Ang Lullaby alang kang Timothy

Nakahinumdom ako sa makahadlok nga mga pulong gikan sa nurse nga nagpaanak nako: “Sa akong hunahuna aduna siyay mga komplikasyon.” Sa samang higayon, ang gidaghanon sa mga tawo diha sa delivery room midaghan nga nakapalisud sa pagpabalik sa panimuot sa akong nakompromiso nga bag-ong natawo.

Nakasulay na ako og daghang susama nga mga eksena sa una pa, apan sa lain nga higayon, isip usa ka nurse. Ako unta ang moluwas sa bag-ong natawo. Karon ako na ang inahan nga nagkab-ut sa pultahan sa incubator aron sa paghikap sa kamot sa akong anak nga lalaki, samtang usa ka transport team naghulat aron sa pagdala kaniya ngadto sa laing ospital.

Pagkabuntag nakadawat ako og tawag sa telepono gikan sa newborn intensive care unit (NICU), diin ang akong bana, si Andrew, naglingkod nga gialirungan sa mga doktor, samtang sila mipasabut sa operasyon nga gikinahanglan diha-diha dayon ni Timothy aron sa pagtangtang sa dakong tumor sa tiyan.

Misalig ako sa paglaum nga ang operasyon makaayo sa among anak ug siya makabaton og normal, malipayon nga kinabuhi. Ako siyang napanan-aw isip usa ka tambok nga bata nga may gamay nga uwat, usa ka pahinumdom sa kahadlok nga siya mabuhi lamang sa mubong panahon nga iyang gipabati ngadto sa iyang mga ginikanan.

Tulo ka semana ang milabay nianang sama nga conference room sa ospital, usa ka neurologist misulay sa pagpasabut sa dili sakto nga pagkaporma sa utok nga makapahimo sa among anak nga maulahi sa pag-ila, lisud sa pagsulti, ug sa kadugayan patulon.

Mga pipila ka adlaw human niadto, sa samang lawak, ang neonatologist miingon, “Dili nako mahunahuna nga si Timothy mouli nga walay feeding tube.” Ang among anak niwang nga may ubos sa tulo ka libras (1.4 kg) gikan sa pagkatawo, anemic, ug makitang dili mobalos ngadto sa pagpalihok [stimulation]. Kon patutuyon sa botelya, ang iyang pagsupsup hilabihang kahinay, ug masud-ipan siya sa mga sulod niini.

Ang among mga pagpaabut alang sa among anak daw mikunhod ngadto sa pagkawala. Ang kalibutan naghugno kanako. Nakapangutana ko sa saad sa Ginoo nga Siya dili gayud motugot og usa ka pagsulay nga molabaw pa sa kapasidad sa usa ka tawo sa pag-agwanta. Nabati nako nga kining palas-unon naghugno kanako sa pisikal, mental, ug espiritwal nga mga paagi. Atol sa dugay nga oras sa ospital matag adlaw, gihandom nako nga makauban ang akong duha pa ka anak ug sa pagpabalik sa among malinawon nga kinabuhi. Kon ako anaa sa balay, hilabihan nakong gihunahuna ang kaayohan sa akong bag-ong natawo nga anak ug, sa pagkatinuod, ang akong gihunahuna mao ang among bag-ong naguba nga kinabuhi.

Sa akong hilabihang kasubo nangamuyo ako sa Ginoo, pagpahibalo Kaniya sa tanang talagsaong mga pamaagi nga ako moserbisyo Kaniya kon kuhaon nalang Niya si Timothy, tugutan ako sa pagbangutan sa iyang pagkawala, ug tugutan ako sa pagpadayon sa akong kinabuhi. Ang bisan unsa pa nga butang maagwanta na nako.

