Ang mga sakop sa Seventy mipakigbahin sa unsang paagi nga sila mosaulog sa panahon ug mohinumdom sa pagkatawo sa Manluluwas.
Unsaon nato sa pagsaulog sa Pasko aron kini makahuluganon sa matag sakop sa pamilya? Unsaon nato nga masentro ang Manluluwas sa Pasko? Unsa nga mga tradisyon ang makatabang kanato sa paghinumdom Kaniya ug sa Iyang pagkatawo?
Ang mga sakop sa Seventy gikan sa nagkalain-laing mga nasud ug mga kultura mipakigbahin og mga paagi sa ilang pagtubag niining mga pangutana sa ilang kaugalingon ug sa ilang hinigugma. Dinhi sila mipakigbahin og pipila ka makahuluganong mga panumduman, pagpamatuod, ug tradisyon sa Pasko. (Ang ilang mga nasud nga natawhan gilista diha sa parenthesis.)
Imahe
Elder Marcos A. Aidukaitis
Elder Marcos A. Aidukaitis (Brazil): Ang Pasko usa ka espesyal kaayo nga oportunidad alang sa akong pamilya ug kanako sa paghisgut kabahin sa pipila ka sagradong mga butang nga tingali dili nato hisgutan sa samang pormal ug piho nga paagi atol sa ubang panahon sa tuig. Kini usa ka oportunidad sa pagpakita og gugma ngadto sa uban ug pasalamat sa mga butang nga nahitabo sa atong kinabuhi.
Imahe
Elder David S. Baxter
Elder David S. Baxter (Scotland): Sa dihang ang among mga anak gagmay pa, kami manaygon sa Bisperas sa Pasko, manghatag og mga gasa nga mga Yule log ngadto sa dili kaayo aktibo nga mga pamilya sa among ward. Kami magdagkot og mga kandila sa Bisperas sa Pasko, magbasa sa istorya sa Pasko, maghimo og espesyal nga panihapon sa pamilya, ug dayon mag-ubang maglingaw-lingaw sa Pasko.
Imahe
Elder Gérald Caussé
Elder Gérald Caussé (France): Sa among pamilya kami nakahukom nga ang Pasko dili lang paglingaw-lingaw, apan kini usab kabahin sa pagpunting ngadto ni Kristo ug sa pag-alagad sa uban. Mga 10 ka tuig ang milabay kami miporma og usa ka choir sa mga sakop sa pamilya. Kami miadto og mga ospital ug mga retirement home ug miawit og mga kanta sa Pasko. Sa sinugdanan kini usa ka gamay nga grupo. Kami adunay mga bata sa among mga bukton ug anaa sa mga stroller. Apan karon kining mga bata nanagko na, ug sila mga maayo kaayo nga mga chorister. Kami adunay 44 ka tawo nga choir nga nagpakigbahin dili lamang sa tradisyonal nga mga kanta sa Pasko sa French apan usab mga himno sa Simbahan, ug kami nakakaplag og dakong kalampusan. Human sa pagpanganta, ang mga bata moadto ug moapud-apud ngadto sa masakiton o tigulang og mga gagmayng regalo nga among giandam isip usa ka pamilya. Kami naningkamot sa paggahin og panahon sa matag tawo, naghisgut kabahin sa tinuod nga kahulugan sa Pasko ug usab sa pagpaminaw kanila. Ang tanan kanunay adunay daghang ipakigbahin.
Ang among mga pagbisita espesyal nga mga okasyon sa paghinumdom unsa ang atong nasayran kabahin sa pagka-Kristyano ug sa pagdala sa ngalan ni Kristo. Ang Pasko usa ka nindot nga pahinumdom kon unsaon nato sa pagbinuotan sa tibuok tuig.
Imahe
Elder Eduardo Gavarret
Elder Eduardo Gavarret (Uruguay): Ang Pasko usa ka espesyal nga panahon sa atong kinabuhi. Kami kanunay mapuno sa mainitong pagbati niadtong higayona. Kon moabut ang bulan sa Disyembre, kami makakaplag nga ang Pasko usa ka panahon sa kalinaw ug pagpakig-uban sa pamilya. Kami adunay tradisyon sa pagsulat ngadto sa among mga higala, apan kami malingaw kaayo sa pagsulat ngadto sa Manluluwas ug pagbutang niini sa Christmas tree isip usa ka gasa nga among gustong ihatag Kaniya.
Imahe
Elder Carlos A. Godoy
Elder Carlos A. Godoy (Brazil): Isip usa ka pamilya among isulat ang among mga pagpamatuod diha sa mga kopya sa Basahon ni Mormon ug dayon ipadala kini ngadto sa mga higala ug mga paryente isip mga gasa sa Pasko. Tungod kay kini Pasko, ang mga gasa kanunay dawaton. Ug kini nindot nga paagi sa pagpakigbahin sa ebanghelyo ug sa paghinumdom nga si Kristo mao ang labing importanting bahin sa adlaw.
Imahe
Elder Christoffel Golden Jr.
