Komentaryo

Gusto kong magpasalamat kaninyo sa mga mensahe nga anaa sa Liahona matag bulan. Makatabang kaayo kini; nakatabang kini kanako nga magbinuotan matag adlaw. Sa higayon nga mawad-an ko og kadasig ug maghunahuna nga lisud kaayo ang kinabuhi, magbasa ko sa Liahona ug ang tanan mausab. Salamat sa tanan ninyong gihimo—alang kanako ug alang sa uban.

Nabunyagan ko pagka 1990 ug kanunayng nagtambong sa akong mga miting sa Simbahan. Apan bag-ohay lang gipadala ko ngadto sa laing nasud isip usa ka peacekeeper, ug sa pagkakaron dili ko makatambong sa bisan unsa nga mga miting. Ang akong paagi nga magpabiling maduol sa Simbahan mao ang pagbasa sa mga magasin diha sa Internet. Nahimo kining dakong inspirasyon ngari kanako. Mabati gayud nako ang Espiritu samtang nagbasa ko sa mga pulong sa atong propeta ug sa uban nga mga lider sa Simbahan. Gimingaw ko og ambit sa sakrament, apan nasayud ko nga ang Langitnong Amahan nakasabut sa akong kahimtang. Salamat sa mga magasin diha sa Internet.

Ang imo bang pagsaulog sa Pasko dili gayud mao ang imong gusto o dili mao ang nahitabo ingon sa imong giplano? Tingali nasakit ka, nagbangutan tungod kay namatyan, anaa sa military, anaa sa eskwelahan sa layo, o nalayo sa pamilya ug mga higala. Unsaon nimo sa pagsaulog ang Manluluwas ug ang Iyang pagkatawo sa ingon nga mga kahimtang? Palihug limitahi ang inyong kasinatian ngadto sa 500 ka mga pulong, sulati kini og “Christmas Celebrations,” ug ipadala ngadto sa liahona@ldschurch.org.