Ang Gasa

Usa sa akong paboritong kanta sa Pasko mao ang “For unto Us a Child Is Born” [Kay alang Kanato ang Usa ka Bata Natawo] gikan sa Messiah ni Handel. Kini usa ka pahinumdom kon unsa gayud ang Pasko. Kanunay akong naghunahuna unsa ang gibati ni Maria sa dihang siya giingnan sa anghel nga si Gabriel, “Kumusta ka, babayeng hinatagan sa grasya, ang Ginoo anaa uban kanimo: dalaygon ikaw diha sa mga kababayen-an” (Lucas 1:28).

Si Maria nabalaka kabahin niini, ug ang anghel mipadayon:

“Ayaw kalisang, Maria: kay naangkon mo ang kahimuot sa Dios.

“Ug, tan-awa, nagasamkon ikaw ug igaanak mo ang usa ka bata nga lalaki, ug siya imong paganganlan si Jesus.

“Siya mahimong bantugan, ug pagatawgon nga Anak sa Labing Halangdon: ug kaniya gihatag sa Ginoong Dios ang trono sa iyang amahan nga si David:

“Ug iyang pagaharian ang banay ni Jacob hangtud sa kahangturan; ug walay pagkatapos ang iyang gingharian” (Lucas 1:30–33).

Pagkatalagsaon gayud niini nga kasinatian! Ang gisaad nga anak nga lalaki ngadto ni Maria mao ang Bugtong Anak sa Langitnong Amahan diha sa unod. Siya ang pinili sa pagdala sa kalibutan sa labing nindot nga gasa sa tanan: atong Manluluwas, si Jesukristo.

Ang Langitnong Amahan mihatag niining gasa alang kanatong tanan, batan-on o tigulang, datu o kabus. Kita dili na kinahanglan nga mangita niini sa mga tindahan. Kita dili mogasto og bisan og usa ka sentabo. Kini wala giputos og sinaw nga pangputos nga papel. Ang labing ibahandi nga gasa sa tanan mao ang giputos sa mga bakbak ug gipahigda sa pasungan. Kini gipadala kanatong tanan uban sa gugma gikan sa atong Langitnong Amahan.