Elder Christoffel Golden Jr. (South Africa): Panahon sa Bisperas sa Pasko kami malingaw og usa ka pormal nga panihapon, diin kami mobasa sa kasaysayan ni Lucas kabahin sa pagkatawo sa Manluluwas. Sa buntag sa Pasko, magsul-ob sa among sinina nga pang-Dominggo, kami motambong og mubo nga miting sa Pasko. Niini nga miting kami usab adunay mga pipila ka mga dili miyembro ug dili kaayo aktibo nga mga miyembro nga manambong. Inigkahuman kami mobisita uban sa mga higala ug ubang mga sakop sa pamilya diha sa panagpundok sa pamilya ug didto lig-unon ang among mga relasyon sa pamilya diha sa tinuod nga diwa sa Pasko.
Imahe
Elder Donald L. Hallstrom
Elder Donald L. Hallstrom (USA): Inig ka Bisperas sa Pasko sa nanglabay nga mga tuig kami magpundok aron maghimo og nindot kaayo ug dili makalimtang higayon sa pagpamatuod. Ang matag sakop sa pamilya mahatagan og oportunidad sa pagpahayag sa iyang mga pagbati kabahin sa Manluluwas ug kabahin sa atong Amahan sa Langit. Kadtong lalum nga mga pagbati sa gugma moabut sa matag usa kanamo, ug ang pagpakita og gugma alang sa mga sakop sa pamilya mabati gayud sa kasingkasing. Ang akong amahan dayon mopahayag sa iyang panan-awon alang sa pamilya ug mohatag og gamhanan nga pag-awhag sa matag sakop sa pamilya nga magpabiling matinud-anon sa tinuohan. Dayon sa panaghiusa kaming tanan mangluhod sa usa ka panapos nga pag-ampo sa pamilya.
Imahe
Elder Paul V. Johnson
Elder Paul V. Johnson (USA): Usa sa among tradisyon mao nga kada tuig kami motambong og usa ka pasundayag sa kanta nga Messiah ni Handel isip usa ka pamilya. Kami ganahan kaayo niana. Matag usa kanamo adunay kopya sa musika, ug kini naghatag kanamo og kahigayunan sa pagkanta sa nindot kaayong mga pulong, nga gihimoan og musika ni Handel, ug makahinumdom og balik sa pagpangalagad sa Manluluwas.
Imahe
Elder Yoshihiko Kikuchi
Elder Yoshihiko Kikuchi (Japan): Sugod sa mga 30 ka adlaw sa dili pa ang Pasko, ang akong asawa ug ako maningkamot sa pagbasa sa mga pulong sa mga propeta gikan sa mga kasulatan kabahin sa pagkatawo sa Manluluwas. Kon kamo magbasa matag adlaw hangtud Disyembre 25, kamo mobati nga ang diwa sa Pasko hinay-hinay nga motubo, matag istorya, matag kasulatan. Kana mao ang among gipaningkamutan nga buhaton sa among pamilya.
Kanunay akong makahinumdom sa tubag ni Nephi ngadto sa pangutana sa anghel kabahin sa kahulugan sa kahoy diha sa damgo sa iyang amahan. Si Nephi miingon, “Oo, mao kini ang gugma sa Dios, nga makatag sa tibuok kalibutan diha sa mga kasingkasing sa mga anak sa katawhan” (1 Nephi 11:22). Alang kanako, ang Pasko kabahin sa gugma sa Langitnong Amahan ug ni Jesukristo.
Imahe
Erich W. Kopischke
Elder Erich W. Kopischke (Germany): Atol niining panahona, ang tibuok balay klaro kaayo nga mausab. Ang dagkong mga sanga sa fir tree giadornohan, mga kandila nga gidekoresyonan gibutang diha sa mga bintana, ug mga suga [series lights] gipangbitay. Ang mga bata magbutang og mga dekorasyon sa Pasko sa ilang mga lawak, magluto og mga cooky ug gingerbread, ug ang alimyon anaa sa tibuok panimalay—ang kahumot sa mga fir tree ug cinnamon.
Ang Bisperas sa Pasko usa ka paboritong panahon alang kanamo sa pagdapit sa pamilya ug mga higala ngadto sa among panimalay. Kami magdagkot og mga kandila ug maghaling og kalayo diha sa fireplace. Kami mangandam og espesyal nga mga songbook nga adunay mga kanta sa Pasko nga ganahan namong kantahon. Akong gipagawas ang akong akordyon, ug ang matag tawo mopili og kanta sa Pasko nga dunganon namo sa pagkanta. Adunay usa ka espesyal nga diwa nga natagamtaman sa tanan.
Dayon among ablihan ang mga regalo. Ang gagmayng mga bata maoy mouna. Ang tanan motan-aw ug mopakigbahin sa kahinam samtang ang matag usa moabli sa regalo. Human og abli sa tanang mga regalo, ang mga bata dali-daling mangawala uban sa ilang mga bahandi. Ang mga hamtong magpabilin ug mag-istoryahanay. Mora gyud kini og usa ka espesyal nga family home evening.
Usahay kami modapit sa mga tawo diha sa Bisperas sa Pasko kinsa nag-inusara. Kining ingon nga mga Pasko nindot kaayo sa piho nga paagi.
