Kanus-a Ko Kinahanglan nga Mokuha sa Akong Patriyarkal nga Panalangin?

Si Propeta Joseph Smith mipasabut, “Bisan asa ang Simbahan ni Kristo matukod dinhi sa yuta, kinahanglan gayud nga adunay usa ka Patriarch alang sa kabulahanan sa kaliwatan sa mga Santos, sama kang Jacob kaniadto sa paghatag sa iyang patriyarkal nga panalangin ngadto sa iyang anak nga mga lalaki.”¹

Ang inyong patriarch sa stake usa ka mapahinungoron nga sulugoon sa Langitnong Amahan. Siya na-ordinahan ngadto sa katungdanan sa usa ka patriarch ug mohupot niana nga katungdanan hangtud sa iyang tibuok kinabuhi. Siya sa kasagaran usa ka mas hamtong nga lalaki kinsa nasayud sa daghang mga butang nga imong pagaatubangon samtang ikaw padulong ngadto sa pagkahamtong.

Ang iyang calling mao ang paghatag og mga panalangin. Dili siya usa ka counselor, mao nga siya dili manambag. Dili siya usa ka bishop, mao nga siya dili mohukom. Kon iya nang ipandong ang iyang mga kamot sa imong ulo aron sa paghatag og panalangin, ang Langitnong Amahan, pinaagi sa mga pag-aghat sa Espiritu Santo, mohatag sa patriarch og mga ideya, konsepto, ug gani usahay piho nga mga pulong para kanimo. Ang patriarch dayon moapil niining mga konsepto ug mga ideya diha sa imong panalangin.

Si Presidente Harold B. Lee (1899–1973) mihulagway sa usa ka patriyarkal nga panalangin isip usa ka “[paragrap] gikan sa libro sa inyong mga kalagmitan o posibilidad.”² Samtang ang patriarch mopandong sa iyang mga kamot sa imong ulo, imong makita ang imong panalangin nga sa kagasagaran naglakip sa:

Pahayag sa katungod sa patriarch. Mga panalangin nga gihatag pinaagi sa katungod sa Melchizedek Priesthood ug pinaagi sa pagdasig sa Espiritu Santo.

Pagdeklarar sa kaliwatan. Ang matag miyembro sa Simbahan makapanunod sa espiritwal nga mga panalangin ug mga responsibilidad sa usa sa dose ka tribo sa Israel. Pinaagi sa inspirasyon gikan sa Espiritu, ang patriarch modeklarar sa tribo diin ikaw modawat niining mga panalangin. Kini nga kaliwatan dili yanong itino pinaagi sa imong gigikanan o nasyonalidad. Ang mga managsoon o paryente sa pamilya mahimong maggikan sa lain-laing mga tribo sa Israel. Kini nga kaliwatan sa kasagaran may kalabutan sa imong mga responsibilidad sa gingharian sa Ginoo. Daghang mga miyembro sa Simbahan mga kaliwat nila ni Ephraim, Manasseh, o Juda, diin mao ang labing kasagarang mga tribo sa Israel niining panahona sa atong pagpadayon og sangyaw sa ebanghelyo ngadto sa tanang kanasuran, kaliwatan, pinulongan, ug katawhan.³

Usa ka personal nga panalangin. Niining bahina sa imong panalangin, ikaw makadawat og dinasig ug gikan sa propeta nga mga pahayag mahitungod sa imong kinabuhi. Ang imong panalangin mahimong maglakip sa nagkalain-laing mga pangandoy nga padulong na sa katumanan, mga saad sa Ginoo para kanimo, ug mga tambag ug mga pasidaan aron motabang sa pagpanalipod kanimo gikan sa kakuyaw o kalisdanan. Ang imong panalangin dili maglakip sa matag hitabo nga mahitabo kanimo, apan kini maglakip niadtong imong gikinahanglan nga hunahunaon gayud og maayo. Kon ang pag-alagad og usa ka misyon wala mahisguti, kini wala magpasabut nga ikaw dili makaalagad og usa ka misyon. Kini nagpasabut lang nga ang pagpangalagad og misyon usa ka butang nga ang Dios mibati nga imong mabuhat bisan dili na kinahanglan og espesyal nga pagtagad diha sa imong patriyarkal nga panalangin.

