Usa ka Espesyal nga Bisita

Kita adunay espesyal nga bisita karong gabii sa family home evening,” mipahibalo si Papa atol sa pamahaw.

Natingala si Daniel. “Kinsa ang moabut?” siya nangutana.

“Usa ka tawo nga nailhan na ninyo pag-ayo,” miingon si Mama. “Usa ka tawo nga ganahan ninyong ikahimamat!”

Sa tibuok adlaw si Daniel naghunahuna kinsa ang moabut sa family home evening. Pipila na lang ka adlaw Pasko na. Tingali ang espesyal nga bisita adunay kalabutan sa Pasko.

Sa katapusan, ang pamilya nagpundok sa pagkagabii. Miingon si Papa, “Karong gabhiona si Joseph Smith mao ang atong espesyal nga bisita. Ang iyang adlaw nga natawhan mao ang Disyembre 23. Isip usa ka pamilya atong i-drama ang istorya sa Unang Panan-awon ni Joseph Smith.”

Ang tanan nagkuha og props ug mga costume alang sa ilang mga papel. Nagpraktis si Daniel sa iyang bahin uban ni Papa samtang ang uban nagpraktis uban ni Mama. Sa wala madugay andam na sila.

Ang gamay nga bata nga si Matthew mahinamong modula sa papel nga Joseph Smith. Si Daniel ug si Elizabeth mao ang nagdala sa pamilya ni Joseph. Si Mama ug si Papa nagpakaaron-ingnon nga mga tigsangyaw nga gikan sa lain-laing mga simbahan.

“Apil sa among simbahan ug magpakaluwas!”

“Ayaw, kuyog namo! Kami ang sakto!”

“Ang Biblia miingon niini!”

“Apan dili kana mao ang unsay gipasabut!”

“Karon, unsa sa inyong hunahuna ang gibati ni Jospeh Smith?” Nangutana si Papa. “Sa inyong hunahuna natingala kaha siya ngano nga ang tanang mga tigsangyaw nagsulti og lahi nga mga butang ug kinsa ang sakto?”

Si Daniel, Matthew, ug si Elizabeth uyon nga si Joseph natingala mahitungod niana.

Dayon si Papa midagkot og usa ka kandila. Gibati ni Daniel nga ingon og kauban siya ni Joseph Smith samtang nagbasa si Papa gikan sa Santiago 1:5 pinaagi sa kahayag sa kandila, “Kon aduna man kaninyoy nakulangan og kaalam, papangayoa siya sa Dios.” Dayon gisugdan ni Papa ang pagbasa sa istorya sa Unang Panan-awon.

Sama sa gibuhat ni Joseph Smith, si Matthew miluhod ingon og siya nag-ampo. Sa kalit ang hayag sa usa ka flashlight misanag ngadto kaniya, ug matinahurong gi-recite ni Daniel ang mga linya nga iyang gisag-ulo pinaagi sa tabang sa iyang Papa. “Kini ang Akong Hinigugma nga Anak. Paminaw Kaniya!” (Joseph Smith—Kasaysayan 1:17).

Mipasabut si Papa kon sa unsang paagi mipakita ang Langitnong Amahan ug si Jesukristo ngadto ni Joseph Smith ug misulti kaniya sa dili pag-apil sa bisan unsa nga mga simbahan nga anaa sa kalibutan.

“Ang Ginoo mipili ni Joseph Smith nga mahimo Niyang propeta sa pagpahiuli sa tinuod nga Simbahan ni Jesukristo dinhi sa kalibutan,” miingon si Papa. “Matinud-anong gituman ni Joseph kana nga misyon.”

Paglabay sa pipila ka mga adlaw ang silingan ni Daniel nga si Andy mianha aron makigdula. Naghunahuna gihapon si Daniel mahitungod sa family home evening uban ni Joseph Smith.

Miatubang siya ngadto ni Andy ug miingon, “Ako nakaila og usa ka propeta nga dugay na si—Joseph Smith. Nakaila ka ba kinsa siya?”