Tinguhaa ang Edukasyon ug Tibuok Kinabuhi nga Pagkat-on

D&P 93:36–37: “Ang himaya sa Dios mao ang salabutan, o, sa lain nga mga pulong, kahayag ug kamatuoran. Ang kahayag ug kamatuoran mobiya niana nga usa ka dautan.”

Julie B. Beck, kinatibuk-ang presidente sa Relief Society: “Ang Ginoo misulti kanato nga ang atong panahon kinahanglan nga ‘ihalad ngadto sa pagtuon sa mga kasulatan’ (D&P 26:1) ug nga ‘ang Basahon ni Mormon ug ang balaan nga mga kasulatan gihatag … alang sa [atong ] panudlo’ (D&P 33:16). Ang matag babaye mahimo nga usa ka magtutudlo sa doktrina sa ebanghelyo sa iyang panimalay, ug ang matag sister sa Simbahan nagkinahanglan og kahibalo sa ebanghelyo isip usa ka lider ug magtutudlo. Kon wala pa nimo nabatasan ang kada adlaw nga pagbasa sa mga kasulatan, sugdi kini karon ug pagtuon kanunay aron maandam alang sa inyong responsibilidad niini nga kinabuhi ug sa kahangturan” (“Ang Akong Kalag Nalipay sa mga Kasulatan,” Liahona, Mayo 2004, 107–8).

Presidente Thomas S. Monson: “Dugang sa atong pagtuon sa espirituhanong mga butang, ang sekyular nga pagkat-on importante usab. … Ako moawhag kaninyo sa pagpadayon sa inyong edukasyon—kon wala pa kamo makasugod o makahimo—aron kamo makapangandam sa pagsangkap kon ang mga higayon gikinahanglan.

“Ang inyong mga talento modako samtang kamo magtuon ug magkat-on. Kamo mas makatabang sa inyong mga pamilya sa ilang pagkat-on, ug kamo makabaton og kalinaw sa hunahuna nga makahibalo nga kamo andam sa inyong mga kaugalingon alang sa mga kalisdanan nga moabut sa inyong kinabuhi” (“Tulo ka mga Tumong nga Mogiya Kaninyo,” Liahona, Nob. 2007, 119).

Presidente Henry B. Eyring, Unang Magtatambag sa Unang Kapangulohan: “Kinahanglan kitang mohimo og lisud nga mga desisyon kon unsaon nato paggamit ang atong panahon. … “Apan hinumdumi, kamo interesado sa edukasyon, dili lamang alang sa mortal nga kinabuhi kondili alang sa kinabuhing dayon. Kon klaro ninyong makita kana nga kamatuoran uban sa espirituhanon nga salabutan, mahimo nga ibutang ninyo pag-una ang espirituhanon nga pagkat-on ug sa gihapon dili ibaliwala ang sekyular nga pagkat-on. …

“… Ug tungod kay ang unsay atong gikinahanglan nga masayran lisud nga maila, kita kinahanglan og panabang sa langit aron masayud asa niining dili maihap nga mga butang ang mahimo natong tun-an nga buot natong makat-unan sa maalamong paagi. Kini usab nagpasabut nga kita dili mahimong mag-usik-usik sa atong oras aron sa paglingaw-lingaw sa atong mga kaugalingon kon kita adunay kahigayunan sa pagbasa o sa pagpaminaw sa bisan unsa nga butang nga makatabang kanato sa pagkat-on unsa ang tinuod ug magamit kaayo. Ang dili kapugngan nga pagkakuryuso mao ang atong ilhanan” (“Education for Real Life,” Ensign, Okt. 2002, 18, 19).

Elder Robert D. Hales sa Korum sa Napulog Duha ka mga Apostoles: “Ang pipila sa mga nag-unang kinaiya nga gikinahanglan aron mahimong usa ka tibuok kinabuhi nga tigkat-on mao ang kaisug, matinud-anong tinguha, pagkamapainubsanon, pagkamapailubon, pagkakuryuso, ug andam nga makig-istorya ug mopakigbahin sa kahibalo nga atong naangkon. …

“Akong pinalanggang mga sister, ayaw og ipaubos ang inyong bili isip usa ka babaye o isip usa ka inahan. … Ayaw tuguti nga ang kalibutan motino, mopaubos, o mopugong sa inyong mga pagbati nga magkat-on sa tibuok kinabuhi ug sa mga mithi sa pagkainahan diha sa panimalay—dinhi sa mortal ug sa walay katapusan nga pagkat-on ug mga kaayohan nga inyong mahatag ngadto sa inyong mga anak ug sa inyong kapares.

“Ang tibuok kinabuhi nga pagkat-on gikinahanglan alang sa kalagsik sa atong tawhanong panghunahuna, lawas, ug kalag. Kini mopalambo sa atong bili sa kaugalingon ug mopalihok sa kaugalingon nga dili na sugoon. Ang tibuok kinabuhi nga pagkat-on makapalagsik sa hunahuna ug usa ka maayong panagang sa pagkatigulang, sa kasubo, ug pagduha-duha sa kaugalingon” (“The Journey of Lifelong Learning,” sa Brigham Young University 2008–2009 Speeches [2009], 2, 8–9).