Ang Dugay nang Nawala nga Bahandi

Dili pa dugay, samtang naglingkod ko nga naghulat alang sa pangbukas nga tulumanon sa miting sa priesthood, ang akong kompanyon sa home teaching naghisgut nga ang akong mga kasulatan anaa sa ward sa lost and found.

Sa dihang akong gitan-aw ang akong kilid, bisan pa niana, nakita gihapon nako nga anaa ang akong bag-ong mga kasulatan, nga gihatag sa akong asawa kanako. Ang akong daan nga mga kasulatan, nakabutang sa basket tupad sa lingkuranan sa among sala. Natingala ako.

“Unsa ang imong middle initial?” nangutana ang akong kompanyon.

“R,” miingon ko.

“Mao kana ang nakasulat nga ngalan,” mitubag siya. Ako kining kuhaon para nimo.”

Mibalik siya pagkataud-taod ug mitunol kanako sa Biblia nga adunay ngalan nako sa milubad nga bulawan nga mga letra sa atubangan. Nakaila dayon ako niini. Gipaningkamutan nako nga maabli ang daan nga itom nga hapin. Ang libro naabli sa unang pahina, nga adunay sulat nga sinulat sa akong amahan. Naggunit ako sa Biblia nga gihatag sa akong mga ginikanan alang sa akong ika-12 nga adlaw nga natawhan.

Nagpuyo na ako karon sa Arizona, ug ang katapusang higayon nga akong nakita kini nga Biblia, nagpuyo pa ako sa Utah, nag-andam alang sa akong misyon. Akong gidala ang akong mga kasulatan sa seminary ngadto sa misyon ug mibilin niini nga Biblia sa balay. Akong nakita ang makapatingala nga kahigayunan nga nahitabo sa akong Biblia, sa milabay nga 30 ka tuig, gikan sa balay sa akong mga ginikanan sa Utah ngadto sa bilding sa akong ward sa Arizona.

Ang akong amahan, usa ka estudyante sa mga kasulatan, misilsil ngari kanako sa sayong pangidaron og usa ka tinguha sa pagbasa ug sa pagtuon sa pulong sa Dios. Usa ka porsyon sa sulat nga iyang gisulat sa akong Biblia nagtambag kanako isip pasiuna sa akong pagdawat sa Aaronic Priesthood:

“David, niining, imong ika-12 nga adlaw nga natawhan, ikaw makadawat sa priesthood ni Aaron isip usa ka deacon ug mahimong sulugoon sa Ginoo, gani sama sa imong pangalan, si David ang hari. Samtang siya nagbinuotan sa maalamon nga paagi, ang Ginoo mipanalangin kaniya.

“Mao usab kini kanimo. Kon ikaw magbinuotan sa maalamon nga paagi ug mosunod sa Ginoo, Siya mopanalangin kanimo ug motawag kanimo sa pagserbisyo Kaniya.

“Pagmalig-on ug pagmatinud-anon, Anak. Tun-i kini nga libro sa makugihon nga paagi, ug kini makahatag kanimo og kalig-on.”

Ang mga pulong sa akong amahan ingon ka makahuluganon kanako karon sama kaniadto mga 30 ka tuig na ang milabay, tingali mas labaw pa. Mapasalamaton kaayo ako nga nakadawat pag-usab sa gasa sa akong unang Biblia uban sa walay katapusan nga tambag sa akong amahan.