“Ang akong higala nagsugod sa pagpanigarilyo. Unsaon nako sa pagtabang kaniya aron siya mohunong nga dili siya malain?

Sultihi siya nga ikaw nahigugma ug nagpakabana kaniya. Sa maayong paagi, ipahinumdom kaniya nga ang pagpanigarilyo makadaut sa lawas. Sultihi siya nga ikaw gustong motabang kaniya sa paagi nga imong mahimo, ug pangutan-a unsa ang imong mahimo.

Sa dihang ako naa pa sa high school, daghan sa akong mga higala ang nagsugod sa pagpanigarilyo. Ako lamang ang miyembro sa Simbahan nga natipon niadtong grupoha sa mga higala. Sila nakahibalo nga ako miyembro sa Simbahan. Kausa sila nangutana kanako ngano nga dili ko manigarilyo. Ako mipahiyum ug mapainubsanong mitubag, “Kami nasayud nga ang Biblia miingon nga ang atong lawas usa ka templo, ug kini usa ka espesyal nga gasa nga gihatag kanato. Busa, kita kinahanglan nga mohigugma ug moatiman nianang hinatag nga gasa ngari kanato tungod kay kini gikan sa Dios.” Sila mitubag nga miingon nga siguro ako husto ug kita kinahanglan nga moatiman sa atong mga lawas. Ako mipaambit sa akong pagpamatuod kabahin sa Pulong sa Kaalam ngadto kanila. Kon atong ipakita nga giatiman nato ang atong lawas, kita mapanalanginan uban sa maayong panglawas ug kahibalo. Ako nasayud tungod sa ekspresyon diha sa ilang mga nawong nga sila mituo unsa ang akong gipakigbahin ngadto kanila. Sukad adtong adlawa ako nakakita og kalamboan diha kanila. Ang pagpakigbahin sa imong pagpamatuod niadtong nanlimbasug batok sa pagpanigarilyo makatabang kanila sa pagpili sa husto.

Una, ako mag-ampo ngadto sa Langitnong Amahan aron sa pagtandog sa iyang kasingkasing, sa pagtabang kaniya nga makasabut sa kaimportante sa Pulong sa Kaalam, ug sa pagtabang kaniya nga mausab. Ako mopahinumdom kaniya sa makadaut nga epekto sa pagpanigarilyo, sa espiritwal ug pisikal nga paagi. Ako usab mopahinumdom kaniya sa iyang bili isip usa ka potensyal nga inahan ug ang iyang lawas mao ang templo sa Dios ug ang Langitnong Amahan dili malipay kon iya kining hugawan. Ako moawhag kaniya sa pag-ampo para sa tabang.

Ako kanunay nga naghunahuna nga ang pagpakig-istorya ngadto sa mga higala kabahin sa mga problema nga ilang giatubang mao ang labing maayong paagi nga sila mosalig kanimo. Ang pagpakabana mohimo kanila nga mahibalo nga ikaw naghunahuna kanila ug sa unsay ilang naagian. Kon ikaw adunay mas maayo nga kahibalo kabahin sa unsa ang ilang giatubang, ikaw makahatag og mga sugyot ug makatanyag og tabang. Kini mopakita sa imong mga higala nga adunay usa ka tawo nga igong nagpakabana sa pagsulti kanila nga mohunong sa pagpasakit sa ilang kaugalingon.

Ang unang butang nga imong kinahanglang buhaton mao ang pagpakita sa imong gugma ug kinasingkasing nga interes ngadto kaniya. Kon siya makahibalo nga ikaw nagpakabana kaniya, ikaw kinahanglan nga mosulti kaniya sa matinahuron ug mapainubsanong paagi kabahin sa iyang desisyon sa pagsugod og panigarilyo. Pahinumdumi siya kon si kinsa siya ug sa iyang bili isip usa ka tawo ug sa kadaut nga ihatag sa pagpanigarilyo nganha kaniya. Ikaw usab mahimong mokutlo niining bersikulo diha sa mga kasulatan nga naghisgut kabahin sa Pulong sa Kaalam ug sa mga panalangin nga gidala niini (tan-awa sa D&P 89). Kon kita maglikay sa paghukom, kini mas dali nga moabut ngadto sa mga kasingkasing sa tawo.

Ang panaghigala usa ka sensitibo nga dapit aron mapadangat ang imong personal nga mga pagbati ug opinyon. Kini gani mas lisud pa gayud kon ang ebanghelyo maapil na og hisgot. Ako moawhag kaninyo sa pagpakita sa inyong pagpakabana ngadto sa inyong higala ug ipasabut ngadto kaniya nga ang pagpanigarilyo makadaut sa panglawas. Isulti nga ikaw nanghinaut nga walay kadaut nga mahitabo kaniya sa pisikal nga lebel, ug kon ang kahigayunan moabut na, ipakigbahin ang imong personal nga mga pagbati kabahin sa Pulong sa Kaalam. Ang Langitnong Amahan mopanalangin kanato kon atong ampingan ang usa sa Iyang labing bililhon nga gasa ngari kanato: ang atong mga lawas.