Nasobrahan ka Balaan?

Nasobrahan ka balaan.”

Ang dose-anyos nga si Ian Caloobanan nakurat sa mga pulong sa iyang higala. Wala niya hunahunaa nga ang iyang kaugalingon balaan.

Ang iyang higala mipadayon, “Sukad nga nagpasakop ka sa mga Mormon, ikaw nahimong usa ka killjoy. Dili na ka makig-inom uban kanamo. Dili na ka mouban kanamo nga maglingaw-lingaw matag Dominggo. Nasobrahan ka balaan.”

Ang mga pulong sakit, apan … unsa pa man ang iyang mahimo? Siya nabunyagan na ug karon naghupot sa Aaronic Priesthood. Siya nausab, ug para kang Ian, siya nausab ngadto sa mas maayo. Apan balaan? Tingali dili pa.

Si Ian, kinsa nagpuyo sa Las Piñas Philippines Stake, nabunyagan sa dihang 10 ang iyang panuigon. Sa dihang ang mga elder mitudlo kaniya sa mga leksyon, sila mihangyo kaniya nga mag-ampo aron masayran nga ang Simbahan tinuod. Iya kining gihimo. “Ako mibati og kalipay ug gaan kaayo ang paminaw,” siya miingon. Sa kaulahian siya nakaamgo nga mao kadto ang Espiritu Santo nga nagpamatuod sa kamatuoran ngadto kaniya.

Sa wala pa siya magpasakop sa Simbahan, si Ian naanad nga moinom og tsa uban sa iyang mga higala. Siya usab moadto og praktis sa cheering matag Dominggo, nangandam nga maoy mangulo sa cheering sa mga kalihokan sa sports sa ilang eskwelahan. Apan siya mihunong sa pagbuhat niadtong mga butanga. Hinoon, siya misugod sa pag-adto sa simbahan, bisan og siya lamang sa iyang pamilya ang nagbuhat niini. Ang iyang amahan misuporta kang Ian sa iyang pagtambong sa Simbahan, ug ang iyang ina-ina, nga dili miyembro, mohatud kaniya sa simbahan ug dayon kuhaon siya pagkahuman.

Kon pangutan-on nganong siya moadto man gayud sa simbahan nga unta mas sayon man nga magpabilin sa balay, siya yanong moingon “Ako mosimba kay gusto nako nga ang akong pagtuo molig-on.”

“Si Ian usa ka maayo nga ehemplo kon unsa ang gipasabut nga mahimong usa ka disipulo ni Jesukristo,” ang iyang bishop miingon. “Siya matinud-anon nga moadto sa simbahan, ug dili siya daling mahiubos. Daghan siya og mga higala dinhi. Siya naghinam-hinam nga modawat sa priesthood ug nanghangyo sa iyang papa nga palitan siya og puti nga polo aron iyang masul-ob kon siya mopasa sa sakrament.”

Ang hingpit nga kalipay ni Ian sa pagkakita sa ebanghelyo lisud ihulagway. Iyang gihatagan ang usa sa iyang mga magtutudlo og kopya sa Basahon ni Mormon ug iyang gidapit sa pagpakigkita sa mga misyonaryo. Ang pipila sa iyang mga kauban sa eskwelahan mirespeto kaniya sa iyang bag-ong mga sumbanan ug nakapangutana kaniya kabahin sa ebanghelyo. Ang uban mibugal-bugal kaniya.

Si Ian nagpadayon sa pagsunod sa mga sugo kutob sa iyang mahimo.

Kay nakasinati na sa hingpit nga kalipay ug ingon man sa mga pagpanglutos tungod sa pagpasakop sa Simbahan, si Ian adunay maalamong tambag para kanatong tanan: “Padayon sa hugot nga pagtuo. Pagtuon sa mga kasulatan. Pag-ampo. Salig ni Jesukristo. Ipasalig sa imong kaugalingon nga mosunod sa ebanghelyo. Pag-usab nga mahimong mas maayo.”

Ug dili ba mao kini ang angayang buhaton sa pagkamiyembro sa Simbahan? Motabang kanato nga mausab aron mahimong mas maayo. Motabang kanato, nga sa kaulahian, mahimong unsay gusto ni Jesus kanato nga mamahimo—balaan.