit-an ang koneho. Kini nga kasinatian ug daghan pa nga sama niini nagtudlo kanako nga ang Ginoo motubag sa gagmay ug yanong mga pag-ampo natong tanan.

Ang kinabuhi didto sa umahan sa iyang mga ginikanan nakasilsil og baruganan sa pagpaningkamot ngadto ni Neil. “Akong kuhaan og gatas ang daghan kaayong mga baka ug mobalhin og daghang tubo sa patubig,” siya miingon. Ako nahinumdom nga sa buntag sa Pasko sa dili pa namo ablihan ang among mga regalo, kami dunay mga baka nga kuhaan og gatas. Naghinumdom niini, ako nakaamgo unsa ka bililhon ang pagkat-on nga kabahin sa kinabuhi mao ang pagpaningkamot.”

Isip usa ka batan-on si Neil nagtrabaho usab pag-ayo sa sports. Sa high school midaog siya sa cross-country running. Hinoon, iyang gitumong ang iyang labing kusog sa pagkab-ot sa ubang mga butang. Ang iyang inahan nahinumdom, “Samtang didto sa Highland High School, mitambong siya sa Boys State sa Boise, Idaho, ug napili nga gobernador sa tanang laing mga delegado. Siya ang presidente sa Idaho Association of Student Councils, nga naglakip sa tanang tibuok mga opisyal sa mga estudyante sa tibuok high school.

Isip usa ka freshman sa Brigham Young University niadtong 1969, si Neil Andersen usa ka kugihan nga estudyante. Hinoon, ang iyang igsoong babaye nga si Sheri nahinumdom, “bisan og nadasig sa edukasyon, kanunay siyang nagplano nga magmisyon. Ang iyang bugtong pangutana mao nga andam ba siya nga moserbisyo. Nadani ako nga ang hugot nga pagtuo mao ang iyang gipili.

Si Elder Andersen nahinumdom usab sa pagpangutana niini ngadto sa Ginoo. Samtang siya nakahinumdom sa bag-ohay lang nga kinatibuk-ang komperensya, ang pagbati miabut, “Ikaw wala masayud sa tanan, apan ikaw igo nga nasayud.”¹ Nakaandam uban niana nga kasiguroan, si Neil Andersen midawat sa tawag sa misyon ug matinud-anong miserbisyo didto sa France.

Human sa iyang misyon si Neil mipadayon sa pag-uswag sa BYU. Siya nakadawat og Edwin S. Hinckley Scholarship ug napili nga bise presidente sa pundok sa estudyante.

Didto usab sa BYU iyang nahimamat ang tawo nga adunay dako kaayong impluwensya sa iyang kinabuhi, si Kathy Sue Williams. Siya ug si Kathy naminyo sa Salt Lake Temple niadtong Marso 20, 1975, sa hapit na sila mogradwar. Ang kaminyoon gisundan sa duha ka tuig sa Harvard University, diin iyang naangkon ang master’s degree sa business administration niadtong 1977.

Si Neil ug si Kathy nakabaton sa ilang unang anak samtang nag-eskwela sa Harvard, paingon sa katapusan sa unang tuig sa kaminyoon. Tulo ka dugang mga anak ang misunod.

Tungod sa pag-abut sa mga anak, giangan-angan ni Kathy ang iyang pagtuon pero wala mohunong sa paghuman sa iyang degree. Si Elder Andersen mipadayag sa iyang pagdayeg: “Sa dihang didto kami sa Brazil [diin si Elder Andersen nagserbisyo sa Kapangulohan sa Area] ug ang mga anak wala na magpuyo uban kanamo, iyang giablihan ang iyang mga libro, nagkat-on og Portuguese, ug mihuman sa iyang degree—18 ka oras nga credit sa Portuguese. Mao kana ang matang sa kalig-on nga anaa kaniya.”

Human sa graduate school, ang mga Andersen mibalhin ngadto sa Tampa, Florida, diin sila naghunahuna nga magpabilin sa tibuok kinabuhi, ingon nga mao kini ang dapit nga nadak-an ni Kathy ug gipuy-an sa iyang pamilya. Si Neil miapil og daghang malampusong proyekto sa negosyo, lakip na ang kalamboan sa real estate, healthcare, ug advertising. Ang Ginoo, hinoon, adunay laing mga plano alang kaniya.

