Si Jesus Natawo

Hinay nga miabut ang kangitngit sa mga bakilid duol sa Bethlehem. Tingpamulak kadto, panahon nga daghang bag-ong nati nga karnero ang natawo. Ang busy nga mga magbalantay sa karnero misusi sa usa ka nati nga karnero ug dayon sa uban sa dili pa mopahulay nianang gabhiona.

Ang Bethlehem busy usab. Daghang mga biyahidor miadto sa barangay tungod kay ang emperador sa Roma misugo nga ang tanang mga tawo kinahanglang moadto sa siyudad sa ilang mga katigulangan aron mobayad og buhis. Duha sa mga biyahidor—si Jose ug ang iyang asawa, si Maria—kinahanglang mangita og dapit nga kapahulayan nianang gabhiona.

Sa katapusan si Jose ug si Maria nakakita og kapasilongan sa usa ka kwadra, diin ang mga hayop gibutang. Nianang yano nga kwadra ang anak ni Maria natawo. Ang bata mao ang Anak sa Dios, ang Manluluwas sa kalibutan.

Giputos ni Maria ang bata sa limpyo nga bakbak ug naghimo og gamay nga higdaanan alang Kaniya diha sa humok, limpyo nga uhot sa pasungan. Nasayud si Jose nga kini nga bata mao ang Anak sa Langitnong Amahan. Iyang ginganlan ang bata og Jesus, sama sa unang gisulti sa anghel kaniya.

Ang mga anghel sa langit nagmaya! Ang mga saad sa mga propeta natuman. Si Jehova, nga karon gitawag og Jesus, natawo sa kalibutan. Usa ka bag-o nga bitoon misanag sa kalangitan sa pagpahibalo sa maayong mga balita.

Sa kiliran sa usa ka bungtod usa ka anghel nagpakita ngadto sa mga magbalantay sa karnero, ug usa ka siga nga kahayag ang midan-ag sa palibut. Ang mga magbalantay wala gayud sukad makakita sa mao nga butang, ug nahadlok kaayo sila.

“Ayaw na kamo kalisang,” miingon ang anghel, “kay, tan-awa, gidad-an ko kamog maayong balita sa dakong kalipay, nga magaabut sa tanang mga tawo. Kay alang kaninyo natawo karon sa lungsod ni David ang Manluluwas nga mao ang Kristo nga Ginoo. Ug ang inyong ilhanan mao kini; inyong makaplagan ang usa ka gamayng bata nga naputos sa mga bakbak, ug nagahigda sa pasungan.”

Ug sa kalit, dihay mga anghel nga nagsulti sa mga magbalantay sa karnero, “Himaya sa Dios sa kalangitan, ug sa yuta panagdait, sa mga tawo nga iyang gikahimut-an.”

Sa dihang mibiya ang mga anghel, ang natingala nga mga magbalantay sa karnero nagdali paingon ngadto sa Bethlehem, diin ilang nakita ang bata nga si Jesus nga naghigda sa pasungan. Sa dihang ang mga magbalantay sa karnero mibalik ngadto sa ilang karnero, ilang gidayeg ang Dios ug misulti sa uban sa tanan nilang nakita.