Mensahe sa Visiting Teaching
Atong Responsibilidad sa Pag-apil diha sa Buhat sa Templo ug sa Family History
Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.
Hugot nga Pagtuo • Pamilya • Kahupayan
Sulod sa mga siglo daghang mga tawo ang namatay nga walay kahibalo sa ebanghelyo. Ang pipila niadto nga mga tawo mao ang inyong duol ug layo nga mga paryente. Sila nagpaabut kaninyo sa pagbuhat sa gikinahanglang pagsisik aron sa pagsumpay kauban ang inyong mga pamilya ug sa paghimo sa makaluwas nga mga ordinansa alang kanila.
Kadaghanan sa mga templo sa kalibutan wala kaayo nagkapuliki. Ang Ginoo nakasaad nga ang inyong mga kasingkasing mobati sa mga amahan aron ang yuta dili hingpit nga malaglag sa Iyang pag-anhi (tan-awa sa D&P 2:2–3).
Adunay personal nga mga panalangin nga inyong madawat isip resulta sa pag-apil sa buhat sa templo ug sa family history. Usa niini mao ang hingpit nga kalipay nga inyong mabati samtang kamo moalagad sa inyong mga katigulangan. Ang lain mao nga kamo makapasar alang sa rekomend sa templo, nga nagpasabut sa inyong katakus diha sa atubangan sa Ginoo. Kadtong dili takus karon sa pribelihiyo sa pagbaton og rekomend kinahanglang magpakitabang uban sa bishop o presidente sa branch aron makapasar sa labing dali nga panahon. Palihug ayaw itugot nga wala kining importante nga kwalipikasyon. Mopamatuod ako nga ang Pag-ula tinuod ug ang mga sala mapasaylo diha sa sakto nga paghinulsol.
Samtang kita moapil diha sa buhat sa templo ug sa family history, kita sigurado nga makaangkon sa Espiritu aron sa paghupay kanato sa atong mga hagit ug sa paggiya kanato sa importanting mga desisyon. Ang buhat sa templo ug sa family history kabahin sa atong buluhaton sa paghatag og kahupayan, o pagserbisyo, sa atong kaugalingong mga katigulangan.
Julie B. Beck, kinatibuk-ang presidente sa Relief Society.
Gikan sa mga Kasulatan
Malaquias 4:5–6; 1 Mga Taga-Corinto 15:29; 1 Pedro 3:18–19; D&P 110:13–16; 128:24
Gikan sa Atong Kasaysayan
“Si Propeta Joseph Smith miingon, ‘Ang labing dako nga responsibilidad dinhi sa yuta nga giandam sa Dios ngari kanato mao ang pagpangita sa atong mga patay’ (History of the Church, 6:313). Gikan sa sinugdanan, ang mga sister sa Relief Society misuporta niining dakong buhat. Sa Nauvoo niadtong 1842, ang tinguha ni Sarah M. Kimball sa pagtabang sa mga trabahante nga nagtukod sa templo nakapadasig og grupo sa mga sister sa pag-organisar sa ilang mga kaugalingon aron sila mas epektibong makapangalagad. Sa dihang sila nagsugod sa pagpundok, ang Propeta … miorganisar sa unang Relief Society subay sa sumbanan sa priesthood. Sukad niadto, ang mga sister sa Relief Society mitabang sa pagpadayon sa buhat sa Templo sa Nauvoo. …
“Niadtong 1855, walo ka tuig human ang mga Santos unang miabut sa Utah, ang Endowment House giestablisar. Si Eliza R. Snow, kinsa nahimong usa sa orihinal nga mga sakop sa unang Relief Society ug mipreserbar sa mga rekord niana nga organisasyon, gitawag ni Presidente Brigham Young niadtong 1866 aron mahimong kinatibuk-ang presidente sa Relief Society. Siya ug ang uban pang mga sister matinud-anong mga worker sa Endowment House. Dayon, samtang ang mga Templo sa St. George, Logan, ug Manti nahuman, kini nga mga sister mibiyahe sa matag templo aron sila makahimo didto sa buhat alang sa mga patay.”1
Paghulagway sa litrato pinaagi ni Jerry Garns