Niadtong 1989, samtang nagserbisyo sa kapangulohan sa stake, si Neil gitawag isip presidente sa misyon sa Bordeaux. Human makabalik ngadto sa Florida niadtong 1992, gitawag siya sulod sa usa ka bulan nga presidente sa Tampa Florida Stake. Pagkasunod tuig, usa ka bag-ong calling ang miabut. niining higayona ngadto sa Unang Korum sa Seventy. Niadtong 2005, gitawag siya ngadto sa Kapangulohan sa Seventy. Dayon, niadtong Abril 2009 gitawag siya ngadto sa Korum sa Napulog Duha ka mga Apostoles.

Bisan sa mga pressure sa iyang trabaho ug sa iyang mga calling sa Simbahan niadtong daghang mga tuig nga milabay, ang iyang debosyon ngadto sa iyang pamilya wala gayud mausab.

Ang kinamagulangan nga anak nga babaye sa mga Andersen, nga si Camey Hadlock, miingon, “Si Papa [usa ka maanindot nga pulong nga gigamit gihapon sa iyang mga anak] sa kanunay mangita og panahon alang sa mga anak. Sama pananglit, iyang dad-on ang matag usa kanamo sa pagpamahaw uban kaniya kausa sa usa ka bulan. Papilion kami niya sa lugar nga among kaonan sa pamahaw ug sa mga hilisgutan nga among istoryahan. Kami magpaabut gyud sa iyang dili mabahin nga atensyon.

Si Derek Andersen nahinumdom nga migahin og panahon sa pagpakigdula: “Sa nagtubo pa, kami ganahan nga magdula og basketball isip pamilya. Mopauli siya gikan sa trabaho, ug magkauban kami batok sa akong mga magulang nga lalaki ug magdula og basketball.”

Ang anak nga babaye nga si Kristen Ebert nahinumdom nga bisan og ang iyang amahan busy kaayo, “kanunay siyang adunay panahon sa pagpaminaw ug sa paghatag og tambag.”

Ang mga Andersen matinud-anon kaayo nga magtuon sa kasulatan isip pamilya ug manganta og himno kada gabii nga ang mga anak mobuhat niini kon ang ilang mga ginikanan madugay sa pag-uli.

Alang sa family home evening, ang mga Andersen sa kanunay magtuon sa mga pakigpulong sa kinatibuk-ang komperensya diha sa Ensign. “Klaro nga kon ang propeta mamulong, kami maminaw,” miingon si Derek.

Si Sister Andersen miingon, “Si Neil usa ka tawo nga dunay lawom nga hugot nga pagtuo ug gugma alang sa Manluluwas. Ang mahigugmaong pagbati nga iyang gipakita kanunay kanako ug sa among mga anak nakahatag og dili masukod nga kalig-on sa among pamilya ug nakapuno sa kalipay ug kalinaw sa among mga kinabuhi.”

Hukman sa paagi nga siya gitratar sa iyang bana, ang usa makakita nga si Kathy mao ang sentro sa panimalay. Siya mipasabut, ‘Si Neil nakaila ug mopadayag og hilabihan nga pasalamat sa gagmay nga mga butang nga akong gibuhat kada adlaw—mga butang nga dili mamatikdan sa daghang mga tawo o isipon nga dili importante, sama sa paglimpyo sa balay pag-andam sa panihapon, o pagpanglaba.

Si Kristen miingon, “Gipasalamatan nako kanunay ang ehemplo sa akong amahan sa pagtratar sa akong inahan uban sa pagkamabination ug pagtahud. Iyang ablihan ang pultahan alang kaniya, motabang kaniya nga makalingkod, moboluntaryo sa pagpanghugas sa plato, ug uban pa.”

Si Elder Andersen miingon, “Si Kathy sigurado kaayo ug mauyunon sa iyang pagkamaunungon ngadto sa Ginoo ug ngari kanako ug sa pamilya. Naningkamot siya pag-ayo sa pag-una kanako ug sa among mga anak. Imposible nga dili hingpit nga mahigugma kaniya ug gusto nga motabang alang kaniya.

