Misyonaryo sa Pasko

Atol sa akong ikaduha nga Pasko isip full-time nga misyonaryo, ang akong kompanyon ug ako nagbisita sa bag-ong nabunyagan nga miyembro ug sa iyang pamilya. Human sa talagsaon nga panihapon sa Pasko, kami mipakigbahin kanila og mensahe sa Pasko.

Kami mihangyo sa pamilya sa pag-drawing og mga litrato sa mga butang nga makapahinumdom kanila sa panahon, sama sa mga bitoon, mga regalo, mga nativity, ug mga Christmas tree. Kami dayon nagbasa og pipila ka mga kasulatan, lakip ang 2 Nephi 19:6: “Kay ngari kanato usa ka bata matawo, ngari kanato usa ka anak nga lalaki ihatag; ug ang panggamhanan kinahanglan nga maanaa sa iyang abaga; ug ang iyang ngalan pagatawgon og Katingalahan, Magtatambag, Ang Makagagahum nga Dios, Ang Walay Katapusan nga Amahan, Ang Prinsipe sa Kalinaw.” Kami nanganta og “Once in Royal David’s City” (Hymns, nu. 205), nanan-aw og salida kabahin sa Pagkatawo ni Jesus [Nativity], ug mipamatuod kabahin ni Jesukristo.

Kadto usa ka Pasko sa yano nga mga panghitabo, layo sa among mga pamilya ug sa naandang mga pagsaulog sa Pasko, apan sa dihang kami mipamatuod kabahin sa Manluluwas, mibati ako og mas lawum nga paghigugma ug pagdayeg alang Kaniya ug sa Iyang pagkatawo sukad pa kay sa akong nahibaloan kaniadto. Nakaamgo ako nga kini mao ang akong katapusang Pasko diha sa pagserbisyo isip full-time nga misyonaryo ngadto sa akong Langitnong Amahan, apan nasabtan nako nga ang Iyang Espiritu makapamatuod ngari kanako kabahin sa Iyang Anak bisan asa man ako.