Imahe
Elder Michael John U. Teh
Elder Michael John U. Teh (Philippines): Ang Pasko alang kanako nagpasabut og si Kristo ug ang akong pamilya. Kini usa ka oportunidad sa pagpasalig og usab sa akong kaugalingon sa paghimo og mas maayo sa akong relasyon uban sa atong Langitnong Amahan ug sa Manluluwas ug unsa ko isip usa ka bana ug amahan. Mapasalamaton ako sa oportunidad nga makatambong og miting sa sakrament sa tibuok tuig tungod kay kini usa ka higayon alang kanako sa pagbag-o niadtong mga pakigsaad ug paghinumdom sa Pasko. Kini mahimong sama sa Pasko matag semana, usa ka panahon diin ako mopasalig pag-usab sa akong kaugalingon sa paghinumdom sa Manluluwas.
Imahe
Elder José A. Teixeira
Elder José A. Teixeira (Portugal): Ang labing maayo alang sa among pamilya sa pagpabilin ug paghupot sa diwa sa Pasko, dili lamang atol sa panahon apan sa tibuok tuig, mao ang pagbasa sa mga kasulatan. Samtang kami mobasa sa mga kasulatan isip usa ka pamilya, mapahinumduman namo ang among kaugalingon sa Manluluwas ug sa tinuod nga diwa sa Pasko.
Ang Pasko alang sa akong pamilya ug kanako sa tinuoray nagpasabut nga Jesukristo. Kini usa ka panahon sa paghatag, panahon sa pagdawat, panahon sa pagkontak og balik uban sa among mga pamilya, ug panahon sa paghatag og mas dakong paghigugma niadtong nagpalibut kanamo.
Imahe
Elder Francisco J. Viñas
Elder Francisco J. Viñas (Spain): Ganahan ko nga mopakigbahin kaninyo og usa ka kasinatian nga among nasinati panahon sa akong pagpangalagad isip presidente sa misyon niadtong 1989. Samtang kami nangalagad sa Argentina Salta Mission, mga pipila ka adlaw sa dili pa ang Pasko, kami nakadawat og instruksyon gikan sa Missionary Department nga ang mga misyonaryo kinahanglang magpabilin sa ilang mga apartment hangtud adunay pahibalo tungod kay giatake ang Panama sa Estados Unidos.
Pagkabuntag sa ika-24 sa Disyembre, among gipuno ang mga sakyanan sa misyon ug gitunga ang misyon ngadto sa duha ka bahin: ang mga assistant miadto sa amihanang bahin sa misyon, ug ang akong otso anyos nga anak nga lalaki ug ako miadto sa habagatang bahin sa misyon. Ang katuyoan mao ang pagbisita sa matag kompanyon sa ilang apartment, paghatag og pagkaon, ug pagpakigbahin og mensahe sa Pasko uban kanila. Kini usa ka talagsaon nga kasinatian alang sa akong anak nga lalaki ug kanako. Ang pag-adto sa matag apartment ug sa pagpakigbahin uban sa mga misyonaryo usa ka talagsaon nga kasinatian alang kanamong duha—usa ka butang nga kanunay namong handumon isip usa ka talagsaon nga panumduman sa Pasko.
Ang akong asawa ug duha ka anak nga mga babaye nagpabilin sa mission home, ug ang akong anak nga lalaki ug ako miuli sayo sa buntag sa ika-25 sa Disyembre. Kadto mao ang unang higayon nga kami wala nag-uban isip usa ka pamilya sa Bisperas sa Pasko, apan alang kanamo kadto mao ang labing nindot nga panumduman sa Pasko.
Imahe
Elder Jorge F. Zeballos
Elder Jorge F. Zeballos (Chile): Kon kamo adunay pagpamatuod ni Jesukristo—nga Siya Buhi, nga Siya mao ang atong Manluluwas, atong Manunubos—ang labing maayo nga paagi sa pagpakita sa inyong gugma alang Kaniya mao ang pagkamasulundon sa Iyang mga sugo. Busa alang kanako, ang labing maayo nga paagi sa paghinumdom Kaniya, dili lamang atol sa panahon sa Pasko apan matag adlaw, mao ang pagkamasulundon sa tanang mga butang nga Iyang gisugo kanato nga buhaton.
Imahe
Elder Claudio D. Zivic
Elder Claudio D. Zivic (Argentina): Ang Pasko alang kanako ug sa akong pamilya nagpasabut sa pagsaulog sa pagkatawo ni Jesukristo, atong Manluluwas ug Manunubos. Kini nagpasabut sa pagpundok isip usa ka pamilya sa Bisperas sa Pasko aron sa paghimo og home evening diin ang tanan moapil sa pagpresentar, pagbasa, ug pagkanta sa espesyal nga mga panghitabo sa pagkatawo sa Bata sa Betlehem. Kini sa kanunay mao ang labing importante nga pagsaulog sa among panimalay, ug kami naningkamot sa paghupot sa diwa sa panahon pinaagi sa pagpuyo sa ebanghelyo matag adlaw.