“Sa dihang nakigminyo ako kaniya,” siya midugang, “ang mga sumbanan sa akong kinabuhi misaka— hingpit nga kanunay nga mag-ampo ug magtuon sa kasulatan, pagsunod sa mga kasugoan sa sakto gayud. Ang iyang impluwensya kanako ug sa among mga anak talagsaon kaayo. Siya adunay putli ug disiplinado nga hugot nga pagtuo.”

Si Elder Andersen midayeg sa iyang asawa sa lig-ong pagsuporta sa mga anak subay sa mahagitong mga kahimtang. Lakip na sa ilang misyon, ilang gigahin ang 10 sa milabay nga 20 ka mga tuig sa gawas sa Estados Unidos, nga total nga walo ka mga higayon. “Makita ninyo ang mga hagit nga giatubang sa among mga anak nga mobalhin hapit kada tuig: bag-ong mga higala ug sa kasagaran bag-ong nasud. Si Kathy mao ang kusog nga naghiusa nilang tanan ug mipasabut kanila nga kini usa ka positibo nga kasinatian alang kanila.”

Ang mga anak buotan kaayo. Kami mapasalamaton sa mga sakripisyo sa mga bata niadtong mga tuiga. Ang Ginoo mipanalangin kanila sa labing maayo nga pinili nga mga asawa ug talagsaon nga mga anak diha sa ilang kaugalingon,” si Elder Andersen miingon.

Sa dihang si Presidente Thomas S. Monson, usa pa ka magtatambag sa Unang Kapangulohan, mitawag ni Neil Andersen nga moalagad isip presidente sa misyon, ang pagdawat niadto nga call nagkinahanglan og sakripisyo sa pinansyal. Si Neil nakapanag-iya og usa ka mabungahon ug nagtubo nga advertising agency. “Dili lamang kini usa ka negosyo nga sayon ibilin ngadto sa uban,” mipasabut si Elder Andersen. “Among gidawat ang call nga wala masayud unsaon namo sa pagbalhin ang among negosyo.

Si Sister Andersen midugang, “Ako sa kanunay adunay pagsalig sa iyang hugot nga pagtuo. Siya kanunay mosiguro kanamo: ‘Kon atong unahon ang Ginoo, Iyang ablihan ang agianan, ug ang mga milagro mosunod.’”

Sulod sa mga semana usa ka tanyag nga mopalit sa negosyo ang miabut nga wala namo ipahibalo. “Klaro kaayo ang mga kamot sa Dios naglihok sa usa ka milagrosong paagi,” miingon si Elder Andersen.

Ang baruganan sa buluhaton sa Dios isip usa ka buluhaton sa milagro kanunay nga gitudlo ngadto sa mga misyonaryo sa France. Si Kurt Christensen, kinsa mialagad isip usa ka misyonaryo ubos ni Presidente Andersen, mipasabut “Iyang kanunay nga ipataas ang among panglantaw sa mga panalangin nga gusto sa Ginoo para sa France. Iya kaming gitudloan kabahin sa putli nga hugot nga pagtuo ug pagkamasulundon nga walay pagkasayop, ug ang Ginoo mibu-bu sa Iyang mga milagro diri kanamo.”

Bisan asa ang ilang mga buluhaton modala sa mga Andersen—sa kasadpang Uropa, Brazil, Mexico, ug bisan asa—sila nahigugma sa mga matinud-anon nga mga miyembro sa Simbahan ug nagmakugihon sa pagkat-on sa mga pinulongan niana nga mga nasud. Kausa, sa dihang si Kathy mikomento sa dili maihap nga mga oras nga gigahin ni Neil sa pagkat-on sa mga pinulongan, siya mipahayag nga siya gihatagan og espirituhanong gasa ug ang Ginoo nagdahum kaniya nga makugihong motrabaho aron maangkon kadto nga gasa. Karon si Elder Andersen makasulti og French, Portuguese, ug Spanish.

