Si Presidente Thomas S. Monson mipahinungod sa ika-131 nga templo sa Simbahan diha gayud sa gawas sa Vancouver, British Columbia, pagka Mayo 2, 2010. Dul-an sa 40,000 ka mga tawo ang naka-tour sa templo atol sa public open house, nga gipahigayon duha ka bulan human sa 2010 Winter Olympic Games sa Vancouver. Ang Templo sa Vancouver British Columbia makaserbisyo sa mga miyembro sa British Columbia ug sa amihanang Washington, USA. Ang Simbahan karon adunay walo ka giplano o magamit nga mga templo sa Canada.

Si Presidente Thomas S. Monson mipahinungod sa Templo sa Gila Valley Arizona pagka Mayo 23, 2010, sa tulo ka mga sesyon. Ang templo nagserbisyo sa mga miyembro sa habagatang-silangang Arizona ug habagatang-kasadpang New Mexico. Ang templo nahimutang sa habagatang-silangang Arizona, dili layo sa dapit diin si Presidente Spencer W. Kimball (1895–1985) nagdako. Ang Templo sa Gila Valley mao ang ikatulo nga ablihan sa Arizona, ug lain pang duha (Gilbert Arizona ug Phoenix Arizona) ang gipahibalo.

Si Presidente Thomas S. Monson mipahinungod sa ikaduhang templo sa Philippines pagka Hunyo 13, 2010. Ang Templo sa Cebu City Philippines nahimutang mga 350 ka milya (563 km) gikan sa Templo sa Manila Philippines. Ang templo moserbisyo sa sobra sa 200,000 ka mga miyembro sa mga dapit sa Visayas ug Mindanao. Sobra sa 45,000 ka mga tawo ang mitambong sa duha ka semana nga public open house. Nianang gabii sa wala pa ang pagpahinungod, sobra sa 3,000 ka kabatan-onan ang mipasundayag sa cultural event.

Ang groundbreaking sa Templo sa Brigham City Utah gipahigayon pagka Sabado, Hulyo 31, 2010, alas 9:00 sa buntag. Si Presidente Boyd K. Packer, Presidente sa Korum sa Napulog Duha ka mga Apostoles, ang nangulo sa groundbreaking, nga gisibya ngadto sa mga stake center sa tibuok temple district. Ang Templo sa Brigham City Utah gipahibalo sa kinatibuk-ang komperensya pagka Oktubre 3, 2009. Kini ang ika-14 nga magamit nga templo sa Simbahan didto sa Utah.

Ang Templo sa Kyiv Ukraine gipahinungod pagka Agosto 29, 2010, sa tulo ka mga sesyon nga gisibya sa tibuok temple district. Ang public open house gipahigayon gikan sa Agosto 7 hangtud 21, uban sa cultural celebration pagka Agosto 28. Ang templo gipahibalo pagka Hulyo 20, 1998. Ang pagtukod gisugdan pagka Hunyo 23, 2007. Mao kini ang unang templo sa Simbahan didto sa Eastern Europe ug ang ika-11 sa kontinente sa Europe. Ang Templo sa Kyiv nagserbisyo sa mga miyembro sa 13 ka mga nasud.

Human sa halapad nga mga renovation, ang Templo sa Laie Hawaii gipahinungod og usab sa tulo ka mga sesyon pagka Nobyembre 21, 2010, human sa public open house gikan sa Oktubre 22 hangtud Nobyembre 13 ug usa ka cultural celebration pagka Nobyembre 20. Ang pagpahinungod og usab gisibya sulod sa mga Temple district sa Laie ug Kona. Ang templo mao ang ikalima sa Simbahan, nga gipahinungod niadtong 1919 ni Presidente Heber J. Grant ug gipahinungod og usab niadtong 1978 ni Presidente Spencer W. Kimball.