Ang Kaimportante sa Pag-ampo

Bag-o lang akong nakapauli gikan sa full-time nga misyon ug napanalanginan nga makakita og trabaho nga makatabang kanako sa pagtigum og kwarta alang sa balayranan sa kolehiyo. Ako gusto gayud nga magkugi aron ang akong employer mopatrabaho sa uban pa nga returned missionaries.

Ang akong trabaho yano ra. Akong gibuhat ang bisan unsang trabaho nga kinahanglan nga buhaton alang sa construction engineering company. Kini sa kasagaran nagpasabut sa paghimo og yano nga mga laboratory testing. Usa ka adlaw niana, nakaiskedyul ako sa pagkuha og mga sampol sa mga materyal sa kontruksyon gikan sa daghang mga dapit ug ibalik kini ngadto sa laboratoryo. Gihatagan ako og daan nga trak aron sa paghimo sa akong biyahe, ug dayon mibyahe ko.

Miabut ako sa unang lugar, mitimbaya sa foreman, ug daling nakita ang mga sampol sa semento ug sa puthaw. Human mabutang kini sa trak, akong gikuot sa bulsa ang akong yawe sa trak. Sa akong kahibulong, walay sulod ang akong bulsa. Akong gisusi ang yawehanan ug nangita palibut sa trak apan wala makit-i ang yawe. Nahunahunaan nako nga tingalig nahagbong kini samtang naglakaw sa dapit sa konstruksyon. Samtang akong gibalik ang akong mga giagian, nag-ampo ako sa hilom, apan wala gihapon nako makit-i ang yawe.

Gipangita dayon nako og maayo diha sa trak, nangita gani ilawom sa mga hapin sa salog. Walay yawe. Akong giduko ang akong ulo ug kinasingkasing nga nag-ampo, mipasabut nga ako gusto nga magmakugihon ug dili malangan sa unang gibuhat nianang adlawa. Nagsugod na usab ako sa pagpangita samtang naminaw sa tubag sa akong pag-ampo. Akong gibati ang usa ka impresyon sa pagtan-aw sa ilawon sa trak, mao nga akong gitan-aw dayon, nagduhaduha sa pagtan-aw sa yuta duol sa akong mga tiil. Wala gihapon ako makakita og yawe, mao nga ako mibalik sa palibut sa konstruksyon.

Sa akong pagbalik ngadto sa trak, wala gihapon ang yawe. Unsaon nako sa pagsulti ang akong bag-ong employer nga akong nawala ang yawe ug wala makahuman sa sayon nga buluhaton? Ako sa hilom nag-ampo pag-usab, ug mibalik ang impresyon nga motan-aw ilawom sa trak pag-usab. Akong gitan-aw pag-usab, ug sa dihang wala nako makita ang yawe, ako na unta nga ibaliwala ang impresyon. Apan mihukom dayon ako sa paglakang og pipila ka mga lakang palayo sa trak ug mitan-aw pag-usab.

Sa kalit lang ako kining nakita! Tingali nahulog kini sa dihang mikanaog ako sa trak. Layo-layo lang kini og gamay ilawom sa trak nga wala nako kini makita sa unang duha ka mga higayon sa akong pagtan-aw. Naulaw ako nga wala maminaw pag-ayo sa mga pag-aghat sa Espiritu.

Nianang adlawa ug sa daghang mga adlaw sukad niana, naghunahuna ako kon unsa ka mapailubon ug kamahigugmaon ang Espiritu ngari kanako. Kon kami manganta og, “Ako nasayud ang akong Amahan buhi ug nahigugma kanako usab” (“I Know My Father Lives,” Hymns, nu. 302), ang akong kasingkasing matandog. Ako natingala nga ang atong Amahan nahigugma kaayo kanato nga Siya motubag sa atong pinakayano nga mga pag-ampo.