Ang imong panalangin mahimong taas o mubo. Ang gitas-on sa imong panalangin dili mao ang sukdanan sa imong katakus.

Ang pagbasa sa imong panalangin susama sa pagbasa sa mga kasulatan. Samtang imo kining basahon, bag-ong mga ideya kabahin sa unsay imong angayang buhaton ug maayong mga pagbati mahitungod sa imong kinabuhi moabut kanimo. Kon pirme nimong basahon ang imong panalangin, mas imong masabtan ang kahulugan niini para kanimo.

Ang imong patriyarkal nga panalangin usa ka pagpadayag nga gihatag para lang gayud kanimo. Kini personal, sagrado, ug kompidensyal. Ikaw dili kinahanglang mopakigbahin niini aron lang sa pagtagbaw sa pagkakuryuso sa uban. “Kini gihatag pinaagi sa inspirasyon sa Balaang Espiritu ug kinahanglang basahon ug hubaron ubos sa impluwensya sa mao gihapon nga Espiritu.”⁴

Sa yano nga pagkasulti, ang labing maayo nga panahon para kanimo nga mokuha sa panalangin mao kon ikaw andam na. Ang pagka “andam” nagpasabut nga andam na sa emosyonal ingon man usab sa espiritwal nga paagi. Kini posible panahon sa imong mga tuig sa kabatan-on. Kini mao ang panahon nga ikaw magsugod na sa pagkahimong independente ug magsugod na sa paghunahuna kabahin sa kinabuhi ug sa unsay mahitabo kanimo sa umaabut.

Ikaw moabut sa punto nga ikaw tinud-anay na nga magtinguha sa pag-angkon sa panalangin—dili tungod kay ang imong mga higala nagkuha sa ilaha apan tungod kay ikaw nagtinguha niini para sa imong kaugalingon. Kini mahitabo kon imong makita nga ang uban nagbuhat sa mga butang nga ikaw nasayud nga sayop. Kini mahimong mahitabo kon ang usa ka higala o paryente mamatay. Kini mahimong mahitabo kon ikaw makadungog og usa ka pakigpulong sa simbahan nga nakatandog sa imong kasingkasing. Kini mahimong mahitabo kanimo samtang ikaw magbasa sa kasulatan ug magkat-on kabahin sa Manluluwas. Kini mahimong mahitabo kon ikaw mag-inusara ug nagsugod sa pagbati sa gugma sa Dios para kanimo. Kini mahimong mahitabo samtang magkaduol na ang imong edad sa pag-alagad og misyon, sa pag-eskwela sa kolehiyo, mosulod og serbisyo sa militar, o magminyo sa templo.

Kon ikaw andam na nga modawat sa patriyarkal nga panalangin, ikaw interbyuhon sa imong bishop o branch president. Siya mangutana kanimo kabahin sa imong katakus, sama sa kon ikaw ba nagsunod sa Pulong sa Kaalam, nagbayad og hingpit nga ikapulo, nagpuyo og usa ka limpyo nga moral nga kinabuhi, ug aktibo nga miyembro sa Simbahan. Hinoon, ikaw dili kinahanglan nga perpekto para mahimong angayan. Ang pagtinguha og panalangin ug ang kagustuhan nga masayud unsaon sa pagpuyo nga mas duol sa imong Langitnong Amahan sama ra usab ka importante sa pagkahimong angayan o takus. Mahimo nimong dugangan ang imong tinguha alang sa panalangin pinaagi sa personal nga pag-ampo, pagtuon sa ebanghelyo, ug pinaagi sa pagpaningkamot nga maminaw sa Espiritu.

Human nimo madawat ang imong panalangin, ang patriarch mohatag kanimo og usa ka gisulat nga kopya. Tagu-i kini nga kopya sa usa ka luwas nga dapit. Ayaw kini wagtanga. Apan, kon ikaw kinahanglan nga mokuha og kopya, mahimo kang mokontak ngadto sa headquarters sa Simbahan sa Siyudad sa Salt Lake.

Ang patriyarkal nga panalangin anaa alang sa matag takus nga miyembro sa Simbahan. Kini usa ka personal nga gasa para kanimo gikan sa imong mahigugmaong Langitnong Amahan, kinsa nagtinguha sa pagpanindot ug paggiya sa imong kinabuhi ug sa pagtabang kanimo nga makabalik og puyo uban Kaniya.