Si Jesukristo Mao ang Bugtong Anak sa Dios

Si Jesus mao lamang ang tawo nga natawo sa usa ka mortal nga inahan, si Maria, ug sa usa ka imortal nga amahan, ang Dios nga Amahan. Mao kana nganong si Jesus ang gitawag og Bugtong Anak sa Dios. Gikan sa Iyang Amahan, Iyang napanunod ang balaang gahum (tan-awa sa Juan 10:17–18). Gikan sa Iyang inahan, Iyang napanunod ang pagkamortal ug siya mahimong gutumon, uhawon, maluya, masakitan, ug mamatay.

Ang mortal nga kinabuhi ni Jesukristo nagsugod sa dihang Siya natawo sa Betlehem. Si Lucas mihatag niini nga asoy: “Ang manolunda nga si Gabriel gipadala gikan sa Dios … ngadto sa usa ka dalagang birhen nga pangasaw-unon sa usa ka lalaki nga ginganlan si Jose. … Ug ang manolunda miingon kaniya, … magasamkon ikaw, ug igaanak mo ang usa ka bata nga lalaki, ug siya imong paganganlan si Jesus. Siya mahimong bantugan, ug pagatawgon nga Anak sa Labing Halangdon. … Pagakunsaran ikaw sa Espiritu Santo, ug pagalandungan ikaw sa gahum sa labing Halangdon: tungod niini ang bata nga matawo panganlan nga balaan, ang Anak sa Dios” (Lucas 1:26–27, 30–32, 35; tan-awa usab sa 1 Nephi 11:16–21; Alma 7:10).

Si Mateo mirekord nga usa ka anghel ang nagpakita ngadto kang Jose sa usa ka damgo, nag-ingon “Igaanak ni [Maria] ang usa ka bata nga lalaki, ug siya imong paganganlan si Jesus: kay siya mao man ang magaluwas sa iyang katawhan gikan sa ilang mga sala” (tan-awa sa Mateo 1:20–21). Silang duha si Maria ug Jose nakasabut nga ang batang lalaki kinsa ipanganak ni Maria ug kinsa pagatawgon og Jesus mao ang Bugtong Anak sa Dios.

Ang anghel nga si Gabriel misulti usab kang Maria nga ang iyang paryente nga si Elisabet mabdos og batang lalaki. Sa dihang si Maria mibisita kaniya, si Elisabet napuno sa Espiritu Santo ug miingon, “Ngano ba gayud nga gitugot man kini kanako, nga ako pagaduawon sa inahan sa akong Ginoo?” (tan-awa sa Lucas 1:39–45). Si Elisabet nasayud dayon nga si Maria mao ang mahimong inahan sa Anak sa Dios.

Ang uban nakadawat usab og saksi gikan sa Espiritu Santo nga si Jesukristo mao ang Anak sa Dios. Ang mosunod mao ang pipila sa ilang mga pagpamatuod.

1. Ang pipila sa mga disipulo sa Manluluwas anaa sa usa ka sakayan sa dihang ilang nakita si Jesukristo nga naglakaw sa katubigan. Sila “misimba kaniya, og miingon, Sa pagkatinuod ikaw mao ang Anak sa Dios” (Mateo 14:33).

2. Sa dihang si Jesus nangutana sa Iyang mga disipulo, “Unsa may inyong sulti, kinsa man ako?” Si Pedro mitubag, “Ikaw mao ang Kristo, ang Anak sa Dios nga buhi” (Mateo 16:15, 16).

3. Sa wala pa gibuhi ni Jesus si Lazaro gikan sa patay, Iyang gipangutana ang igsoong babaye ni Lazaro nga si Marta kon siya mituo ba nga Siya mao “ang pagkabanhaw, ug ang kinabuhi.” Siya mitubag, “Oo, Ginoo: ako nagatuo nga ikaw mao ang Kristo, ang Anak sa Dios” (Juan 11:25, 27).

4. Sila si Adan ug Eva mihalad og mga sakripisyo isip “usa ka pagkasama sa sakripisyo sa Bugtong Anak sa Amahan” (Moises 5:7).

5. Ang Dios mitudlo kang Adan nga siya kinahanglan nga “magpabunyag, gani sa tubig, diha sa ngalan sa akong Bugtong Anak, kinsa puno sa grasya ug kamatuoran, nga mao si Jesukristo” (Moises 6:52).

6. Sa Amerika, lima ka tuig sa wala pa ang pagkatawo sa Manluluwas, si Samuel ang Lamanite nanagna, “Moabut ang Anak sa Dios sa pagtubos sa tanan nga motuo sa iyang ngalan” (Helaman 14:2).