“Sulod sa 16 ka mga tuig ang mga miyembro sa Unang Kapangulohan ug ang Napulog Duha mao ang akong ehemplo ug mga magtutudlo,” mipasabut si Elder Andersen samtang siya namulong sa kinatibuk-ang komperensya human sa iyang call ngadto sa Napulog Duha. “Akong nasinati ang ilang paghigugma ug tinuod nga pagsaksi sa atong Langitnong Amahan ug sa Iyang Anak. Akong nakita ang ilang walay kakapoy nga tinguha sa pagtukod og una sa gingharian sa Dios. Akong nakita ang gahum sa Dios nga diha kanila ug mipadako ug mipaluyo kanila. Akong nasaksihan ang katumanan sa ilang mapanagnaon nga tingog.”²

Samtang si Elder Andersen mialagad isip Executive Director sa Church Audiovisual Department, siya halos kanunay adunay miting uban ni Presidente James E. Faust (1920–2007) matag semana. “Kausa ako miadto kang Presidente Faust uban sa hilabihan ka lisud nga problema nga wala gyud ko kahibalo unsaon sa pagsulbad,” nakahinumdom si Elder Andersen. “Siya miingon ngari kanako, ‘Neil, nag-ampo na ba ka kabahin niana? Ikaw ba nag-ampo na sa tibuok gabii sama sa gibuhat ni Enos? Ug dayon siya milingkod og balik sa iyang lingkuranan ug miingon, ‘Ako nag-ampo sa tibuok gabii sa daghang mga higayon aron sa pagdawat og tubag sa lisud nga mga hagit. Niana nga paagi ikaw usab makakuha og tubag.’ Sakto gyud siya.”

Mao kining higayona nga si Elder Andersen midumala sa kalamboan sa salida nga The Testaments of One Fold and One Shepherd; [Ang mga Saksi sa Usa ka Panon ug usa ka Magbalantay]; ang sinugdanan nga paglunsad sa Mormon.org, ang Web site alang sa misyonaryo sa Simbahan, ug ang pagbutang sa sistema sa audiovisual sa Conference Center sa Siyudad sa Salt Lake.

Pinaagi niini nga mga kasinatian si Elder Andersen miila sa paggiya sa Unang Kapangulohan ug sa Napulog Duha. “Ang Kaigsoonan nagtudlo kanimo kabahin sa espiritwal nga gahum. Sila wala lamang nagtudlo kanimo kabahin sa mga kamatuoran; sila nagtudlo kanimo kabahin kon unsaon sa pagsabut ug pagpaminaw ngadto sa Ginoo. Ikaw nakakat-on nga mahimong usa ka sulugoon sa Ginoo.”

Si Elder Andersen miila, “Si Presidente Monson nahimong usa ka talagsaon nga magtutudlo ngari kanako ug sa uban pa, samtang siya nagtudlo kanato sa pagduol sa uban sama sa gibuhat sa Manluluwas. Siya kanunay naghatag og gibug-aton nga walay mas labaw nga kalipay kaysa pagkahibalo nga ikaw nahimong usa ka instrumento diha sa kamot sa Dios sa pagtubag og usa ka matinud-anon nga pag-ampo.

Kini nga mga baruganan migamot kang Elder Andersen.

Ang inahan sa usa ka batan-ong lalaki kinsa nahimamat og kadiyot ni Elder Andersen kausa nakahinumdom nga sa diha nga punto nga ang iyang anak nga lalaki “anaa na gayud sa ngilit sa emosyonal ug pisikal nga kadautan” sa dihang iyang nakita sila si Elder ug Sister Andersen nanglingkod sa usa ka lamesa sa cafeteria. “Sa kaulahian ang akong anak nga lalaki misulti kanako, ‘Dili na gayud unta ko moduol ni bisan kinsa nga tawo, apan sa dihang akong nakita si Elder Andersen, ako nasayud nga siya nahigugma kanako, ug diha-diha dayon ako mibarug sa akong lingkuranan ug miduol kaniya.’”

Bisan pa sa makahahadlok nga kausaban sa panagway diha sa batan-ong lalaki tungod sa iyang problema karon, si Elder Andersen nakaila kaniya ug mitawag kaniya pinaagi sa iyang ngalan. Sila si Elder ug Sister Andersen midala sa batan-ong lalaki ngadto sa panimalay, mipakaon kaniya, ug nakig-istorya og dugay uban kaniya. Dayon, bisan kadto tungang gabii na, si Elder Andersen midrayb og pipila ka mga oras aron ihatud ang batan-ong lalaki ngadto sa ilang panimalay.

