“Kon Ako Tua Didto”

Ang tuno nagsugod sama ka hinay sa usa ka hunghong, usa ka melodiya nga mopuno sa inyong kalag sama ka paspas nga kini mopuno sa inyong mga dunggan. Kini nahimong mas halandumon kon ang choir mosugod sa pagkanta:

Tan-awa ang choir, ug inyong makita nga ang tanang mga miyembro nanganta gikan sa ilang mga kasingkasing. Tan-awa ang mga accompanist mabinantayong naghan-ay sa matag chord ug ang mga sound technician nagbalanse sa tibuok pasundayag ngadto sa maayong pagkahan-ay sa harmony. Tan-awa ang mga young adult sa Pretoria South Africa Stake, sa ilang kaugalingon maayong pagkahan-ay sa mga background ug mga kasinatian, naghiusa sa ilang mga tingog sa pagdayeg ni Ginoong Jesukristo.

Sa tunga-tunga niining tanan mao ang 20 anyos nga conductor kinsa mao ang misulat sa matag pulong, misulat sa matag nota, mihan-ay sa matag rehearsal ug pasundayag, ug mimugna kon unsa ang resulta isip usa ka regalo sa Pasko alang sa iyang mga higala, alang sa mga miyembro sa Simbahan, alang sa komunidad, ug gani alang sa iyang Manluluwas ug sa iyang Amahan sa Langit.

Si Michael McLeod, kinsa sa dili madugay moalagad og full-time nga misyon, wala magdahum nga ang iyang pagsaulog molambo ngadto sa ingon nga kalihokan—mga pasundayag diha sa upat ka chapel, ang matag usa puno sa kapasidad nga may gatusan ka mga mahinamong mga mananan-aw nga mga miyembro. Siya yanong nagtubag sa usa ka buluhaton nga gihatag ngadto sa mga young single adult (YSA) sa iyang stake sa pag-andam og cantata, usa ka programa sa musika ug mga pulong sa pagtabang sa mga tawo sa pagsimba sa Manluluwas. Sa pagkatinuod, ang programa orihinal nga gieskedyul sa Hunyo o Hulyo 2009 apan human sa pipila ka adlaw nga pagkalangay gibalhin ngadto sa Disyembre.

“Sa dihang ang mga representante sa stake sa YSA miingon kanako unsa ang gisugo nga ilang buhaton, diha-diha dayon ako miingon, ‘Nganong dili ta mogamit og orihinal nga musika imbis nga manghulam og musika sa ubang mga tawo?’” nakahinumdom si Michael. Ang mga representante sa YSA miuyon. Ug sila nasayud si kinsa ang saktong tawo nga makahan-ay niining tanan—Michael McLeod.

Si Michael usa ka estudyante sa University of Pretoria, nag-major og edukasyon sa English ug mathematics. “Ang akong gusto gayud mao ang mahimong usa ka magtudtudlo,” siya miingon. Apan si Michael kanunay gayud nga interesado sa musika. Sa pagkatinuod, siya nagtuon niini sa seryusong paagi hangtud siya nag-17.

“Ang musika nahimo nakong kalingawan,” siya nagpasabut, “ug ganahan gihapon niini. Ganahon ko sa paagi nga ang musika makatandog sa kasingkasing sa mga tawo. Ganahan ko nga mo-conduct ug mobati sa enerhiya nga gikan sa usa ka choir, ilabi na kon kini usa ka kanta sa ebanghelyo. Ganahan ko nga magtan-aw sa kongregasyon samtang ang musika makadala ug makapabati kanila sa Espiritu samtang sila mobati sa Espiritu. Sa akong hunahuna ako nalambigit sa musika sa tibuok nakong kinabuhi tungod kay kini may dakong bili ngari kanako.”

Apan labaw sa tanan si Michael ganahan sa pagpakigbahin sa iyang pagpamatuod sa Manluluwas, ug sa pagbuhat niana uban sa musika atol sa Pasko nahimong usa ka nindot kaayo nga oportunidad. “Ang tibuok punto mao ang pagpakigbahin sa atong mga pagpamatuod kabahin sa Manluluwas pinaagi sa musika ug sa mga pulong sa cantata,” siya miingon. “Gusto namo og gamhanan nga musika ug sa samang higayon sa pagbaton og gamhanang mga pagpamatuod, busa migamit kami sa mga pagpamatuod gikan sa kasulatan sa mga tawo nga nakaila sa Manluluwas: Maria, Jose, Ana, Simeon, Pedro, Santiago, Juan ang Hinigugma, Maria Magdalena, ug kadtong mga giayo ug gitudloan ni Kristo. Kami naningkamot sa pagpasabut unsa ang ilang nahibaloan, ug kini gamhanan kaayo. Gigamit usab namo ang kaugalingong pagpamatuod sa Manluluwas. Kini miresulta nga talagsaon kaayo.”