Kamo Mao ang mga Anghel

Malipayon kaayo ko samtang nagbasa sa poster: “Ang Messiah ni Handel ipasundayag pinaagi sa Swansea Orchestra ug Welsh Choir.”

Ako nagserbisyo sa akong misyon sa Swansea, Wales, sulod sa unom ka bulan ug mibati og paghandum nga kanunayng mahitabo ngadto sa usa ka bag-ong misyonaryo atol sa panahon sa Pasko. Kami adunay daghang mga tradisyon sa pamilya atol sa panahon sa Pasko, apan ang akong paborito mao ang pagpaminaw sa Messiah ni Handel. Ang akong inahan nakatugtog na sa organ makadaghan sa ingon nga mga pasundayag. Ako molingkod, maminaw, ug mobati sa musika.

Uban sa pagtugot gikan sa presidente sa misyon, mipalit ako og mga ticket alang sa mga misyonaryo sa among area. Sa gabii sa pasundayag, ang among grupo misul-ob og bagang sinina para sa tugnaw ug milakaw ngadto sa concert hall. Hilum ako nga nag-ampo nga kaming tanan mobati sa kasagrado sa makapadasig nga musika.

Sa among pag-abut, nakaamgo ko nga kami naulahi ug ang pasundayag nagsugod na. Kami wala tugoti sa pagsulod hangtud sa intermission! Samtang ako naminaw sa musika diha sa may pultahan, dili nako kapugngan ang mga luha.

Usa ka tig-abi-abi [usher] ang nakamatikod sa akong tumang kasubo ug nakahukom sa pagpasulod kanamo. Siya miingon kanamo sa pagbarug sa likod hangtud sa intermission aron kami dili makasamok sa pagkanta. Siya hinay-hinay nga miabli sa mga pultahan, ug kaming tanan hinay-hinay nga misulod.

Ang paglakaw sulod sa hall sama nga naglakaw ngadto sa langit. Ang pagbati sa kalinaw ug hingpit nga kalipay misanap kanako. Hinoon, wala magdugay among namatikdan nga ang mga tawo nanlingi, nagtudlo ug nagtutok kanamo. Kaming tanan hilum nga nakasulod ug wala masayud unsa ang among nahimo nga kami nakakuha og atensyon. Sa wala madugay sa dihang nagsugod ang intermission, among nakit-an ang among mga lingkuranan.

Sa dihang mibalik na ang pamulong [oratorio], ang musika mipuno sa akong kalag. Mihilak ako panahon sa korus sa “Hallelujah,” ug sa diha ang soprano mikanta og “I Know That My Redeemer Liveth.” Ang mga misyonaryo sa kilid nako mibati usab sa gahum sa musika ug mikuha sa ilang mga panyo. Ang kasinatian usa ka butang nga kanunay namong hinumduman. Dili hangtud sa pagkahuman sa pasundayag nga ang tinuoray nga mahandumong panghitabo moabut.

Sa among pagbiya sa building, ang mga tawo nagpadayon gihapon sa paghunghong ug pagtudlo, apan walay usa ang misulti og bisan unsa hangtud kami diha na sa gawas. Ang usa ka tawo dayon miduol kanamo, miingon, “Kamo kadto! Kamo kadto!”

Kaming tanan nagpaabut og pasabut.

“Atol sa unang bahin sa pasundayag, kami mibati og kausaban sa concert hall—usa ka kusog nga pagbati nga si Kristo anaa didto,” ang lalaki miingon. “Busa kami milingi aron tan-awon unsa ang hinungdan sa kausaban. Sa among paglingi sa likod sa auditorium, kami nakakita og pito ka mga hulagway [figures] nga naghayag nga mora og mga anghel. Sa dihang kamo misulod sa auditorium, inyong gidala ang Espiritu Santo. Kamo anaa didto sa pagrepresentar ni Kristo; kamo mao ang mga anghel.”

Samtang siya nagsulti, ako mitan-aw sa akong missionary name tag ug mibasa sa dagkong mga letra ubos sa akong ngalan: “Ang Simbahan ni Jesukristo sa mga Santos sa Ulahing mga Adlaw.” Hilabihan ako ka mapainubsanon nianang higayona nga mahimong usa ka representante sa Mesiyas ug sa hilum nga paagi mipamatuod Kaniya niadtong gabhiona diha sa liboan ka mga tawo.