Ang Unang Regalo sa Pasko

Pipila ka mga semana Pasko na, apan si Truman ug ang iyang pamilya naghimo na og Christmas tree. Nadasig siya nga naghunahuna mahitungod sa mga regalo nga iyang gilauman nga makita ilawom sa Christmas tree sa buntag sa Pasko.

Paglabay sa pipila ka mga adlaw naglakaw si Truman padulong sa sala ug nakakita nga adunay usa ka gamay nga kahon ilawom sa Christmas tree. Giputos kini og pula nga papel ug gihigtan og berde nga laso.

Ang among unang regalo! Kinsa ang nagpadala niini? Si Lola kaha?

Dili!

Gikan kaha kini sa usa sa akong mga ig-agaw?

Dili!

Naglibog si Truman.

Nan, kinsa ang nagpadala niini?

Kinahanglang maghulat ug magbantay ka. Ang amo lang masulti nga kini usa ka espesyal nga regalo.

Sa paglabay sa mga adlaw, dugang nga mga regalo makita sa ilawom sa Christmas tree, apan si Truman nagpadayon sa paghunahuna mahitungod nianang unang pula nga regalo nga adunay berde nga laso. Diin man kini gikan?

Sa Pasko sa buntag, nagdali sa pagpukaw sa iyang mga igsoong lalaki ug mga ginikanan.

Pagmata! Pasko na!

Sa pag-abut sa may Christmas tree, nadasig si Truman nga makakita sa mga regalo ilawom niini.

Truman, mahimo nimong ablihan ang gamay nga kahon nga adunay pula nga papel ug berde nga laso.

Mahinamon si Truman nga sa katapusan makita na unsa ang naa sa sulod.

Gikuha ni Truman ang tabon ug nakakita sa pipila ka gagmay nga mga butang. Gitagsa-tagsa niya kini pagkuha—usa ka litrato ni Jesukristo, usa ka balak mahitungod sa pagkatawo ni Jesus, ug usa ka bitoon. Gipakita ni Truman sa tanan ang litrato, ug gibasa ni Papa ang balak.

Akong gibutang pagbalik ang kahon ilawom sa Christmas tree aron kami makahinumdom sa tinuod nga rason nga kita mosaulog sa Pasko.

Malipayon si Truman nga mahinumdom ni Jesus.

Pa, imong gibutang ang kahon ilawom sa Christmas tree, apan karon nakahibalo ko kon kinsa gayud ang naghatag kanato niini nga gasa.

Kinsa?

Ang Langitnong Amahan.