Samtang kining tanan nagpadayon, ang akong kaugalingong personal nga milagro nagsugod. Daghang mga miyembro sa among ward, uban sa pipila ka mga sakop sa pamilya ug mga higala, nagpuasa ug nag-ampo alang sa among pamilya. Usa ka Dominggo sa buntag sa akong pagbangon, ako adunay kusog nga impresyon nga adunay usa ka talagsaon nga butang ang mahitabo nianang adlawa isip resulta sa tanang pagpuasa ug mga pag-ampo. Naglaum ko, siyempre, nga si Timothy diha-diha dayon malagsik ug milagrosong mosugod sa pagkaon. Sa dihang miabut ako sa NICU, si Timothy dili pa gihapon molihok sama gayud kaniadto, ug sa gihapon siya walay interes sa pagtutoy diha sa botelya. Natural lang, ako nasagmuyo, apan sa akong pagkupot niya, usa ka nindot nga pagbati ang misanap kanako nga siya ma-OK ra. Wala ko kahibalo unsa ang gipasabut sa “OK”, apan wala akoy pagduhaduha nga ang Ginoo mao ang nagdumala ug nasayud sa among pamilya.

Mga pipila ka semana ang milabay ang akong mama ug ako mibisita sa ospital. Diha sa hilum, dili kaayo hayag nga lawak, gikugos sa akong mama ang mahuyang nga gamayng bata ngadto sa iyang dughan ug hinay nga miyugyog kaniya samtang siya mikanta og lullaby sa Pasko:

Nasayud ko nga ang kalinaw moabut pinaagi sa akong Manluluwas, kinsa mianhi sa yuta sa pagdala og kalinaw ug mahangturong kalipay alang sa matag usa kanato. Sigurado nga Siya moatiman niining gamay nga bata ug mobayaw kanamo kinsa gipili sa pag-atiman kaniya.

Mga pipila ka semana ang milabay si Timothy gibalhin didto sa special-care nursery diin ako nagtrabaho. Didto siya milagrosong nakat-on unsaon sa pagkaon. Ug usab ako misinati og nindot kaayong pagbati nga siya ma-OK ra. Ug bisan tuod siya milambo sa daghang mga paagi, wala gihapon ko kasabut kon unsa gayud ang gipasabut ana. Apan ako adunay ingon nga pagbati sa kahupay sukad nianang higayona. Ug sa panahon nga ako makakaplag og usa ka butang nga kinahanglang kabalak-an, kana nga pagbati mosanap ngari kanako, ug ang mensahe pareho gihapon: “Ayaw og kabalaka. Ang tanang butang mahimong OK ra. Pagmalipayon uban kaniya. ”

Kining panahon sa Pasko ang akong hunahuna nabalhin ngadto sa maanindot nga mga gasa nga gihatag sa Manluluwas ngari kanamo. Sa daghang mga paagi Siya nagtugot kanato sa pagbaton og kalinaw dinhi sa yuta. Usa sa labing talagsaon nga mga gasa sa kalinaw mao ang oportunidad sa pagkamainampuon kutob sa atong mahimo ug dayon itugyan ang atong mga kasubo ngadto Kaniya.

Pinaagi sa atong pagsalig sa Ginoo, kita makatugyan sa atong mga kabalaka ngadto Kaniya, ug isip balos Siya mobayaw kanato, maghatag og espesyal nga mga gasa aron sa pagpatunhay kanato—sa kasagaran pinaagi sa ubang mga tawo. Alang kanako kini nga mga gasa miabut sa paagi sa mga tigbantay sa akong duha ka nga mga anak, mga pagkaon gikan sa mga miyembro sa ward, talagsaong mga nurse ug mga doktor, ug mahigugmaong suporta gikan sa pamilya ug mga higala. Ang labing gamhanan nga gasa, hinoon, mao ang kanunayng kalinaw nga gihatag sa Langitnong Amahan samtang ang Iyang Anak mipas-an sa akong mga kasubo ug mga kabalaka. Tungod Kaniya, gawasnon ako sa paghigugma ug pagmalipayon sa batang si Timothy ug sa pagsaulog sa tanang mga tawo ug mga panalangin nga gibutang diha sa akong dalan tungod sa iyang espesyal nga kinabuhi.