Ngaahi Fakakaukau ʻe 3 ki he Efiafi Fakafāmili ʻi ʻApí ke Fakafoʻou Ai Hoʻo Tuʻunga Fakalaumālié

ʻĪmisi

akoʻi ʻe ha tamai e fānaú

ʻOku fie maʻu ke fakafoʻou ʻetau tuʻunga fakalaumālié ʻi he ʻaho kotoa pē. Ne tohi ʻa ʻEletā W. Mark Bassett ʻo e Kau Fitungofulú, ʻo fekauʻaki mo e fie maʻu ko ʻení ʻi he “Sio pea Moʻui” (Liahona, Sānuali 2018). ʻE lava pē ke feliliuʻaki ʻa e ngaahi fakakaukau ko ʻeni ki he ʻekitivitií, ʻe he ngaahi fāmili ʻoku ʻi ai haʻanau fānau ʻi ha faʻahinga toʻu pē, ke fakaʻaongaʻi he efiafi fakafāmili ʻi ʻapí.

1. Hangē ko e fānau ʻa ʻIsilelí, ʻoku fie maʻu foki mo kitautolu ke tau tānaki ha “mana fakalaumālie” ʻi he ʻaho kotoa pē—ʻoku tau lotu, ako e ngaahi folofolá, tauhi e ngaahi fekaú, pea tokoniʻi ʻa e niʻihi kehé kae lava ke nofoʻia maʻu pē kitautolu ʻe he Laumālié. Kumi ha faʻahinga meʻa pē te ke lava ʻo fakaʻaongaʻi ko ha “mana” (fakamaʻu, meʻavaʻinga, foʻi pulu pepa, etc.) pea veteki kinautolu ʻi he falikí. Tuku ki he fānaú ke nau tufi ʻa e maná ʻo faʻo ʻi ha poulu. (Te ke lava pē ʻo fūfuuʻi ʻa e maná ke kiʻi ngali faingataʻa ange ʻa e vaʻingá.) Ko e taimi kotoa pē te nau faʻo ai ha mana ki he poulú, te nau lava ke ʻomi ha sīpinga ʻo ha ngāue ke fai ʻe maʻu ai ha ivi fakalaumālie. Fakakaukau ke lau ʻa e ʻEkesōtosi 16:19-21 pea mou aleaʻi ia. Ko e hā ne mahuʻinga ai ki he kau ʻIsilelí ke tānaki ʻa e maná ʻi he ʻaho kotoa peé? Pea ko e hā ʻoku mahuʻinga ai kiate kitautolú?

2. Hangē pē ko e talanoa ʻa ʻEletā Bassett ʻo fekauʻaki mo e fie maʻu ʻe he fakafonu ʻo e meʻalelé ke ngāue lelei ke ne fai e fakafonú, ʻe fie maʻu foki ke fakafonu fakalaumālie mo kitautolu. Kumi ha faʻahinga meʻavaʻinga ʻoku ngaue ʻi he taimi ʻokú ke takaiʻi ai ha pea tukuangé pe ko e konga ki ʻolungá—ha faʻahinga meʻa pē ʻoku fie maʻu ke takai pe vilohi kae toki lava ʻo ngāue. Toutou takai pe vilohi ʻa e meʻavaʻingá. ʻOku kaunga fēfē nai ʻeni ki heʻetau fakafonu fakalaumālie kitautolú? Ko e hā ʻa e meʻa ʻe hoko kapau he ʻikai ke tau toe vilohi ʻa ʻolunga? ʻI he taimi tatau, ko e hā ʻa e meʻa ʻe hoko kapau he ʻikai ke teau toe lotu pe maʻulotu? Mahalo pē te ke fie vahevahe ange e konga ko e “Mana Fakalaumālié” ʻi he fakamatala ʻa ʻEletā Bassett.

3. Kapau ʻoku fakafonu mo mālohi ʻetau “ngaahi maka fakalaumālié,” ʻe lava ke hoko e Laumālie Māʻoniʻoní ko hotau takaua maʻu pē. Kimuʻa he efiafi fakafāmili ʻi ʻapí, fokotuʻu ha lisi ngāue ʻe ua: (1) ngaahi meʻa ʻokú ne holoki ʻetau maka fakalaumālié (hangē ko e loí, angakovi ki ha tuongaʻane/tuofefine, hola he ako folofolá) pea (2) ngaahi meʻa ʻokú ne fakafonu kinautolú (hangē ko e totongi vahehongofulú, ʻaʻahi ki he puké, maʻu ʻo e sākalamēnití). Lau leʻolahi ʻa e konga takitaha. Kole ki he fānaú ke nau ʻalu ki he tafaʻaki toʻohema ʻo e lokí kapau ko e ngāue ko iá ʻokú ne holoki ʻetau maka fakalaumālié pea nau ō ki toʻomataʻu kapau ʻokú ne fakafonu ia. Poupouʻi kinautolu ke nau fili ki he totonú.