“Ang impluwensya ni Elder Andersen wala mohunong diha,” mipasabut ang inahan. “Karon, ang mga tuig milabay, siya nagpadayon sa paggiya sa among anak nga lalaki, nahimong interesado sa iyang kinabuhi. Siya miluwas sa among anak nga lalaki.”

Kausa, sa dihang si Elder Andersen nagbisita sa usa ka ospital, siya nakamatikud sa usa ka 26 anyos nga pasyente nga ginganlan og Lora McPherson, kinsa mibati og pagkaarang-arang gikan sa opera nga may kalabutan sa kanser. Ang iyang inahan, nga si Nancy, misaysay:

“Si [Elder Andersen] mihatag kaniya og panalangin sa priesthood, mipadala kaniya og kopya sa mga pamulong gikan sa labing bag-o nga kinatibuk-ang komperensya, ug sa kaulahian mihangyo kang Lora sa pagpakigbahin sa iyang mga panghunahuna kon unsa ang mga butang nga siya mapasalamaton, diin iyang gigamit sa iyang pamulong sa BYU–Hawaii.

“Samtang si Lora mibati og pagkaarang-arang, si Elder Andersen midapit kaniya sa pagbisita kaniya ngadto sa iyang opisina, gilibut siya sa Church Administration Building.

“Mga pipila ka mga buwan ang milabay, sa dihang klaro na ni Lora nga ang iyang panahon dinhi sa yuta aduna nay kinutuban, si Elder Andersen mihatag kang Lora og usa ka maanindot nga panalangin, nga nagdala kaniya og hilabihan nga kahupay sa iyang pagpaabot sa iyang pagpadulong ngadto sa sunod nga kinabuhi. Sa kaulahian siya miusab sa iyang iskedyul sa pagbiyahe aron makapamulong sa lubong ni Lora.

“Kami nadani pag-ayo sa abilidad ni Elder Andersen sa pagdala sa iyang mga responsibilidad alang sa tanan ug sa iyang pamilya ug gihapon nakahimo og higayon sa pagbuhat alang niini. Siya tinud-anay gayud nga ehemplo sa pahimangno sa Manluluwas sa pagpangita ug pag-alagad niadtong nanginahanglan.

Naghisgot kabahin sa calling sa iyang amahan isip usa ka Apostol, ang anak nga lalaki nga si Brandt miingon, “Kini nga call makapausab og kinabuhi, apan kini dili makapausab sa kinabuhi sa akong mga ginikanan. Sila susama sa pribado ingon man sa ilang kinabuhi sa publiko.” Ang tanan kinsa nakaila kang Elder Neil L. Andersen mouyon gayud.

Kini nahimo nakong panalangin nga nahimong suod nga makauban si Elder Andersen panahon sa iyang pagpangalagad isip usa ka General Authority. Ang hugot nga pagtuo nga tataw kaayo bisan sa iyang pagkabata nagpaluyo gihapon kaniya. Siya motudlo sa ebanghelyo nga puno sa konbiksyon, tungod kay siya matinud-anon kaayo nga nagpuyo sa matag aspeto niini sa iyang kinabuhi. Ang iyang tambag dili gayud mapakyas. Ako nakaobserbar nga siya napanalanginan uban sa propetikanhong mga kaalam nga ako masaligon nga motubo lamang uban sa katungod sa iyang bag-o nga calling isip usa ka Apostol ni Ginoong Jesukristo.

Sa iyang pagbuhat niining sagrado nga pangalagad, si Elder Andersen mapainubsanong mideklarar: “Ako nalipay sa usa ka kasarang alang sa balaang pagka-apostol nga walay lain nga mahimong hatagan og pagtagad, ang Ginoo mipanalangin pag-ayo kanako. Nasayud ako sa hingpit ug piho nga ka klaro pinaagi sa gahum sa Espiritu Santo nga si Jesus mao ang Kristo, ang Hinigugma nga Anak sa Dios.”³