Pagbantay batok sa mga Kakuyaw nga anaa sa Sulod Ang Sugilanon sa Mixco Viejo

Ang Mixco Viejo, usa ka nalumpag nga siyudad duol sa panimalay sa mga Iquic, nagsugod sa sayo sa mga a.d. 900. Sa wala pa ang pagkagun-ob niini niadtong 500 ka tuig ang miagi, kini tingali usa ka nindot kaayo nga talan-awon. Ang gipalig-on nga siyudad nahimutang sa ibabaw sa nagsunod-sunod nga mga bungtod nga may mga pang-pang duol sa tanang kilid. Ang mga archaeologist mibana-bana nga sa makausa ang siyudad mao ang panimalay sa may kapin sa 1,500 ka mga tawo, nga may lain pang 7,000 sa naglibut nga mga walog.

Ang mga bahin sa kasaysayan sa pagkagun-ob sa Mixco dili sigurado, apan ang sugilanon naghatag og impormasyon. Niadtong 1525 ang Katsila nga conquistador nga si Pedro Alvarado mipalibut sa Mixco Viejo. Ang mga Katsila ug ang ilang mga kaalyado nga nagpuyo didtong lugara misulay og kuha sa siyudad sulod sa kapin sa usa ka buwan, nga nakalasan og daghang mga kinabuhi. Hinoon, ang Mixco Viejo nagpabilin nga mora og dili gayud masudlan sa kaaway nga puy-anan alang sa mga katawhan niini.

Apan ang sugilanon nag-ingon nga adunay laing agianan—usa ka sekreto nga agianan padulong ngadto sa siyudad gikan sa usa ka langub nga dili kaayo layo, usa ka agianan nga ang mga tawo sa Mixco Viejo wala kaayo magtagad nga kini kinahanglang panalipdan tungod kay kini gamay ra ug maayo kaayong pagkatago.

Ang mga Katsila nakakita niini. Gipahimuslan nila kining gamay nga agianan nga wala panalipdi sa mga katawhan, gipakuratan ang mga nagpuyo sulod sa siyudad ug giguba ang Mixco Viejo.

Si Presidente Iquic nagtuo nga ang balay ug pamilya susama sa Mixco Viejo—ubos sa espirituhanong paglibut diin si Satanas “nagpasiugda og gubat batok sa mga santos sa Dios, ug miliyok kanila palibut” (D&P 76:29).

“Ang kaaway kanunay nga nagpangita og agianan pasulod,” miingon si Presidente Iquic. “Kita kinahanglan nga dili masakpan nga dili andam.”

Walay mga pisikal o espiritwal nga bong-bong ang makapugong sa kontra kinsa makakita og pultahan nga walay nagbantay. Ang mga propeta sa Dios nagpasidaan sa delikadong mga lutsanan diin ang mga kaaway makasulod bisan unsa pa kalig-on ang bong-bong. Kadaghanan niining mga pultahan adunay kalambigitan sa unsa ang atong mga gipangtan-aw, unsa ang atong gipaminaw, ug giunsa nato paggamit ang atong oras. Sa gihapon, human nato madungog ang mga pasidaan gikan sa propeta, anaa gihapon nato ang paghukom unsa ang atong buhaton.

Ang Espiritu Santo importante kaayo samtang kita mohukom kon ang atong gibuhat makalig-on ba kanato o makapahuyang kanato.

“Ang paagi sa paghukom ingon ka yano … sama nga ang kahayag sa kabuntagon gikan sa kangitngit sa kagabhion,” si Mormon mitudlo. “Kay tan-awa, ang Espiritu ni Kristo gihatag ngadto sa matag tawo, nga siya masayud sa maayo gikan sa dautan” (Moroni 7:15–16).

“Kita nagkinahanglan sa Espiritu Santo isip atong giya,” miingon si Presidente Iquic. “Kinahanglan natong iapil sa atong mga kinabuhi ang mga butang nga modapit sa Espiritu Santo ug isalikway kadtong mga butang nga makapasilo Kaniya.”

“Ang sumbanan klaro,” mitudlo si Elder David A. Bednar sa Korum sa Napulog Duha ka mga Apostoles. “Kon adunay butang nga atong mahunahuna, makita, madungog, o mabuhat nga makapalayo kanato sa Espiritu Santo, nan moundang kita sa paghunahuna, pagtan-aw, pagpaminaw, o pagbuhat sa mao nga butang. … Ang pagdawat ‘sa Espiritu Santo alang sa [atong] paggiya’ (D&P45:57) posible ug mahinungdanon alang sa atong espirituhanong pagtubo ug kalingkawasan sa nagkagrabe ka dautan nga kalibutan.”¹

Karon, ang mga katawhan misulay sa pagpreserbar ug pagtukod og balik sa nangadaut sa Mixco Viejo—usa ka malisud nga buluhaton human sa 500 ka tuig.

Sila si Presidente ug Sister Iquic naningkamut sa pagpreserbar sa ilang pamilya ug sa pagpalig-on niini batok sa kalibutan, usa usab ka lisud nga buluhaton apan mahimong posible pinaagi sa pag-ampo sa pamilya (tan-awa sa D&P 10:5), pagtuon sa kasulatan sa pamilya (tan-awa sa 1 Nephi 15:23–24), family home evening (tan-awa sa 2 Nephi 25:26), ug pagtudlo sa kaimportante sa pagkamasulundon (tan-awa sa D&P 88:34).

Sila si Presidente ug Sister Iquic nagtudlo usab sa paghinulsol tungod kay sila nakasabut nga bisan inigka human sa tanan nga nabuhat nila ug sa ilang pamilya aron panalipdan ang ilang mga kaugalingon, aduna pay daghang pultahan nga angay bantayan. Ug sa usa ka higayon sa kahuyang nga hinungdan sa pagkaguba, ang usa ka tawo mahimong mapukan.

Agig pagpangandam nianang mga panahona, sila si Presidente ug Sister Iquic niila nga sila kinahanglan nga motudlo sa ilang mga anak dili lamang sa hugot nga pagtuo diha kang Jesukristo ug sa Iyang Pag-ula apan sa paghinulsol usab (tan-awa sa D&P 68:25) aron kon ang ilang mga anak makahimo og mga sayop, sila moila sa ilang nahimong sayop ug kahibalo unsaon sa pag-ayo niini.

“Ang tintasyon anaa kanunay,” miingon si Presidente Iquic. “Kinahanglan nga atong ilhon ang atong mga sayop ug maghinulsol diha-diha dayon, o kini mopugong sa atong pag-uswag ug mopahilayo kanato gikan sa proteksyon sa Espiritu.”

Sa nagkasawop nga kahayag sa adlaw ug anaa sa hunahuna ang sugilanon sa Mixco Viejo, si Presidente Iquic nanghipus sa iyang mga himan ug nanawag sa iyang tibuok pamilya alang sa pag-ampo sa gabii batok sa nagkalawum nga kangitngit.